ဆုန်ကရန် ရေကစားပွဲကို ဉာဏမူပိုင်ခွင့်တင်ဖို့ ထိုင်း ကြိုးပမ်းနေ

• RFA Burmese
  2024-10-24

ထိုင်းနိုင်ငံရဲ့ ဆုန်ကရန်သင်္ကြန်ကို ဉာဏမူပိုင်ခွင့်တင်ဖို့ ထိုင်း ကြိုးပမ်းနေတယ်လို့ The Nation သတင်းမှာ အောက်တိုဘာလ ၂၃ ရက် မနေ့က ဖော်ပြပါတယ်။

သင်္ကြန်ရေကစားပွဲတော်ကို ထိုင်းနိုင်ငံရဲ့ ယဉ်ကျေးမှု အမွေအနှစ်တစ်ခုအနေနဲ့ ပြသလိုတာအပြင် တခြားနိုင်ငံတွေမှာ “ရေကစားပွဲတော်” ကျင်းပ အသုံးပြုတာကနေ ကာကွယ်လိုတဲ့အတွက်ဖြစ်တယ်လို့ ကော်မတီဝင်တစ်ဦးဖြစ်တဲ့ Chadatip Chutrakul က ပြောကြားသွားပါတယ်။

ထိုင်းနိုင်ငံရဲ့ ရိုးရာယဥ်ကျေးမှုတွေကို ထိန်းသိမ်းမြှင့်တင်မှုက အရေးပါပြီး ထိုင်းကို ကမ္ဘာ့ထိပ်တန်းပွဲတော်တွေ ကျင်းပရာ နေရာတစ်ခုအဖြစ် သတ်မှတ်ဖို့ အရေးကြီးတယ်လို့ ကော်မတီဝင်တစ်ဦးဖြစ်တဲ့ Chadatip Chutrakul က ပြီးခဲ့တဲ့ တနင်္လာနေ့က ပြောသွားတယ်လို့ ဆိုပါတယ်။

ဆုန်ကရန်သင်္ကြန်ပွဲတော်ကို မူပိုင်ခွင့်သတ်မှတ်လိုက်ခြင်းအားဖြင့် ထိုင်းနိုင်ငံရဲ့ တစ်မူထူးခြားတဲ့ ယဥ်ကျေးမှုနဲ့ ရိုးရာဓလေ့ကို ကာကွယ်နိုင်မဲ့အပြင် ဒီပွဲတော်ရဲ့ လူကြိုက်များမှုကိုလိုက်ပြီး ဒေသတွင်းမှာသာမက တစ်ကမ္ဘာ လုံးဆီကနေ ဘဏ္ဍာရေးအကျိုးအမြတ်တွေရနိုင်တယ်လို့ ဆိုပါတယ်။

ထိုင်းနိုင်ငံရဲ့ ဆုန်ကရန် ရေကစားပွဲတော်ကို ယူနက်စ်ကိုက ကမ္ဘာ့အမွေအနှစ် စာရင်းဝင်အဖြစ် ၂၀၂၃ ခုနှစ် ဒီဇင်ဘာလ ၆ ရက်နေ့မှာ အတည်ပြုကြေညာသွားတာပါ။

ယူနက်စကိုရဲ့ ရှေးဟောင်းအမွေအနှစ်အဖြစ် သတ်မှတ်ခံရတဲ့အတွက် ၂၀၂၄ ခုနှစ် ဧပြီလ ၁၂ ရက်ကစလို့ ၁၇ ရက်အထိ ထိုင်းနိုင်ငံတစ်ဝန်းမှာ အထိမ်းအမှတ်ပွဲတွေ စည်ကားစွာကျင်းပခဲ့ပါတယ်။