နမ့်ဖတ်ကာတိုက်ပွဲအတွင်း အရပ်သား ၁၈ ဦး သေဆုံးကြောင်း TWO ပြော
2024.01.25
ရှမ်းပြည်နယ်မြောက်ပိုင်း ကွတ်ခိုင်မြို့နယ် နမ့်ဖတ်ကာကျေးရွာမှာ စစ်ကောင်စီနှင့် KIA တို့ တိုက်ပွဲကြောင့် ထွက်ပြေးတိမ်းရှောင်နေကြသည့် ဒေသခံများအား ၂၀၂၄ ခုနှစ် ဇန်နဝါရီလ ၂၅ ရက်နေ့က တွေ့ရစဉ်။
Ta'ang Women's Organization
ရှမ်းပြည်နယ်မြောက်ပိုင်း ကွတ်ခိုင်မြို့နယ် နမ့်ဖတ်ကာရွာမှာ ဒီဇင်ဘာလ ၂၉ ရက်ကနေ ဇန်နဝါရီလ ၂၅ ရက်နေ့အထိ စစ်ကောင်စီနဲ့ ကချင်လွတ်မြောက်ရေးတပ်မတော် (KIA) တို့ကြား တိုက်ပွဲတွေအတွင်း အရပ်သား ၁၈ ဦးသေဆုံးပြီး ရှစ်ဦး ဒဏ်ရာရခဲ့တယ်လို့ တအာင်းအမျိုးသမီးအဖွဲ့အစည်း (TWO) က ထုတ်ပြန်ပါတယ်။
လက်နက်ကြီးနဲ့ပစ်ခတ်တာ၊ လေကြောင်းကနေ ဗုံးကြဲတိုက်ခိုက်တာတွေကြောင့် ထိခိုက်သေဆုံးခဲ့တာလို့ ဇန်နဝါရီ ၂၅ ရက်နေ့က TWO ထုတ်ပြန်ချက်မှာ ဖော်ပြပါတယ်။
တိုက်ပွဲတွေအတွင်း ဘာသာရေးအဆောက်အဦနဲ့ နေအိမ်အများအပြားထိခိုက်ပျက်စီးမှုရှိပြီး တောထဲမှာ ထွက်ပြေးတိမ်းရှောင်ရင်း အစာရေစာပြတ်လပ်ပြီး သေဆုံးသွားသူတွေလည်း ရှိတယ်လို့ ဆိုပါတယ်။
နမ့်ဖတ်ကာကျေးရွာမှာ နှစ်ဘက်တိုက်ပွဲတွေကြောင့် ဒေသခံ တစ်ထောင်ဝန်းကျင် ထွက်ပြေးတိမ်းရှောင်နေရပြီး အခြေခံအစားအသောက်နဲ့ ဆေးဝါးတွေ အကူအညီလိုအပ်နေတယ်လို့လည်း TWO က ထုတ်ပြန်ထားပါတယ်။
တိုက်ပွဲအတွင်း အရပ်သားတွေ သေဆုံးဒဏ်ရာရကြောင်း TWO ထုတ်ပြန်ချက်နဲ့ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းနဲ့ KIO သတင်းနဲ့ ပြန်ကြားရေးတာဝန်ခံ ဗိုလ်မှူးကြီး နော်ဘူကို RFA က မေးမြန်းဖို့ ဖုန်းဆက်ခဲ့ပေမဲ့ လက်ခံဖြေဆိုတာမရှိပါဘူး။
နမ့်ဖတ်ကာတိုက်ပွဲအတွင်း လေကြောင်းကနေ ဗုံးလာကြဲတဲ့ စစ်ကောင်စီ ဂျက်တိုက်လေယာဉ်တစ်စင်းကိုလည်း အခုလ ၁၆ ရက်နေ့မှာ ပစ်ချနိုင်ခဲ့တယ်လို့ KIA ဘက်က ထုတ်ပြောထားပါတယ်။
နမ့်ဖတ်ကာ ကျေးရွာအခြေစိုက် စစ်ကောင်စီရဲ့ ခလရ (၁၂၃) တပ်ရင်းကို ကချင်လွတ်မြောက်ရေးတပ်မတော် (KIA) က ဇန်နဝါရီ ၂၄ ရက်နေ့မှာ တိုက်ခိုက်သိမ်းယူခဲ့တယ်လို့လည်း ပြောထားပါတယ်။
မြောက်ပိုင်းညီနောင်မဟာမိတ်သုံးဖွဲ့ရဲ့ "၁၀၂၇ စစ်ဆင်ရေး"အတွင်း TWO ရဲ့မှတ်တမ်းတွေအရ နမ့်ဖတ်ကာကျေးရွာမှာ ဒေသခံ ၂၅ ဦး သေဆုံးခဲ့ပြီး ၂၈ ဦး ထိခိုက်ဒဏ်ရာရခဲ့ပါတယ်။
