རྒྱ་མིའི་སྲུང་དམག་གིས་བོད་མི་བསད་རྨས་བཏང་བའི་གནས་ཚུལ།

• 
  2012-02-08

༄༅། །ཕྱི་ལོ་ ༢༠༡༢ ཟླ་ ༢ ཚེས་ ༣ རེས་གཟའ་པ་སངས་ཉིན། གསེར་རྟ་རྫོང་ཕུ་འུ་ཤང་དུ་བོད་མི་གསུམ་གྱིས་བོད་རང་དབང་གི་དོན་དུ་རྒྱ་དམར་གཞུང་ལ་ངོ་རྒོལ་གནང་སྟེ་རང་ལུས་མེ་བསྲེགས་བཏང་ནས་སྐུ་སྲོག་འདོར་བའི་བོད་མི་དེའི་མིང་དང་ས་གནས་ཞིབ་གསལ་མེད་པ་དང་། གཞན་གཉིས་ནི་ཕུ་འུ་ཤང་ཞོ་སང་སྡེ་པའི་རང་ལོ་ ༦༠ ཡས་མས་ཡིན་པའི་ཚབ་ཚའི་ཚེ་རིང་ལགས་དང་། འབུམ་ཤུལ་སྡེ་པའི་རང་ལོ་ ༣༠ ཡས་མས་ཡིན་པའི་སྐྱ་རིས་ལགས་གཉིས་ཡིན་པའི་གནས་ཚུལ་ཤེས་རྟོགས་བྱུང་པ་རེད། གསེར་རྟ་རྫོང་གི་ཁུལ་དུ་བོད་མིའི་རང་དབང་བརྩོན་མཁན་ཞི་རྒོལ་བྱེད་མཁན་ཐོག་རྒྱ་མིའི་སྲུང་དམག་གིས་མེ་མདའ་རྒྱབ་ཏེ་བོད་མི་བསད་རྨས་ཚབས་ཆེན་བཏང་བའི་ཛ་དྲག་གནས་སྟངས་ད་དུང་མུ་མཐུད་ཡོད་པ་དང་། རྒྱ་དམག་ཕོན་ཆེ་འགྲེམས་འཇོག་གིས་བོད་མི་ཚོའི་འགྲུལ་བཞུད་དང་བརྒྱུད་ལམ་སོགས་ཀྱང་བཀག་སྡོམ་བྱས་ཡོད་སྟབས། ས་གནས་ཀྱི་ཞིབ་ཕྲའི་གནས་ཚུལ་རྒྱུས་ལོན་བྱེད་དཀའ་བ་ཆགས་ཡོད།
དེ་བཞིན་དུ་ཕྱི་ཟླ་ ༢ ཚེས་ ༤ རེས་གཟའ་སྤེན་པའི་ཞོགས་པར་སེར་ཤུལ་རྫོང་དབོན་པོ་ཤང་ཐོག་ཏུ་བོད་མི་ཚོས་རྒྱ་གཞུང་ལ་ངོ་རྒོལ་གྱིས་ཤང་སློབ་གྲྭའི་རྒྱ་ནག་གི་རྒྱལ་དར་མར་ཕབ་སྟེ། བོད་ཀྱི་རྒྱལ་དར་སྒྲེང་འཛུགས་བྱས་ཡོད་པ་དང་། ཡིག་ཆ་མང་པོ་སྦྱར་འགྲེམས་བྱས་སྟབས། ད་ལྟ་རྫ་སྨད་དབོན་པོ་དགོན་གྲོང་གཉིས་ཀའི་ཧ་ཅང་དམ་བསྒྲགས་འོག་ཏུ་གནས་ཡོད་པ་རེད།
བོད་མི་མང་སྤྱི་འཐུས་ལྷན་ཚོགས་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་འཚེ་མེད་ཞི་བའི་ལམ་ནས་བོད་ཀྱི་རང་དབང་འཐབ་རྩོད་བརྩོན་ལེན་གནང་མཁན་གྱི་དཔའ་བོ་དཔའ་མོ་ཚོའི་ལྷག་བསམ་དང་སྙིང་སྟོབས་ལ་རྗེས་སུ་ཡི་རངས་དང་། གདུང་སེམས་མཉམ་བསྐྱེད་ཞུ་རྒྱུ་
ད་དུང་མུ་མཐུད་བོད་མིའི་ཐོག་དྲག་གནོན་དང། བོད་དོན་འགྲིག་འཇགས་ལ་དུས་འགྱངས་ཀྱི་བྱེད་ཐབས་འབའ་ཞིག་ལག་བསྟར་བྱས་ཚེ། དེ་ལས་བྱུང་བའི་ངན་འབྲས་མཐའ་དག་རྒྱ་གཞུང་གིས་འགན་ཁུར་ལེན་དགོས། ཉེ་ཆར་སྤྱི་འཐུས་ལྷན་ཚོགས་ནས་སྲིད་འཛིན་ཧུའུ་ཅིན་ཐའོ་ལ་ཡོངས་བསྒྲགས་ཀྱི་སྙན་ཞུ་ཞིག་ཕུལ་ཡོད་པ་དེའི་ནང་སྤྱི་ལྷན་གྱི་བསམ་ཚུལ་དང་དགོས་འདུན་ཁག་གསལ་སྟོན་བྱས་ཡོད་པ་དང་། སྤྱི་ལྷན་གྱི་སྐུ་ཚབ་ཚོགས་ཆུང་ཞིག་ལྡི་ལིར་ཆེད་བསྐྱོད་ཀྱིས་བོད་ནང་གི་ཛ་དྲག་གནས་སྟངས་སྐོར་ལྡི་ལིར་བཅའ་སྡོད་གཞུང་ཚབ་ཁག་ལ་ཐུག་འཕྲད་ཀྱིས་ཞུ་སྐུལ་བྱ་རྒྱུའི་ལས་འཆར་སྒྲིག་སྐབས། རྒྱ་ནག་གཞུང་ཚབ་ནས་སྤྱི་ལྷན་སྐུ་ཚབ་ལ་ངོ་ཐུག་བྱ་རྒྱུ་ལྟ་ཞོག ད་དུང་གཞུང་ཚབ་གཞན་དག་ལ་ཡི་གེ་བཏང་སྟེ་སྤྱི་ལྷན་སྐུ་ཚབ་ལ་ཐུག་འཕྲད་མི་བྱེད་པའི་སྐུལ་སློང་བྱས་འདུག་པ་དེའི་ཐོག་ནས་ཀྱང་སྲིད་དབང་འདིའི་སྐྱུག་བྲོ་བའི་བྱེད་སྟངས་རོབ་ཙམ་མཐོང་ཐུབ་པ་ཡིན།
འཛམ་གླིང་ཁྱོན་དུ་གནས་འཁོད་བོད་རིགས་དང་བོད་དོན་རྒྱབ་སྐྱོར་བ་རྣམས་ནས་ཕྱི་ཟླ་ ༢ པའི་ཚེས་ ༨ རེས་གཟའ་ལྷག་པའི་ཉིན་བོད་ནང་གདུང་སེམས་མཉམ་བསྐྱེད་ཀྱི་བཀའ་ཤག་གི་མཆོད་འབུལ་སྨོན་ལམ་དང་། དེ་བཞིན་སྤྱི་ལྷན་གྱི་ལོ་གསར་ཚེས་ ༡ ཉིན་གྱི་ཟས་བཅད་སྨྱུང་གནས་ལ་མཉམ་ཞུགས་རྒྱ་ཆེར་གནང་རྒྱུའི་འབོད་སྐུལ་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༢ ཟླ་ ༢ ཚེས་ ༦ ལ།། །།