པེ་ཅིང་གནམ་བདེ་སྒོ་མོ་ཆེའི་དྲུག་བཞིའི་དོན་རྐྱེན་གྱི་དུས་དྲན་སླེབས་ལ་ཉེ་བ་དང་རྒྱ་ནག་གཞུང་གིས་དམ་དྲག་བྱེད་འགོ་ཚུགས་འདུག
རྒྱ་ནག་གཞུང་གིས་སྤྱི་ལོ་༡༩༨༩ལོའི་གནམ་བདེ་སྒོ་མོ་ཆེའི་དྲག་གནོན་ཁྲོད་འདས་གྲོངས་སུ་གྱུར་བའི་གཉེན་ཉེ་ཚོར་གསར་འགོད་པར་སྐད་ཆ་བཤད་མི་ཆོག་པའི་བཀའ་བཏང་འདུག
- 2024-05-29
-
-
-
Your browser doesn’t support HTML5 audio
དེ་ཡང་༡༩༨༩ ལོར་སློབ་ཕྲུག་གིས་སྣེ་ཁྲིད་པའི་པེ་ཅིང་གནམ་བདེ་སྒོ་མོ་ཆེའི་དམངས་གཙོའི་ལས་འགུལ་ལ་རྒྱ་ནག་གི་དམག་དཔུང་གིས་དྲག་གནོན་བྱས་ནས་མི་ལོ་༣༥་འཁོར་བའི་དུས་དྲན་སླེབས་ལ་ཉེ་བ་དང་། རྒྱ་ནག་གཞུང་གིས་སྐབས་དེར་པེ་ཅིང་གནམ་བདེ་སྒོ་མོ་ཆེའི་དམངས་གཙོའི་ལས་འགུལ་ལ་དྲག་གནོན་སྐབས་རྐྱེན་ལམ་དུ་བཏང་བའི་འདས་པོའི་གཉེན་ཉེ་སྤུན་མཆེད་ཚོར་གསར་འགོད་པར་སྐད་ཆ་བཤད་མི་ཆོག་པའི་བཀའ་རྒྱ་བཏང་ཡོད་པ་དང་། དེ་བཞིན་སྐབས་དེར་དམངས་གཙོ་དོན་གཉེར་བ་ཚོས་སྤེལ་བའི་དམངས་གཙོའི་ལས་འགུལ་ནང་ཞུགས་མྱོང་བའི་གཞོན་སྐྱེས་ཚོའི་ཕ་མ་རྒན་གྲས་ཚོར་རྒྱལ་ཁབ་ཀྱི་བདེ་འཇགས་བརྟན་ལྷིང་སྲུང་སྐྱོབ་བྱ་རྒྱུར་རྒྱལ་ཁབ་ཁྱོན་ཡོངས་ནང་དམག་དོན་གྱི་ལས་འགུལ་སྤེལ་ཡོད་ཅེས་བཤད་ཡོད་ལུགས་ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་གནས་ཚུལ་ཤེས་རྟོགས་བྱུང་འདུག
སྤྱིར་རྒྱལ་སྤྱིའི་སྤྱི་ཚོགས་ཀྱིས་དགག་པ་དང་སྐྱོན་བརྗོད་བྱས་མིན་ལ་མ་བལྟོས་པར་རྒྱ་ནག་གཞུང་གིས་རྒྱལ་ཁབ་ནང་བདེ་འཇགས་བརྟན་བརླིང་སྲ་བརྟན་ཡོང་རྒྱུར་དམིགས་པ་ཡིན་ཁུལ་གྱིས་ཆབ་སྲིད་དང་འབྲེལ་བའི་གནད་འགག་གི་དུས་ཚིགས་སྐབས། རྒྱ་ནག་གཞུང་གི་འཛིན་སྐྱོང་དཔོན་རིགས་ཚོར་དཀའ་ངལ་བཟོ་མཁན་ཡིན་པར་དོགས་པ་བྱེད་སའི་མིའི་རིགས་ཀྱིས་ཕྱི་ཕྱོགས་སུ་སྐད་ཆ་བཤད་རྒྱུ་འམ་ཡང་ན་ལས་དོན་ག་རེ་བྱས་པ་ཡིན་ཡང་དེ་ཚོའི་ཐོག་སྟངས་འཛིན་ནན་པོ་བྱེད་ཀྱི་ཡོད་པ་རེད།
གསར་འགོད་པ། དབྱངས་སྒྲོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།