རྒྱ་ནག་གི་སྲིད་བློན་ཡོ་རོབ་ཡུལ་གྲུ་ཁག་ཅིག་ཏུ་འཚམས་འདྲི།

• 
  2009-01-26

༄༅༎རྒྱ་ནག་གི་སྲིད་བློན་ལྦེན་ཅ་པའོ་ཡོ་རོབ་ཀྱི་ཡུལ་གྲུ་ཁག་ཅིག་ནང་བསྐྱོད་སྐབས་ཡོ་རོབ་ཀྱི་ད་ལྟའི་དཔལ་འབྱོར་དཀའ་རྙོག་སེལ་ཕྱོགས་ཐོག་རྒྱབ་བསྐྱོར་གྱི་རྣམ་པ་སྟོན་ཞོར་དུ་རྒྱ་ནག་གི་ཕྱི་སྲིད་ཀྱི་དམིགས་ཡུལ་ཁག་འགྲུབ་རྒྱུའི་ཆེད་འབད་བརྩོན་གནང་རྒྱུ་ཡིན་པ་རེད།

རེས་གཟའ་མིག་དམར་ཉིན་ནས་འགོ་འཛུགས་གནང་རྒྱུའི་རྒྱ་ནག་གི་སྲིད་བློན་ལྦེན་ཅ་པའོ་མཆོག་གི་ཡོ་རོབ་ཀྱི་ཉིན་བདུན་རིང་གི་གཟིགས་བསྐོར་དེའི་སྐབས་གཟིགས་བསྐོར་ཕེབས་ཡུལ་དེ་དག་དང་གྲོས་མཐུན་ཁག་ཅིག་འཇོག་གནང་རྒྱུའི་འཆར་གཞི་ཡོད་པ་དང་ཡུལ་ཁག་དེ་དག་གི་དཔལ་འབྱོར་ཀྱི་དཀའ་རྙོག་སེལ་རྒྱུའི་ཐོག་རྒྱབ་བསྐྱོར་གྱི་རྣམ་པ་བཏོན་གནང་རྒྱུ་ཡིན་པ་རེད། ཡོ་རོབ་སྤྱི་མཐུན་གྱི་ཕྱི་སྲིད་ལས་དོན་ཐོག་ཕྱག་ལས་གནང་མཁན་དང་དེ་སྔ་རྒྱ་ནག་གི་རྒྱལ་ས་པེ་ཅིང་གི་དབྱིན་ཇིའི་གཞུང་ཚབ་ཁང་ནང་ཕྱག་ལས་གནང་མྱོང་ཡོད་མཁན་སྐུ་ཞབས་ཇོན་ཕོཀ་སི་ཡིས་དབྱིན་ཇིའི་སྲིད་བློན་ལས་ཁུངས་ནས་རྒྱ་ནག་གི་སྲིད་བློན་ལྦེན་ཅ་པའོ་མཆོག་གི་ད་ཐེངས་ཀྱི་གཟིགས་བསྐོར་དེ་དཔལ་འབྱོར་རྐྱང་པའི་གནད་དོན་ཞིག་ལ་གཟིགས་ཀྱི་ཡོད་ནའང་རྒྱ་ནག་ངོས་ནས་ཡོ་རོབ་སྤྱི་མཐུན་དང་མི་མཐུན་པའི་དཀའ་རྙོག་ཁག་སེལ་རྒྱུའི་ཐོག་རེ་བ་གནང་གི་ཡོད་སྐོར་གསུང་འདུག རྒྱ་ནག་གི་སྲིད་བློན་ལྦེན་ཅ་པའོ་མཆོག་ད་ཐེངས་ཡོ་རོབ་ཀྱི་ཡུལ་གྲུ་སུད་ཛི་ལེནདྲི་ནང་འཛམ་གླིང་གི་དཔལ་འབྱོར་གླེང་སྟེགས་དེར་བཅར་རྒྱུ་དང་དེ་ནས་ཁོང་ཇར་མ་ནི་དེ་རྗེས་ཡོ་རོབ་སྤྱི་མཐུན་གྱི་རྒྱལ་ས་སྦ་ར་སེལ་སི་དང་སེ་པེན་དང་དབྱིན་ཡུལ་བཅས་པའི་ཡུལ་ཁག་ནང་ཕེབས་རྒྱུའི་འཆར་གཞི་ཡོད་པ་རེད།