နိုင်ငံသားကတ်တွေကို Smart Card ပြောင်းမည်

• 
  2016-08-22

နိုင်ငံသားစိစစ်ရေး(မှတ်ပုံတင်)ကတ်တွေကို Smart Card ပုံစံပြောင်းလဲဖို့ အလုပ်သမား၊ လူဝင်မှုကြီးကြပ်ရေး နဲ့ ပြည်သူ့အင်အားဝန်ကြီးဌာနက စဉ်းစားနေကြောင်း တာဝန်ရှိသူတစ်ဦးက ပြောပါတယ်။

အဲဒီလိုပြောင်းလဲလိုက်ရင် မှတ်ပုံတင်အတုတွေ ပျောက်ကွယ်သွားနိုင်တယ်လို့ အလုပ်သမား၊ လူဝင်မှုကြီးကြပ်ရေး နဲ့ ပြည်သူ့အင်အားဝန်ကြီးဌာနက အမြဲတမ်းအတွင်းဝန် ဦးမြင့်ကြိုင်က ပြောပါတယ်။

"ဒါတွေက နိုင်ငံတကာမှာ E- Identity ကတ်တွေလုပ်နေတာဆိုတော့ ထည့်သွင်းစဉ်းစားနေတဲ့ အနေအထား ပဲရှိပါတယ်။ တရားဝင် လုပ်မယ်ဘာမယ် ဆုံးဖြတ်ချက်ချထားတဲ့ အနေအထား မရှိသေးပါဘူး။ လေ့လာထားမှု အရတော့ အခုတော့ ကျနော်တို့လက်ဗွေပဲ သုံးတာပေါ့နော် E- Identity ကတ်ဆိုလို့ရှိရင် နှစ်မျိုးဖြစ်သွားမယ်၊ လက်ဗွေရော မျက်စိရော အချက်အလက်ကို ကျနော်တို့ ယူရင်ယူမယ် ကျန်တာတော့ ဘာမှပြောင်းလဲဖို့မရှိဘူး။ လက်ရေးနဲ့ဖြည့်တဲ့ ကတ်ထက် E- Identity ကတ်ဆိုရင် အတုအပတွေ နည်းသွားမယ်"

စမတ်ကတ်ပြောင်းလဲဖို့အတွက် နည်းပညာကုမ္ပဏီတွေက လာရောက်မိတ်ဆက်တာတွေ ဆောင်ရွက်နေပြီး ဝန်ကြီးဌာနဘက်က လေ့လာနေ ဆဲဖြစ်တယ်လို့ ပြောပါတယ်။

မြန်မာနိုင်ငံမှာ သန်းခေါင်စာရင်းကောက်ခံမှုအရ လူဦးရေ ၅၁ သန်းရှိပြီး နိုင်ငံသား စိစစ်ရေး(မှတ်ပုံတင်)ကတ် ကိုင်ဆောင်ထားသူ ၃၈ သန်းရှိပါတယ်။