རྒྱ་ནག་ནང་་དབུལ་ཕོངས་སྐོར་དྲ་རྒྱ་བརྒྱུད་གླེང་སློང་བྱེད་པ།

• 
  2011-03-09

༄༅༎རྒྱ་ནག་ནང་དེང་སྐབས་དྲ་རྒྱ་བརྒྱུད་ནས་ཞིང་པའི་དབུལ་ཕོངས་གནས་སྟངས་དང་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་བསམ་ཚུལ་གླེང་སློང་བྱེད་མཁན་ཇེ་མང་དུ་འགྲོ་བཞིན་པའི་ཁར། དེང་སྐབས་རྒྱ་ནག་གི་རྒྱལ་ས་པེ་ཅིན་དུ་རྒྱལ་ཡོངས་མི་མང་འཐུས་མི་ཚོགས་ཆེན་དང་། ཆབ་སྲིད་གྲོས་ཚོགས་གཉིས་ཚུགས་སྐབས་ཞིང་པའི་གནས་སྟངས་དང་ལས་ཤོར་མི་སྣ་གནས་སྟངས་སོགས་ཀྱི་སྐོར་གླེང་སློང་བྱེད་མཁན་དེ་བས་མང་པོ་ཡོད་པར་བརྟེན་ནས། རྒྱ་ནག་གཞུང་གི་དཔོན་རིགས་ཚོས་ཀྱང་གནད་དོན་དེ་ཚོའི་ཐོག་དོ་སྣང་དང་། སེམས་འཚབ་བྱེད་དགོས་པ་ཤིག་ཆགས་ཡོད་པའི་སྐོར་གནད་དོན་དབྱེ་ཞིབ་པ་ཚོས་དགོངས་ཚུལ་གསུང་གི་ཡོད་པ་རེད།  

དཔེར་ན། རྒྱ་ནག་ཉམས་ཞིབ་ལས་ཁང་ཞིག་ནང་ཕྱག་ལས་གནང་མཁན་གྱི་དགེ་རྒན་ཆེན་མོ་ཡུའུ་ཅན་ རུང་གིས་འདས་པའི་ལོ་ངོ་ཁ་ཤས་རིང་ཞིང་པ་དབུལ་ཕོངས་ཀྱི་གནས་སྟངས་དང་། དཔོན་རིགས་ཀྱི་ཁྲིམས་འགལ་གྱི་བྱ་སྤྱོད་སྤེལ་གྱི་ཡོད་པའི་གནས་སྟངས་ཐོག་སྐྱོན་བརྗོད་ཀྱི་རྩོམ་ཡིག་སོགས་སྤེལ་གནང་སྟེ། གནད་དོན་དེ་རིགས་ལ་འགྱུར་ལྡོག་ཡོང་ཐབས་གནང་ཡོད་པ་དང་། ཉེ་བའི་ཆར་ཁོང་གིས་དྲ་རྒྱ་བརྒྱུད་ནས་གནད་དོན་དེ་རིགས་གླེང་སློང་གནང་བཞིན་ཡོད་པར་དྲ་རྒྱའི་ཐོག་ནས་གནད་དོན་དེ་ཚོའི་ཐོག་བསམ་ཚུལ་གླེང་མཁན་གྱི་མིའི་གྲངས་འབོར་ཡང་ཇེ་མང་དུ་འགྲོ་བཞིན་ཡོད་ཅིང་། དགེ་རྒན་ཆེན་མོ་ཡུའུ་ཡིས་རྒྱ་ནག་ནང་ཚང་མས་དོ་སྣང་བྱེད་སའི་གནད་དོན་ཞིང་པའི་ས་ཁུལ་གྱི་དབུལ་ཕོངས་མི་མང་ཚོའི་གནས་སྟངས་སོགས་བཏོན་གནང་སྟེ། དེང་སྐབས་རྒྱ་ནག་ནང་གི་མི་མང་པོར་དྲ་རྒྱ་བེད་སྤྱོད་བྱེད་རྒྱུའི་ཆ་རྐྱེན་ཡོད་པར་བརྟེན་ནས། དྲ་རྒྱ་བེད་སྤྱོད་བྱེད་མཁན་ཚང་མ་གསར་འགྱུར་བརྒྱུད་ལམ་གྱི་ལྟེ་གནས་ལྟ་བུ་ཆགས་ཀྱི་ཡོད་པར་བརྟེན། རྒྱ་ནག་ནང་ཚོར་བ་རྣོ་བའི་གོང་གི་གནད་དོན་དེ་ཚོའི་ཐོག་གླེང་སློང་བྱེད་མཁན་གྱི་མི་འབོར་ཧ་ཅང་མང་པོ་ཆགས་ཀྱི་ཡོད་པ་གསུང་འདུག

ཡིན་ན་ཡང་དགེ་རྒན་ཆེན་པོ་ཡུའུ་ཡིས་རྒྱ་ནག་གི་དཔོན་རིགས་ཚོར་ཐད་ཀར་སྐྱོན་བརྗོད་གནང་གི་མེད་པ་མ་ཟད་ཕྱི་རྒྱལ་གྱི་གསར་འགོད་པ་ཚོའི་བཅའ་དྲིར་ཡང་དང་ལེན་གནང་གི་མེད་ཅིང་། དེ་ལྟར་གནང་དགོས་དོན་ནི་གོང་གི་གནད་དོན་དེ་ཚོ་ནི་ཧ་ཅང་གི་ཚོར་བ་རྣོ་བའི་གནད་དོན་ཡིན་པས།  རྒྱ་ནག་གི་གནས་སྟངས་ཐོག་ནས་གནད་དོན་དེ་ཚོ་ལས་གཡོལ་ཐབས་བྱ་རྒྱུ་དེ་དགོས་ངེས་ཤིག་ཡིན་པ་གསུངས་འདུག།