မြန်မာစစ်တပ်အရေးယူရေး ကန် လွှတ်တော်ကော်မတီ ဥက္ကဋ္ဌ ကြိုဆို

• 
  2018-05-25

အမေရိကန် အောက်လွှတ်တော် ကိုယ်စားလှယ်တွေက မြန်မာ့တပ်မတော်အပေါ် အရေးယူရေးအတွက် အမျိုးသား ကာကွယ်ရေးဆိုင်ရာ ခွင့်ပြုမှုဥပဒေ (NDAA) မှာ တိုးချဲ့ပြဌာန်းချက်တွေထည့်သွင်းဖို့ အင်္ဂါနေ့က မဲခွဲဆုံးဖြတ်ခဲ့တာနဲ့ စပ်လျှဉ်းပြီး အောက်လွှတ်တော် နိုင်ငံခြားရေးရာကော်မတီ ဥက္ကဋ္ဌ Ed Royce အက်ဒ်ရိုက်စ် က ကြေညာချက် တစ်စောင် မနေ့က ထုတ်ပြန်ကြိုဆိုလိုက်ပါတယ်။

အောက်လွှတ်တော်က သဘောတူလိုက်တဲ့ အဲဒီ ၂ဝ၁၉ ဘဏ္ဏာရေးနှစ်အတွက်ခွင့်ပြုမယ့် NDAA ကာကွယ်ရေး ဥပဒေပြင်ဆင်ချက်မှာ မြန်မာစစ်တပ်အရာရှိတွေအပေါ် ပိတ်ဆို့အရေးယူမှုအသစ်တွေပါဝင်သလို အမေရိကန် စစ်တပ်နဲ့ ပူးတွဲလေ့ကျင့်မှုတွေမှာ မြန်မာတပ်ဖွဲ့တွေ ပါဝင်ရေးကို ပိတ်ပင်ထားကြောင်း၊ မြန်မာလုံခြုံရေး တပ်ဖွဲ့တွေ ဟာ ရခိုင်ပြည်နယ်မှာ ရိုဟင်ဂျာလူနည်းစုတွေကို ချေမှုန်းခဲ့ကြောင်း၊ ရွာတွေမီးရှို့ခံရပြီး လူတွေ ထောင်နဲ့ချီ သတ်ဖြတ်ခံရသလို လူ ၇ သိန်းကျော် ထွက်ပြေးခဲ့ရကြောင်း၊ ဒါကြောင့် အခုလို မြန်မာ့တပ်မတော်နဲ့ သက်ဆိုင်ရာ အရာရှိတွေအပေါ် အရေးယူအပြစ်ပေးဖို့ အောက်လွှတ်တော်က ဆုံးဖြတ်နိုင်ခဲ့ခြင်းအတွက် ကျေနပ်အား ရမိကြောင်း စသဖြင့် အက်ဒ်ရိုက်စ်ရဲ့ ကြေညာချက်မှာ ဖေါ်ပြထားပါတယ်။