ཨོ་ལིམ་པིག་སྒྲོན་མེ་བོད་ནང་འཁྱེར་རྒྱུར་ཨི་ཊ་ལིའི་ནང་ངོ་རྒོལ།

• 
  2008-06-18

༄༅༎རྒྱ་ནག་གཞུང་གིས་ཨོ་ལིམ་པིག་གི་སྒྲོན་མེ་བོད་ཀྱི་རྒྱལ་ས་ལྷ་སའི་ཁུལ་བསྐོར་བསྐྱོད་བྱ་རྒྱུའི་འཆར་གཞི་ཡོད་པ་འདིར་བོད་རིགས་དང་བོད་དོན་ལ་རྒྱབ་སྐྱོར་གནང་མཁན་ཚོས་རྒྱལ་སྤྱིའི་ས་གནས་མང་པོའི་ནང་ངོ་རྒོལ་གྱི་ལས་འགུལ་སྤེལ་གྱི་ཡོད་པ་ལྟར་ད་རེས་ཨི་ཊ་ལིའི་རྒྱལ་ས་རོམ་གྱི་ནང་བོད་རིགས་དང་བོད་དོན་ལ་རྒྱབ་སྐྱོར་གནང་མཁན་མི་གྲངས་༢༠༠༠ ལྷག་ཙམ་ཞིག་གིས་ཞི་བའི་གོམ་བགྲོད་ཀྱི་ངོ་རྒོལ་བྱས་ཏེ་ བོད་ནང་དཔལ་འབར་བསྐོར་བསྐྱོད་བྱ་རྒྱུའི་རྒྱ་ནག་གཞུང་གི་ཐག་གཅོད་འདིར་ངོ་རྒོལ་སྐད་འབོད་གནང་ཡོད་པ་རེད་ ཨི་ཊ་ལིའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཐུབ་བསྟན་བསྟན་འཛིན་ལགས་ཀྱིས་ཨི་ཊ་ལིའི་སྲིད་བློན་སྦར་ལུསི་ཀོ་ནི་དང་ཡོ་རོབ་མཉམ་མཐུན་ལྷན་ཚོགས་བཅས་པར་འབོད་སྐུལ་ཞིག་ཞུས་གནང་སྟེ་བོད་ནང་རྒྱ་ནག་གཞུང་གིས་དྲག་གནོན་ཤུགས་ཆེ་བྱེད་བཞིན་པའི་གནས་སྟངས་འདི་འདྲའི་འོག་རྒྱ་ནག་ནང་ཨོ་ལིམ་པིག་གི་ལུས་རྩལ་འགྲན་ཚོགས་ཀྱི་དབུ་འབྱེད་མཛད་སྒོའི་སར་མཉམ་བཞུགས་གནང་རྒྱུ་ཕྱིར་འཐེན་གནང་རོགས་གནང་ཞེས་རེ་སྐུལ་ཞུས་གནང་ཡོད་པ་རེད་

ཨི་ཊ་ལིའི་རེ་ཌི་ཁཱལ་སྲིད་དོན་ཚོགས་པ་དང་ཕྱི་འབྲེལ་ལྷན་ཁང་གི་ཚོགས་མི་མཱ་ཊི་ཡོ་མེ་ཁ་ཆི་ཡིས་ཀྱང་བོད་མི་ཚོ་དང་ལྷན་གཅིག་ཏུ་གོམ་བགྲོད་ནང་ཕེབས་པ་མ་ཟད་གསུང་བཤད་ཅིག་ཀྱང་གནང་སྟེ་བོད་དོན་རྒྱབ་སྐྱོར་ཡོད་ཚུལ་དང་རྒྱ་ནག་གཞུང་གིས་བོད་ཀྱི་གནད་དོན་ཡང་དག་པ་ཞིག་ལག་བསྟར་མ་བྱས་བར་ཨི་ཊ་ལིའི་སྲིད་བློན་མཆོག་ཨོ་ལིམ་པིག་གི་མཛད་སྒོར་ཕེབས་བཞུགས་གནང་རྒྱུར་མོས་མཐུན་ཞུ་ཡི་མེད་ཅེས་གསུངས་ཡོད་པ་རེད་༎