ဗဟိုအဆင့် ဖဲကြိုးပြာ လှုပ်ရှားမှု ဆွေးနွေးပွဲ

• 
  2016-08-14

ကျန်းမာရေးဝန်ထမ်းတွေကို မသက်ဆိုင်တဲ့ ဝန်ကြီးဌာနတွေမှာ နေရာပြောင်းရွှေ့တာဝန်ပေးတာတွေ မလုပ်ဖို့နဲ့ ကျန်းမာရေးဝန်ထမ်းတွေရဲ့ အခွင့်အလမ်း အပြည့်အဝရရှိဖို့တို့ကို ပြည်သူ့ကျန်းမာရေးဝန်ထမ်း ၁ဝဝ ကျော်က ဒီနေ့ ကြေညာချက်ထုတ်ပြန်တောင်းဆိုလိုက်ပါတယ်။

နေပြည်တော်က Sky Palace ဟိုတယ်မှာ ဗဟိုအဆင့် ဖဲကြိုးပြာလှုပ်ရှားမှုဆွေးနွေးပွဲကို ၂ ရက်ကြာ ကျင်းပခဲ့ပြီး ဒီနေ့ နောက်ဆုံးနေ့မှာ ကြေညာချက်ထုတ်ပြန်လိုက်တာဖြစ်တယ်လို့ ပြည်သူ့ကျန်းမာရေး ဝန်ထမ်းတွေရဲ့ ဗဟိုအဆင့်ဖဲကြိုးပြာလှုပ်ရှားမှုအဖွဲ့ ဒုတိယ ဥက္ကဌ ဦးခိုင်ဦးက ပြောပါတယ်။

"ရာထူးအခွင့်အလမ်းတွေ ကိစ္စပေါ့နော်၊ ပညာရေးအခွင့်အလမ်းများကိစ္စ နောက်တစ်ခါကျတော့ အပြောင်းအရွှေ့ မူဝါဒကိစ္စပေါ့နော်၊ နောက်ဆုံးကတော့ ပြည်သူ့ကျန်းမာရေးကိုလုပ်နေတဲ့ ကျန်းမာရေးဝန်ထမ်းတွေအားလုံးရဲ့ လုပ်ငန်းတွေတချို့ကိစ္စတွေမှာ ဥပဒေအရ အကာအကွယ်ပေးမှုတို့ လိုအပ်တဲ့အချက်တွေရှိပါတယ်၊ အဲ့ဒီတော့ ဥပဒေအရအကာအကွယ်ပေးဖို့ကိစ္စရပ်ဆိုပြီး ကြေညာချက် အနေနဲ့ ထွက်ပေါ်လာခဲ့တာပါ"

အဲ့ဒီတွေ့ဆုံပွဲကို အနယ်နယ်အရပ်ရပ်က ကျန်းမာရေးဝန်ထမ်းတွေ တက်ရောက်ခဲ့ပြီး တောင်းဆိုချက်တွေကို ကျန်းမာရေးနဲ့ အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးထံ တင်ပြတောင်းဆို မှာဖြစ်ပါတယ်။

ပြည်သူ့ကျန်းမာရေးဝန်ထမ်းတွေဟာ လူထုရဲ့အခြေခံကျန်းမာရေးကဏ္ဍကို နှစ်ပေါင်းများစွာ လုပ်ဆောင်ခဲ့ပေမယ့် အသိအမှတ်ပြုမခံရတာ၊ စီမံခန့်ခွဲမှုလွဲချော်တဲ့ပြဿနာတွေကို ရင်ဆိုင်ကြုံတွေ့ခဲ့ရတယ်လို့ ပြောပါတယ်။

လတ်တလောမှာ ပြည်သူ့ကျန်းမာရေးဝန်ထမ်း ၄ဝ ကျော်ကို အကျဉ်းဦးစီးဌာနကို ပြောင်းရွှေ့တာဝန်ပေးတာ၊ ဇူလိုင်လနောက်ဆုံးပတ်က ပြည်သူ့ကျန်းမာရေး ဝန်ထမ်းတစ်ဦးကို ဆေးခန်းဖွင့်လို့ဆိုပြီး ရဲကဖမ်းဆီးထိန်းသိမ်း ခဲ့တာတွေ ရှိနေတယ်လို့လည်း ဆွေးနွေးပွဲ တက်ရောက်လာသူတွေက ပြောပါတယ်။

ကျန်းမာရေးဝန်ထမ်းမဟုတ်သူတွေကို ကျန်းမာရေးမှူးအဆင့် တာဝန်မပေးဖို့ တောင်းဆိုတဲ့ ဖဲကြိုးပြာ လှုပ်ရှားမှုတွေကို ရန်ကုန်၊  ရခိုင် စတဲ့ တိုင်းနဲ့ပြည်နယ် အတော်များများမှာ ပြုလုပ်ခဲ့ပါတယ်။