རྔ་པར་རང་སྲེག་གི་དོན་རྐྱེན།

• 
  2013-02-13

༄༅།    །ཀིརྟི་བྱེས་པ་གྲྭ་ཚང་ནས་དེ་རིང་རང་གནས་ཚུལ་མཁོ་གཏོང་གནང་བ་གཞིར་བཟུང་བྱས་ན།     ཕྱི་ཟླ་༢ ཚེས་༣ ཉིན་གྱི་བོད་ནང་གི་ཞོགས་ཀའི་ཆུ་ཚོད་དྲུག་པ་ཙམ་ལ་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ། རང་ལོ་༣༧ ཡིན་པ་ཁོང་གིས་རྔ་པ་རང་སྐྱོང་ཁུལ་མཛོད་དགེ་རྫོང་མཁར་གྱི་སྤྱི་བདེ་ཉེན་རྟོག་ཁང་དང་ཐག་ཉེ་ཙམ་ནས་རང་ལུས་མེ་རུ་བསྒྲོན་ཏེ་༸རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག་ཅེས་སོགས་སྐད་འབོད་བྱེད་བཞིན་ཉེན་རྟོག་ཁང་གི་ཕྱོགས་སུ་རྒྱུག་ཡོད་པ་དང་། ཁོང་ས་གནས་དེ་ག་རང་ལ་འདས་གྲོངས་སུ་གྱུར་ཡོད་འདུག སྐབས་དེར་ཉེན་རྟོག་པ་རྣམས་ཀྱིས་ཁོང་གིས་རང་ལུས་མེར་སྲེག་གཏོང་ས་དེ་ནས་རྒྱབ་ཁུག་ཅིག་གི་ནང་ནས་ཐོབ་ཐང་ལག་ཁྱེར་དང་ཡི་གེ་ཞིག་རྙེད་སོན་བྱུང་བ་ལྟར་བརྩད་གཅོད་བྱས་མཐར་ཁོང་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་ཡིན་པ་ར་སྤྲོད་གསལ་པོ་བྱུང་ཡོད་འདུག འོན་ཀྱང་གནས་ཚུལ་མཁོ་སྤྲོད་པས་གསུངས་ཡག་ལ།    ཡི་གེའི་ནང་དོན་ཤེས་རྟོགས་མ་བྱུང་ལ། དེ་བཞིན་ཁོང་གི་སྐུ་ཕུང་ཡང་ནང་མིར་མ་སྤྲད་པར་རྒྱ་གཞུང་གིས་མེར་སྲེག་བཏང་རྗེས་རུས་ཐལ་ཞིག་མ་གཏོགས་སྤྲད་མེད་ཀྱང་།    དེ་འབྲེལ་གྱི་ཞིབ་ཕྲའི་གནས་ཚུལ་ཤེས་རྟོགས་མ་བྱུང་།    ཞེས་གསུངས་འདུག
གྲྭ་བློ་བཟང་རྣམ་རྒྱལ་ལགས་ནི་རྔ་པ་རྫོང་གཅའ་རུ་བ་ཡུལ་ཚོའི་ཕྱུགས་ལས་གོང་མའི་ཕ་སྐར་ཁོ་དང་། མ་སྐར་སྐྱིད་གཉིས་ཀྱི་བུ་ཡིན་ཞིང་། ཁོང་ཚང་ལ་བུ་བཞི་དང་བུ་མོ་བཞི་བཅས་མིང་སྲིང་བརྒྱད་ཡོད་འདུག ཁོང་ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ། དེང་སྐབས་འཛིན་གྲྭ་མཛོད་ལོ་རིམ་གཉིས་པ་ཡིན་པ་དང་། རྒྱུན་དུ་གཉོམ་ཆུང་ཚུལ་མཐུན་བྱས་ཏེ་ཚོགས་ཆོས་ར་དང་། དཔེ་ཁྲིད་སོགས་ལ་ཆགས་མེད་ཀྱིས་ཕེབས་མཁན་ཞིག་ཡིན་འདུག་ལ། ལྷག་པར་དུ་ཀུན་སྤྱོད་ཀྱི་ཐད་ནས་གཞན་གྱི་མིག་དཔེར་འོས་པ་ཞིག་ཡིན་པ་རེད་འདུག།