རྒྱ་རིཊ་སློབ་ཕྲུག་ཚོས་བརྟག་དཔྱད་མེད་པར་ནེ་ཙོ་ལྟ་བུ་མ་གནང་རོཊ།
རྒྱ་རིཊ་སློབ་ཕྲུག་ཚོས་༧གོང་ས་མཆོག་ལ་དགའ་བསུ་འོས་བ་ལས་བརྟག་དཔྱད་མེད་པར་གུང་ཁྲན་ཚོཊ་པའི་ཁར་ཉན་ནས་ནེ་ཙོ་ལྟ་བུ་མ་གནང་རོཊ་ཟེར།
-
2017-06-12 -
-
-
Your browser doesn’t support HTML5 audio
ཨ་རིའི་(California)མངའ་སྡེའི་(San Diego)གཙུག་ལག་སློབ་གྲྭའི་རྒྱ་རིགས་སློབ་མ་ཚོས་༧གོང་ས་ཏཱ་ལའི་བླ་མ་མཆོག་སློབ་གྲྭ་དེའི་ནང་གདན་ཞུ་གནང་པའི་ཐད་དགའ་བསུ་བྱེད་དགོས་པ་ལས་བརྟག་དཔྱད་མེད་པར་རྒྱ་ནག་དམར་ཤོག་ཚོགས་པའི་བཀའ་ལ་ཉན་ནས་ནེ་ཙོ་ལྟ་བུ་མ་བྱེད་རོགས་ཅེས་རྒྱ་རིགས་དམངས་གཙོ་དོན་གཉེར་བ་དང་མཁས་དབང་Yang Jianli གིས་གསུངས་འདུག
དེ་ཡང་Times of San Diego འམ་San Diegoདུས་དེབ་གསར་ཁང་གིས་སྤྱི་ཚེས་༡༡་ཉིན་རྒྱ་རིགས་མཁས་དབང་Yang Jianli གིས་བྲིས་པའི་དཔྱད་རྩོམ་ཞིག་འགྲེལ་སྤེལ་བྱས་ཡོད་ཅིང་། དེའི་ནང་སྐུ་ཞབས་Yang Jianli གིས་རིང་མིན་སྤྱི་ཚེས་༡༧་ཉིན་འཚོགས་རྒྱུ་ཡིན་པའི་California མངའ་སྡེའི་San Diego གཙུག་ལག་སློབ་གྲྭའི་སློབ་ཕྲུག་བསླབ་པ་མཐར་སོན་གྱི་མཛད་སྒོའི་ཐོག་གསུང་བཤད་གནང་མཁན་༧གོང་ས་ཏཱ་ལའི་བླ་མ་མཆོག་གདན་ཞུ་གནང་པའི་ཐད་སློབ་གྲྭ་དེའི་སློབ་མ་ཚོས་ངོ་རྒོལ་བྱས་པའི་གནས་ཚུལ་བྱུང་ཡོད། ཡིན་ནའང་རང་ཉིད་རྒྱ་རིགས་ཞིག་ཡིན་པའི་ཆ་ནས་རྒྱ་རིགས་སློབ་མ་ཚོའི་བྱ་སྤྱོད་དེའི་ཐད་ལ་ཧ་ཅང་བློ་ཕམ་བྱུང་བ་དང་། དེ་ནི་ཁོང་ཚོས་ངོ་རྒོལ་བྱས་པ་དེ་མིན་ཞིང་། རྒྱ་གཞུང་གི་དམག་ཤོག་ཚོགས་པས་ཅི་གསུང་བཀའ་ལྟར་སྒྲུབ་བཞིན་པ་དེ་ཡིན་ཞེས་དང་། ཨ་རིའི་ནང་སློབ་སྤྱོང་གི་གོ་སྐབས་དང་བསྟུན་རྒྱ་ནག་ནང་དང་མ་འདྲ་བ་ཡུལ་དེའི་སྨྲ་བརྗོད་རང་དབང་དང་གནས་ཚུལ་རང་དབང་ལོངས་སྤྱོད་དང་ངོས་ཟིན་བྱེད་འོས། ཁྱེད་ཚོའི་ངོས་ནས་༧གོང་ས་ཏཱ་ལའི་བླ་མ་མཆོག་གིས་འགྲོ་བ་མིའི་བདེ་དོན་རིགས་ལ་མཛད་རྗེས་ག་ཚད་བསྐྱངས་ཡོད་པ་དཔྱད་ཞིབ་ཐུབ་མེད་ངེས་རེད་འདུག་ཅེས་འཁོད་འདུག ཡང་ཁོང་གིས་རྒྱ་རིགས་སློབ་ཕྲུག་དེ་དག་གིས་གཞི་རྩ་༧གོང་ས་ཏཱ་ལའི་བླ་མ་མཆོག་ལ་ངོ་རྒོལ་ཞུས་དོན་ནི། ཁོང་རྒྱ་ནག་ནས་བོད་ཁ་བྲལ་གཏོང་ཐབས་བྱེད་མཁན་གྱི་ཁ་བྲལ་བ་ཞིག་ཡིན་པ་ཡིད་ཆེས་བྱེད་བཞིན་པ་སྦྲགས་དེ་སྔའི་བོད་ཀྱི་བྲན་གཡོིག་ལམ་ལུགས་དང་འབྲེལ་བ་ཆགས་སྡོད་ཡོད་པ་འདྲ་བོ་འདུག ཡིན་ནའང་༧གོང་ས་ཏཱ་ལའི་བླ་མ་མཆོག་ནི་ཁ་བྲལ་བ་ཞིིག་མིན། ངོས་རང་ལོ་ངོ་ཉི་ཤུ་ལྷག་རིང་༧གོང་ས་མཆོག་དང་ངོ་ཤེས་ཆགས་ཡོད་པ་མ་ཟད། ཕྱི་ནང་གི་ཚོགས་འདུ་འདྲ་མིན་ཏོག་༧གོང་ས་མཆོག་གི་བྱམས་བརྩེའི་མཛད་རྗེས་དངོས་སུ་མཐོང་པའི་གོ་སྐབས་བྱུང་། ཁོང་གིས་རྒྱ་གཞུང་གི་མངའ་འོག་ཏུ་བོད་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་གནང་བཞིན་ཡོད་ཅེས་དང་། རྒྱལ་སྤྱིའི་ནང་ཚང་མས་ངོས་ལེན་དང་གུས་བརྩི་ཞུ་གི་ཡོད་པ་མ་ཟད་ཁོང་ལ་ནོ་བེལ་ཞི་བདེའི་གཟེངས་རྟགས་ཀྱང་ཐོབ་ཡོད་པ་རེད།
དེར་བརྟེན་ཨ་རིའི་ནང་ཡོད་པའི་རྒྱ་རིགས་སློབ་ཕྲུག་ཚོས་རང་དབང་དང་མང་གཙོའི་རྒྱལ་ཁབ་འདི་ལྟབུའི་ནང་སླེབས་ཡོད་དུས། དེ་དག་ལོངས་སུ་སྤྱད་ནས་རང་ཉིད་ཀྱི་རྣམ་དཔྱོད་དང་བསམ་བློ་གུ་ཡངས་ཀྱི་ཐོག་ནས་ལེགས་ཉེས་དབྱེ་འབྱེད་བྱེད་ཐུབ་པ་ཞིག་དགོས་པ་ལས་རྒྱ་ནག་ནང་གུང་ཁྲན་ཚོགས་པས་གང་བཤད་དེར་བརྟག་དཔྱད་མེད་པར་ནེ་ཙོས་ལད་ཟློས་བྱེད་པ་ལྟར་འགྲོ་རྒྱུ་མེད་ལུགས་ཅེས་བཀོད་ཡོད་པ་རེད།
གསར་འགོད་པ་གུ་རུ་ཆོས་སྐྱིད་དང་། རིག་འཛིན་ཆོས་སྒྲོན།