རྒྱ་ནག་གི་རྒྱལ་སྟོན་ཉིན་མོ་སླེབས་ཉེར་བོད་དུ་དམ་བསྒྲགས།

• 
  2009-09-17

༄༅༎རྒྱ་ནག་གིས་རྒྱལ་ཁབ་དབུ་བརྙེས་པའི་དུས་ཆེན་སླེབས་ལ་ཉེ་བའི་སྐབས་དེར་བོད་ཀྱི་རྒྱལ་ས་ལྷ་སའི་ནང་བོད་རིགས་དགེ་འདུན་པ་དང་བཙུན་མ་གཙོས་པའི་བོད་རིགས་རྣམས་ཀྱི་ཐོག་ཞིབ་བཤེར་དམ་བསྒྲགས་ཤུགས་ཆེ་བྱེད་བཞིན་ཡོད་འདུག དེ་ཡང་ལོ་ལྟར་ཕྱི་ཟླ་བཅུ་པའི་ཚེས་གཅིག་ཉིན་རྒྱ་ནག་དམར་ཤོག་ཚོགས་པ་དབུ་བརྙེས་པའི་དུས་ཆེན་སྲུང་བརྩི་ཞུ་མུས་ལ་འདི་ལོ་རྒྱ་ནག་གི་རྒྱལ་ས་པེ་ཅིང་དང་བོད་ཀྱི་རྒྱལ་ས་ལྷ་སའི་ནང་རྒྱ་ནག་གཞུང་ལ་མི་དགའ་བ་ཚོས་ངོ་རྒོལ་བྱས་མི་ཡོང་ངམ་སྙམ་པའི་དོགས་པ་རྒྱ་ནག་གཞུང་གིས་བྱེད་ཀྱི་ཡོད་པ་དང་བོད་ཀྱི་རྒྱལ་ས་ལྷ་སའི་ནང་དུས་ཆེན་སྲུང་བརྩི་ཞུ་སྐབས་དགེ་འདུན་པ་གཅིག་ཀྱང་ལྷ་སའི་ནང་སྡོད་མི་ཆོག་པའི་བཀའ་རྒྱ་ནག་གཞུང་གིས་བཏང་ཡོད་ལུགས་ཨོ་སི་ཀྲོ་ལི་ཡའི་འདི་གའི་གསར་འགོད་པ་ནོར་བུ་དགྲ་འདུལ་ལགས་བརྒྱུད་བོད་ནས་གནས་ཚུལ་ངོ་སྤྲོད་གནང་ཡག་ལ་ཁོང་གིས་རྒྱ་ནག་གཞུང་གིས་དམ་བསྒྲགས་བྱེད་ཡག་འགོ་འཛུགས་བྱས་པ་དེས་ལྷ་ས་གྲོང་ཁྱེར་ནང་བོད་མི་ཉིན་རེ་ནས་ཉིན་རེ་ཉུང་དུ་འགྲོ་བཞིན་ཡིན་པ་དང་བོད་རང་སྐྱོང་ལྗོངས་ཉེན་རྟོག་ལས་ཁུངས་ཁག་གིས་མགྲོན་ཁང་དང་ཟ་ཁང་ ཁང་པ་གླ་ནས་སྡོད་ས་ཡོད་རིགས་ལ་གྲྭ་པ་དང་ཨ་ནི་སྡོད་མཁན་ཡོད་མེད་ཉེན་རྟོག་པས་དམིགས་བསལ་རྟོགས་ཞིབ་བྱེད་ཀྱི་ཡོད་འདུག ལྷག་པར་དུ་དུས་ཆེན་སྐབས་ལྷ་སའི་ནང་དགེ་འདུན་པ་གཅིག་ཀྱང་སྡོད་མི་ཆོག་ཅེས་བཤད་ཀྱི་ཡོད་འདུག དེ་བཞིན་བཀྲིས་ལྷུན་པོ་དང་རྒྱལ་རྩེ་ ས་སྐྱ་དགོན་པ་ གཞིས་ཀ་རྩེ་སོགས་བོད་མི་གནས་སྐོར་འགྲོ་ཡུལ་ཁག་ཏུ་རྒྱ་མིའི་དམག་མི་ཁྱོན་ཆེས་མེ་མདའ་སྦག་སྦག་རྒྱབ་ཆོག་ཆོག་གི་གྲ་སྒྲིག་བྱས་ནས་བསྡད་ཡོད་ལུགས་ཡང་འགྲེལ་བརྗོད་གནང་གི་འདུག།