རྒྱལ་སྤྱིའི་ཉེས་ཡང་ཚོགས་པས་རྒྱ་ནག་གཞུང་ལ་འབོད་སྐུལ་བྱས་སྐོར།

• 
  2008-06-20

༄༅༎རེས་གཟའ་ཕུར་བུའི་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་རྒྱལ་སྤྱིའི་ཉེས་ཡང་ཚོགས་པས་བོད་ནང་ཉེ་ཆར་ཞི་བའི་རྔམ་སྟོན་ངོ་རྒོལ་ལས་འགུལ་སྤེལ་བར་བརྟེན་ནས་རྒྱ་ནག་གཞུང་གིས་འཛིན་བཟུང་བྱས་པའི་བོད་མི་རྣམས་འཕྲལ་དུ་གློད་འགྲོལ་གཏོང་དགོས་པ་ཛ་དྲག་གི་འབོད་སྐུལ་ཞུས་ཡོད་པ་རེད།

རྒྱལ་སྤྱིའི་ཉེས་ཡང་ཚོགས་པས་སྤེལ་བའི་གནས་ཚུལ་གསར་པ་དེའི་ནང་ལ་རྒྱ་ནག་གཞུང་གིས་བོད་མི་ཆིག་སྟོང་ལྷག་ལ་ནག་ཉེས་གང་ཡང་ཐག་གཅོད་མ་བྱས་པར་མུ་མཐུད་བཙོན་འཇུག་བྱེད་བཞིན་ཡོད་པའི་སྐོར་གསུང་ཡོད་ཅིང༌། ལྷག་པར་དུ་རྒྱལ་སྤྱིའི་ཉེས་ཡང་ཚོགས་པའི་ཨེ་ཤི་ཡ་དང་ཞི་བདེ་རྒྱ་མཚོའི་སྡེ་ཚན་གྱི་འགན་འཛིན་སཱེམ་ཛ་རི་ཕི་ཡིས་རེས་གཟའ་སྤེན་པའི་རྒྱ་ནག་གི་ཨོ་ལིམ་པིག་རྩེད་འགྲན་གྱི་དཔལ་འབར་བོད་ནང་སྐོར་བསྐྱོད་བྱ་རྒྱུ་དེའི་ཐོག་ནས་བོད་ནང་བོད་མི་གར་སོང་ཆ་མེད་དུ་གྱུར་བ་དང་བཙོན་ཁང་དུ་ཡོད་པ་རྣམས་ལ་དོ་སྣང་བྱེད་ཡུལ་ཞིག་ཏུ་འགྱུར་རྒྱུ་དང་བོད་ནང་གི་གནས་སྟངས་ཕྲན་བུ་ཞིག་དྲག་ཏུ་འགྲོ་རྒྱུའི་གོ་སྐབས་ཤིག་ཡིན་པ་གསུང་ཡོད་པ་མ་ཟད། བོད་ནང་གི་བོད་མི་ཚོས་ཞི་བའི་ཐོག་ནས་བསམ་ཚུལ་བཤད་པར་བརྟེན་ནས་རྒྱ་ནག་གཞུང་གིས་བོད་མི་སྟོང་ཕྲང་བཙོན་བཅུག་བྱས་པ་དང་དེ་དག་ཤི་སོན་ག་རེ་ཡིན་མིན་དང་བཙོན་བཅུག་ག་པར་བྱས་མེད་སོགས་ཀྱི་གནས་ཚུལ་ནང་མིས་ཤེས་རྟོགས་མེད་པ་དང་ཁོང་ཚོའི་གནས་སྟངས་ཐོག་ཧ་ཅང་གི་བློ་འཚབ་ཐོག་གནས་ཡོད་པའི་སྐོར་གསུང་ཡོད་པ་རེད། རྒྱལ་སྤྱིའི་ཉེས་ཡང་ཚོགས་པས་གསུང་ན། འགྲོ་བ་མིའི་ཐོབ་ཐང་ཚོགས་པའི་ངོས་ནས་རྒྱ་ནག་གཞུང་ལ་འཛིན་བཟུང་བྱས་པའི་བོད་མི་རྣམས་འཕྲལ་དུ་གློད་འགྲོལ་གཏོང་དགོས་པའི་འབོད་སྐུལ་ཞུ་གི་ཡོད་ཅེས་དང་། རྒྱ་ནག་གཞུང་གིས་བོད་མི་སྟོང་ཕྲག་ལྷག་འཛིན་བཟུང་བྱས་ཡོད་ཀྱང་རྒྱ་ནག་གཞུང་གིས་ཤིང་ཧྭ་གསར་འགྱུར་ཐོག་བོད་མི་ཁག་ཅིག་གིས་ངོས་ལེན་ཞུས་པ་དང་ཁག་ཅིག་འཇུ་བཟུང་བྱས་པ། ཁག་ཅིག་ཉེས་ཆད་བཏང་བའི་སྐོར་བོད་མི་ཉུང་ཤས་ཤིག་གསལ་བསྒྲགས་བྱས་པ་དང་འཛིན་བཟུང་བྱས་པའི་བོད་མི་སྟོང་ཕྲག་གི་གྲངས་ཀ་གཉིས་བར་མཐུན་གྱི་མེད་པའི་སྐོར་གསུང་ཡོད་པ་རེད།