བོད་རང་བཙན་གྱི་ཚོགས་འདུ།

• 
  2013-02-13

༄༅།    །དེ་རིང་ཕྱི་ཚེས་༡༣ ཉིན་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་དང་། ལྡི་ལི་བོད་སྒར་བསམ་ཡས་གླིང་དང། རོ་ཧི་ནི་ས་གནས་གཞོན་ནུ་གཉིས་ཀྱིས་མཐུན་འགྱུར་འོག ༧རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གྱི་གནས་བབ་གསལ་བསྒྲགས་བསྐྱངས་ནས་ལོ་༡༠༠ འཁོར་བའི་དུས་དྲན་སྲུང་རྩི་དང་འབྲེལ།    རྒྱལ་སྤྱིའི་བོད་རང་བཙན་ཚོགས་ཆེན་རྒྱས་པའི་སྔོན་འགྲོའི་ཚོགས་འདུ་ཐེངས་བཞི་པ་དེ། རྒྱ་གར་གྱི་རྒྱལ་ས་ལྡི་ལི་གསར་པའི་གཱན་དྷི་ཞི་བདེའི་ཐེབས་རྩ་ཁང་གི་ཚོགས་ཁང་དུ་ཚོགས་ཡོད་པ་རེད།
སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་ཀྱིས་ཚོགས་འདུ་ངོ་སྤྲོད་དང་འབྲེལ་བའི་གསུང་བཤད་གནང་སྐབས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་གྱི་གྲོས་ཆོད་དགོངས་དོན་བཞིན།    རྒྱལ་སྤྱིའི་རང་བཙན་ཚོགས་ཆེན་རྒྱས་པ་ཞིག་ཚོགས་རྒྱུ་གཏན་འཁེལ་བྱུང་བ་དང་། ཚོགས་ཆེན་རྒྱས་པ་དེའི་སྔོན་འགྲོའི་ཚོགས་འདུ་ཞིག་སུད་སི་དང། ཐའེ་ཝན། ཨ་རི་བཅས་སུ་ཚོགས་ཤིང། ཐེངས་བཞི་པ་དེ་ད་ལྟའི་ཚོགས་འདུ་འདི་ཉིད་ཡིན་པའི་སྐོར་དང། རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གྱི་གནས་བབས་གསལ་བསྒྲགས་བསྐྱངས་པའི་དུས་དྲན་སྲུང་བརྩི་ཞུ་བར་དོན་སྙིང་ཆེན་པོ་གསུམ་ཡོད་པར་ངོས་འཛིན་ཞུ་བཞིན་ཡོད། དང་པོ་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རྒྱལ་ཁབ་དང་བོད་མི་རིགས་ལ་བཞག་པའི་རླབས་ཆེན་གྱི་མཛད་རྗེས་ལ་སྙིང་ནས་བཀའ་དྲིན་རྗེས་དྲན་ཞུ་བ་དང། གཉིས་པ་བོད་རང་བཙན་གྱི་གནས་བབས་ཁུངས་སྐྱེལ་གྱི་ཆ་ནས། གསུམ་པ་དེ་ང་ཚོའི་རྒྱལ་ཁབ་ཀྱི་དགྲ་བོ་རྒྱ་དམར་གཞུང་གི་བཙན་གནོན་ལ་ངོ་རྒོལ་དང་ང་ཚོས་རང་བཙན་འཐབ་རྩོད་མུ་མཐུད་དུ་བྱ་རྒྱུ་ཡིན་པ་གསལ་སྟོན་དང་འབྲེལ། མ་འོངས་པར་བོད་རང་བཙན་འཐབ་རྩོད་བྱེད་ཕྱོགས་ལ་ལེགས་བཅོས་བྱ་རྒྱུ་བཅས་ཀྱི་ཆེད་དུ་དམིགས་ཡོད་ཅེས་སོགས་གསུང་བཤད་གནང་ཡོད་པ་རེད།
དེ་རིང་དང་སང་ཉིན་བཅས་ཉིན་གྲངས་གཉིས་ཀྱི་རིང་སྐོང་ཚོགས་གནང་བཞིན་པའི་ཚོགས་འདུ་དེའི་བརྗོད་གཞི་གཙོ་བོ། ༡༽ བོད་རང་བཙན་སླར་གསོའི་དགོས་དམིགས་གསལ་སྟོན་དང། གདེང་སྤོབས་གོང་མཐོར་གཏོང་ཐབས་དང། ༢༽ བོད་རང་བཙན་སླར་གསོའི་འཆར་གཞི་དང་ཐབས་ལམ། གཉིས་ཡིན་པ་དང། རྒྱལ་སྤྱིའི་རང་བཙན་ཚོགས་ཆེན་རྒྱས་པ་དེ་ལོ་འདིའི་ཕྱི་ཟླ་ལྔ་པའི་ནང་འཚོག་རྒྱུ་ཡིན་འདུག།