Dawei Watch သတင်းဌာနက သုံးဦး ဖမ်းဆီးခံရ
Dawei Watch သတင်းဌာနက သတင်းထောက် ကိုဇော်နဲ့ မမိုးမြင့် တို့ကို တွေ့ရစဉ်
Photo: Citizen Journalist
ထားဝယ်အခြေစိုက် Dawei Watch သတင်းဌာနက သတင်းထောက် ကိုဇော်၊ မမိုးမြင့်နဲ့ ရုံးဝန်ထမ်း ကိုသားကြီး တို့ဟာ ဇန်နဝါရီလ ၁၈ ရက် မနေ့က ညက ဖမ်းဆီးခံလိုက် ရပါတယ်။
မနေ့ည ၁၁ နာရီလောက်အချိန်မှာ မမိုးမြင့်နေထိုင်တဲ့ ထားဝယ်မြို့ တလိုင်းထိန် ရပ်ကွက်ထဲကို စစ်ကောင်စီ တပ်သားတွေက အင်အားအလုံးအရင်းနဲ့ ဝင်ဖမ်းခဲ့တာလို့ လုံခြုံရေးအရ အမည်မဖော်လိုတဲ့ ဒေသခံ မျက်မြင်တစ်ဦးက RFA ကို ပြောပါတယ်။
"မမိုးမြင့်ကို လာဖမ်းတဲ့ပုံစံက သတင်းအတိအကျရလို့ လာဖမ်းတဲ့ပုံစံပါ။ ပြေးချိန်တောင် မရလိုက်ဘူး။ နောက်ဖေးလမ်းကြားတွေရော လမ်းတွေရော အကုန်ပိတ်ဖမ်းတာ။ မြင်ရတဲ့ ကျနော်တို့တောင် ကြောက်မိတယ်။ နောက်နှစ်ယောက်ကို ကျတော့ ထားဝယ်မြို့၊ ဝဲကျွန်းရပ်ကွက်မှာရှိတဲ့ ဝန်ထမ်းအိမ်ယာမှာ ဖမ်းသွားတာ"
သူတို့ကို ဘာကြောင့် ဖမ်းဆီးတယ်၊ ဘယ်မှာထိန်းသိမ်းထားတယ်ဆိုတာကို မသိရသေးကြောင်းလည်း သူက ပြောပါတယ်။
ထားဝယ်မြို့မှာ ဒေသအတွင်း မီဒီယာတွေ အားနည်းတဲ့အတွက် အခုလို ဒေသခံ သတင်းထောက်တွေ အဖမ်းခံရတာက ဒေသအတွက် ဆုံးရှုံးမှုတစ်ခု ဖြစ်လာမှာ စိုးရိမ်ကြောင်းလည်း သူက ဆက်ပြောပါတယ်
မြန်မာနိုင်ငံမှာ စစ်တပ်က အာဏာသိမ်းချိန်ကနေ အခုအထိ တနင်္သာရီတိုင်းအတွင်းမှာ ဖမ်းဆီးခံထားရသူ ၉၁၃ ဦးအထိ ရှိလာနေတယ်လို့ ဒေသတွင်းက အချက်အလက်တွေကို မှတ်တမ်းပြုစုနေတဲ့ Bee Tenasserim အဖွဲ့ရဲ့ စာရင်းတွေမှာ ဖော်ပြထားပါတယ်။