မြန်မာနဲ့ ကုန်သွယ်မှု မတိုးမြှင့်သေးဖို့ နိုင်ငံတကာ လစ်ဘရယ်ညီလာခံ ဆုံးဖြတ်

• 
  2011-06-18

ဒီညီလာခံကို ဇွန်လ ၁၆ ရက်ကနေ ၂ဝ ရက်နေ့အထိ ဖိလစ်ပိုင်နိုင်ငံ မနီလာမြို့မှာ တကမ္ဘာလုံးက လစ်ဘရယ်ပါတီ ၆၄ ပါတီက ကိုယ်စားလှယ်တွေ တက်ရောက်ပြီး ‘လူ့အခွင့်အရေးနဲ့ ကုန်သွယ်ရေး’ ဆိုတဲ့ ခေါင်းစဉ်နဲ့ ဆွေးနွေးနေကြတာပါ။

မြန်မာနိုင်ငံမှာ အသွင်ကူးပြောင်းရေး ကာလကို သွားနေပြီလား ဆိုတဲ့ မနေ့က ဆွေးနွေးချက်နဲ့ ပတ်သက်ပြီး ညီလာခံ တက်ရောက်နေတဲ့ ပြည်ထောင်စုမြန်မာနိုင်ငံ အမျိုးသားကောင်စီ ကိုယ်စားလှယ် ဦးညိုအုန်းမြင့်က

“ဗမာပြည်မှာ စီးပွားရေး ရင်းနှီးမြုပ်နံှမှုတွေ ထင်သာမြင်သာ မရှိတာတို့၊ ဥပဒေမဲ့ ဖြစ်နေတဲ့ ပြဿနာတွေ အပေါ်မှာ ပြန်ပြီးတော့ သုံးသပ်ဖို့ လိုပါတယ်။ ဗမာပြည်မှာ ရင်းနှီးမြုပ်နှံမှုတွေ လုံးဝ မလုပ်ဘူးဆိုတဲ့ အနေအထားမျိုး ကျနောတို့ ခေါင်းမာပြီး ငြင်းနေတာ မဟုတ်ပါဘူး။ ပြည်သူတွေ အလုပ်သမားတွေ တကယ် အကျိုးရှိရမယ် ဆိုတဲ့ ရှုထောင့်ကနေ ကျနော်တို့ ချဉ်းကပ်တာ ဖြစ်ပါတယ်။ ဒါ့ကြောင့် ဗမာပြည်မှာ လုပ်ချင်တယ်ဆိုရင် ဒီမိုကရေစီနဲ့ ပွင့်လင်းမှုနဲ့ Rule of Law ရှိဖို့ အဓိက လိုအပ်တယ်ဆိုတဟာ နိုင်ငံတိုင်းက လက်ခံနိုင်တဲ့ အချက်လို့ ထင်ပါတယ်”

ငါးရက်ကြာ ကျင်းပနေတဲ့ နိုင်ငံတကာ လစ်ဘရယ်ညီလာခံကို ထိုင်း-မြန်မာနယ်စပ် အခြေစိုက် ပြည်ထောင်စုမြန်မာနိုင်ငံ အမျိုးသားကောင်စီ NCUB က အတွင်းရေးမှူး ဦးမောင်မောင်၊ ဦးမိုးဇော်ဦးနဲ့ ဦးညိုအုန်းမြင့်တို့အပြင် အမျိုးသားဒီမိုကရေစီ အဖွဲ့ချုပ် လွတ်မြောက်နယ်မြေ ကိုယ်စားလှယ်အဖြစ် ဒေါက်တာအေးကျော်တို့ တက်ရောက်နေပါတယ်။

မြန်မာကိုယ်စားလှယ်အဖွဲ့ဟာ ဖိလစ်ပိုင်နိုင်ငံက လက်ရှိ အာဏာရ လစ်ဘရယ်ပါတီ အထွေထွေ အတွင်းရေးမှူး Joseph Emilio Abaya နဲ့ တွေ့ဆုံပြီး မြန်မာ့ ဒီမိုကရေစီရေးမှာ ဖိလစ်ပိုင်နိုင်ငံ အနေနဲ့ ပိုမို ပါဝင် ကူညီနိုင်ရေး အတွက် ဆွေးနွေးခဲ့ကြောင်းလည်း သိရပါတယ်။

လစ်ဘရယ်ညီလာခံ အကြောင်းကို အာအက်ဖ်အေ ဦးဝင်းနိုင်က ဦးညိုအုန်းမြင့်နဲ့ ဆက်သွယ် မေးမြန်းထားတာကို နားဆင်နိုင်ပါတယ်။