སྲིད་སྐྱོང་ལ་ཕེབས་བསུ།

• 
  2013-04-18

༄༅། །ཁ་སང་ཕྱི་ཚེས་ ༡༧ ཉིན་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕ་རན་སིའི་གྲོས་ཚོགས་གོང་མའི་ནང་ཕེབས་བསུ་ཟབ་རྒྱས་ཞུས་འདུག    སྐབས་དེར་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇིན་ཕ་རན་ཀོ་ཨིས་ཧམ་བྷར་ཊི་(Jean-François Humbert) མཆོག་གིས་སྲིད་སྐྱོང་བློ་བཟང་སེང་གེ་མཆོག་ལ་ཕེབས་བསུ་ཞུས་པས་མ་ཟད། སྲིད་སྐྱོང་མཆོག་ནི་མང་གཙོའི་ལམ་ནས་འོས་འདེམས་བྱུང་བ་ཞིག་ཡིན་སྟབས། བོད་མི་ཡོངས་ཀྱི་ངོ་ཚབ་མཚོན་ཐུབ་པར་བརྟེན།    ཐེངས་འདིར་སྲིད་སྐྱོང་མཆོག་ཕ་རན་སིའི་གྲོས་ཚོགས་གོང་མའི་ནང་མགྲོན་འབོད་ཞུ་ཐུབ་པར་ཧ་ཅང་དགའ་ཚོར་ཆེན་པོ་བྱུང། ཞེས་གསུངས་ཡོད།    གཞན་ཡང་སྐབས་དེར་ཚོགས་གཙོ་མཆོག་གིས་སྲིད་སྐྱོང་མཆོག་ལ་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པས་གྲོས་ཚོགས་གོང་མའི་ཕྱི་འབྲེལ་ལས་དོན་ཚན་པའི་ ནང་ཙམ་མ་ཟད། ཕ་རན་སིའི་གྲོས་ཚོགས་ཀྱི་ཡོ་རོབ་ལས་དོན་ཚན་པའི་ནང་དུའང་བོད་དོན་ལ་རྒྱབ་སྐྱོར་གྱི་གྲོས་ཆོད་བཞག་ཐུབ་པ་བྱུང་ཡོད་སྐོར་སོགས་ཀྱི་ལས་དོན་རྣམས་གསལ་བཤད་གནང་ཡོད། ཕྱོགས་མཚུངས་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་ཡུལ་དེས་འགྲོ་བ་མིའི་ཐོབ་ཐང་དང་རང་དབང། འདྲ་མཉམ། འཆམ་མཐུན། མང་གཙོ་སོགས་ཀྱི་རིན་ཐང་དེ་དག་ལ་གལ་ཆེར་འཛིན་པའི་སྲོལ་རྒྱུན་དེ་རྒྱུན་འཛིན་ལག་བསྟར་གྱིས་བོད་མི་ཚོར་འཕྲད་བཞིན་པའི་དཀའ་ངལ་གྱི་དུས་སྐབས་འདིར་ཆོད་སེམས་བརྟན་པོས་རྒྱབ་སྐྱོར་གནང་བར་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་རྗེས་དྲན་ཞུས་ཡོད་པ་རེད།།