༸གོང་ས་མཆོག་ཨ་རུ་ན་ཅཱལ་དུ་ཕེབས་བསུའི་གྲ་སྒྲིག་ལེགས་གྲུབ།

• 
  2009-11-06

༄༅༎རྒྱ་གར་བྱང་ཤར་ཨ་རུ་ན་ཅཱལ་མངའ་སྡེའི་ནང་ཡོད་པའི་མོན་རྟ་དབང་གི་དགའ་ལྡན་ལྷ་རྩེ་དགོན་པའི་དགེ་འདུན་པ་རྣམས་དང་ཁུལ་དེར་གནས་སྡོད་བྱེད་མཁན་སེར་སྐྱ་མི་མང་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གྲ་རྒྱས་ཞུ་རྒྱུའི་གྲ་སྒྲིག་ཁག་ཧ་ལམ་ལེགས་གྲུབ་ཟིན་ཡོད་འདུག

ཕྱི་ཟླ་བཅུ་གཅིག་པའི་ཚེས་བརྒྱད་ནས་བཅུ་གསུམ་བར་ཉིན་གྲངས་དྲུག་རིང་༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ན་ཅཱལ་མངའ་སྡེའི་ནང་ཞུགས་རྒྱུན་རིང་མོན་རྟ་དབང་དང་སྡེ་རང་ འབུམ་སྡེ་ལ་སོགས་སུ་གསུང་ཆོས་དང་བཀའ་དབང་གནང་རྒྱུ་སོགས་ཆོས་ཕྱོགས་ཀྱི་མཛད་འཆར་དུ་མ་ཞིག་བསྐྱངས་རྒྱུ་ཡིན་འདུག

དེ་བཞིན་རྟ་དབང་དུ་སྨན་ཁང་ཞིག་གི་དབུ་འབྱེད་ཡང་གནང་རྒྱུ་ཡིན་འདུག ༸གོང་ས་༸སྐྱབས་མགོན་ཆེན་པོ་མཆོག་ད་ལན་ཁུལ་དེར་ཕེབས་པ་དེ་ནི་ཕེབས་ཐེངས་ལྔ་པ་དེ་ཡིན་པ་དང་དེ་སྔ་ཕྱི་ལོ་༡༩༥༩དང་༩༦ ༩༧ དེ་བཞིན་༢༠༠༣བཅས་སུ་ཁུལ་དེར་ཞབས་སོར་འཁོད་ཡོད་པ་རེད།

ཐེངས་འདིའི་གཞུང་འབྲེལ་ཕེབས་བསུའི་གྲ་སྒྲིག་ཚོགས་ཆུང་གི་ཚོགས་གཙོ་མཚོན་སྣ་དགོན་རྩ་རིན་པོ་ཆེ་མཆོག་གིས་དགེ་འདུན་པ་བདུན་བརྒྱ་བརྒྱད་བརྒྱ་ཞིག་གིས་ཆོས་ཕྱོགས་ཀྱི་བྱེད་སྒོའི་ལམ་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གྲ་རྒྱས་ཞུ་རྒྱུ་ཡིན་པ་དང་དལྟའི་འཆར་ཕེབས་བསུའི་གྲ་སྒྲིག་ཁག་ཧ་ལམ་ལེགས་གྲུབ་ཟིན་ཡོད་ལུགས་འགྲེལ་བརྗོད་གནང་བཞག མཚོན་སྣ་དགོན་རྩ་རིན་པོ་ཆེ་མཆོག་གིས་གཙོ་བོ་མོན་རྟ་དབང་ཁུལ་གྱི་ཕེབས་བསུའི་གྲ་སྒྲིག་དང་ཉིན་གསུམ་གྱི་གསུང་ཆོས་ཀྱི་གྲ་སྒྲིག་ཐུགས་འགན་གཙོ་བཞེས་གནང་གི་ཡོད་འདུག རྟ་དབང་ནི་༸གོང་ས་སྐུ་ཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོ་མཆོག་གི་འཁྲུངས་ཡུལ་ཡང་རེད། ཕྱི་ལོ་༡༦༨༣ལོར་༸གོང་ས་སྐུ་ཕྲེང་དྲུག་པ་མཆོག་རྟ་དབང་ནས་རིང་ཚད་སྤྱི་ལེ་མི་ཊར་ལྔ་ཙམ་གྱི་ས་ལ་ཡོད་པའི་ཡུར་ལིང་དགོན་དུ་སྐུ་འཁྲུངས་ཡོད་པ་རེད།