སྙིང་ནད་ཀྱིས་འཆི་རྐྱེན་མང་ཤོས་ཀྱི་ས་ཁུལ།

• 
  2011-02-09

༄༅༎འཛམ་གླིང་དངུལ་ཁང་གིས་དེ་རིང་གཟའ་ལྷག་པའི་ཉིན་སྙན་ཐོ་ཞིག་འདོན་སྤེལ་བྱས་ཡོད་པའི་ནང་ ལྷོ་ཨི་ཤི་ཡའི་ཡུལ་ཁག་ནང་ སྙིང་གི་ནད་གཞི་དང་མངར་ཆའི་ནད་གཞི་ ཁྲག་ཤེད་མཐོ་བའི་ནད་གཞི་སོགས་ནི་མངའ་ཁུལ་དེ་དག་གི་མི་མང་ཚོའི་འཕྲོད་བསྟེན་གྱི་དཀའ་ངལ་ཆེ་ཤོས་ཤིག་ཡིན་པ་དང་ སྤྱིར་ལྷོ་ཨི་ཤི་ཡའི་ཡུལ་ཁག་གི་མིའི་ཚེ་ཚད་ཆ་སྙོམས་བྱས་ན་ ད་ལྟའི་ལོ་དྲུག་བཅུ་རེ་བཞི་ནས་འཕར་ཆ་ཕྱིན་ཡོད་ན་ཡང་ཡུལ་གྲུ་དེ་ཚོའི་ནང་ད་དུང་ཡང་འཕྲོད་བསྟེན་ལ་དཀའ་ངལ་མང་པོ་ཞིག་ལ་གདོང་ལེན་བྱེད་དགོས་ཀྱི་ཡོད་ཅིང་ ནང་གཞི་མང་པོ་ཞིག་དུས་ཡུན་རིང་པོའི་སྨན་བཅོས་འཕྲོད་བསྟེན་དགོས་པ་དང་ ལྷག་པར་དུ་ཕྲུ་གུའི་དུས་ནས་འཕྲོད་བསྟེན་གནས་སྟངས་ཡར་རྒྱས་གཏོང་དགོས་ཀྱི་ཡོད་ཀྱང་ཡུལ་གྲུ་དེ་དག་ནང་བཟའ་ཆའི་མཐུན་རྐྱེན་བཟང་པོ་མེད་པ་སོགས་ཀྱིས་སྙིང་གི་ནད་གཞི་ལྟ་བུའི་ནད་གཞི་མང་པོ་ཞིག་གིས་མིའི་ཚེ་སྲོག་ལ་གནོད་འཚེ་བཟོ་གི་ཡོད་པ་འཁོད་འདུག སྨན་པ་སྐུ་ཞབས་མའེ་ཀལ་ཨེན་གེལ་གའུ་ཡིས་གསུང་ན་ ལྷོ་ཨི་ཤི་ཡའི་ཡུལ་ཁག་གི་མི་མང་ཚོར་ཆུང་དུས་ནས་སྙིང་གི་ནད་གཞིའི་དཀའ་ངལ་ཡོད་པ་དེ་རིགས་བརྒྱུད་ནས་བྱུང་བ་ཡིན་ནམ་ ཡང་ན་ས་གནས་ཀྱི་ཁོར་ཡུག་སོགས་ཀྱི་ཐོག་ནས་བྱུང་བ་ཡིན་རྒྱུ་མཚན་ག་རེ་ཡིན་མིན་ད་ལྟའི་ཆར་གསལ་པོ་ཤེས་རྟོགས་མེད་པ་གསུང་འདུག ཡིན་ནའ་འཛམ་གླིང་དངུལ་ཁང་གིས་ཞིབ་འཇུག་བྱས་པའི་ནང་འཛམ་གླིང་ཡུལ་གྲུ་༥༢ནང་ནས་རྒྱ་གར་དང་ བང་ལ་དེ་ཤི་ བལ་ཡུལ་ པ་ཀི་སི་ཐན་  སི་རི་ལན་ཁ་བཅས་ནང་ སྙིང་གི་ནད་གཞི་ཕོག་ཡས་ཀྱི་ཆ་སྙོམས་ལོ་ཚད་དེ་བཞིན་ལོ་༥༣ཀྱི་གཡས་གཡོན་དུ་ཡིན་པ་དང་ ཡིན་ནའི་འཛམ་གླིང་ཡུལ་གྲུ་གཞན་ནང་ སྙིང་གི་ནད་གཞི་ཕོག་ཡས་ཀྱི་ཆ་སྙོམས་ལོ་ཚད་དེ་བཞིན་ལོ་༥༩ཙམ་ནས་འགོ་ཚུགས་ཀྱི་ཡོད་པ་རེད་