ဒေါ်အောင်ဆန်းစုကြည်အမှု လျှောက်လဲဖို့ ရက်ချိန်းပေး

ဒီကြေညာချက်ကို ရန်ကုန် ဗဟိုတရားရုံးရှေ့ကြေငြာသင်ပုံးမှာ မနေ့က ကပ်ထားတာပါ။ ဒေါ်အောင်ဆန်းစုကြည်ရဲ့ ရှေ့နေ ဦးဉာဏ်ဝင်းကတော့ လွန်ခဲ့တဲ့ သုံးလေးလ လောက်က တင်ထားတဲ့ အယူခံလွှာအတွက် အခုမှ ဗဟိုတရားရုံးက ကြေညာချက် ထုတ်တာ ဖြစ်တယ်လို့ဆိုပါတယ်။

အမှုကို တင်ထားတာ ကြာပြီဖြစ်ကြောင်း၊ ကြေညာချက် ကပ်ထားတယ်လို့ ကြားရတဲ့အတွက် သွားရောက်ကြည့်ရာမှာ အောက်တိုဘာလ (၇) နေ့က ကပ်ထားတာ တွေ့ခဲ့ရကြောင်း ဦးဉာဏ်ဝင်းက ပြောပါတယ်။

ဒေါ်အောင်ဆန်းစုကြည်ဟာ လာမဲ့ နိုဝင်ဘာလ ၁၃ ရက်နေ့မှာ နေအိမ် အကျယ်ချုပ် လွတ်ရက်စေ့မှာ ဖြစ်ပါတယ်။ ဒါကြောင့် တရားရုံးမှာ ထပ်ပြီးလျှောက်လဲဖို့ လိုပါသလားလို့မေးတဲ့ အခါမှာ ဦးဉာဏ်ဝင်းက-

"အယူခံတယ်ဆိုတာ ဒေါ်အောင်ဆန်းစုကြည် အချုပ်က လွတ်ဖို့ အယူခံတယ်လို့ ပြောရင် ကျနော်တို့ သဘောမတူပါဘူး။ ဒေါ်အောင်ဆန်းစုကြည်ဟာ ဒီအမှုမှာ လုံး၀ အပြစ်မရှိဘူးဆိုတဲ့ အချက်ကို အယူခံတာပါ။ အဲဒီတော့ ၁၃ ရက်နေ့မှာ အချုပ်က လွတ်သည် ဖြစ်စေ၊ မလွတ်သည် ဖြစ်စေ ဒီအမှု သဘောကတော့ ဆက်သွားရမှာပါ။"

လာမဲ့ အောက်တိုဘာလ ၁၈ ရက်နေ့မှာ ဒေါ်အောင်ဆန်းစုကြည်နဲ့ အတူနေ ဒေါ်ခင်ခင်ဝင်း နဲ့ ဒေါ်ဝင်းမမတို ့အတွက်လည်း ရှေ့နေတွေက အပြစ်မရှိကြောင်း လျှောက်လဲချက်ပေးမှာ ဖြစ်သလို တရားလိုဘက်ကလဲ  အပြန်အလှန် လျှောက်လဲမှာ ဖြစ်ပါတယ်။ အဲ့ဒီနောက် ဗဟိုတရားရုံး တရားသူကြီးက အဆုံးအဖြတ် ပေးမှာ ဖြစ်ပါတယ်။ ထုံးစံအရ နှစ်ဘက်ရှေ့နေများ အပြန်အလှန် လျှောက်လဲချက်ပေးအပြီး ၂ ပတ် အကြာမှာ တရားသူကြီးက အဆုံးအဖြတ်ပေးတာ ဖြစ်ပါတယ်။