ཨ་རི་དང་རྒྱ་ནག་གི་མཐོ་རིམ་དཔོན་རིགས་ཀྱི་གྲོས་མོལ།

• 
  2011-05-09

༄༅༎ཨ་མི་རི་ཀ་དང་རྒྱ་ནག་གི་ཆེས་མཐོའི་དཔོན་རིགས་རྣམས་ཀྱིས་འདི་ག་རྒྱལ་ས་ལྦ་ཤིང་ཀྲོན་དུ་འགྲོ་བ་མིའི་ཐོབ་ཐང་དང་ཚོང་འབྲེལ་དེ་བཞིན་རྒྱ་ནག་གི་དངུལ་གྱི་འཛའ་ཐང་ཐེ་བས་སྲིད་དོན་དང་དཔལ་འབྱོར་གྱི་གནད་དོན་མང་པོ་ཞིག་གི་ཐོག་གྲོས་མོལ་གནང་རྒྱུ་ཡིན་པ་རེད་ འཛམ་གླིང་གི་དཔལ་འབྱོར་ཆེ་ཤོས་ཀྱི་ཡུལ་ཁག་གཉིས་ཀྱིས་ལོ་རེའི་མཇལ་འཛོམས་དེར་དཀའ་རྙོགས་ཆེ་བའི་གནད་དོན་ཐོག་གྲོས་མོལ་གནང་རྒྱུའི་འཆར་གཞི་ཡོད་ནའང་དོན་འབྲས་སོན་པའི་རེ་བ་དེ་ཙམ་མེད་པ་རེད་ ཨ་རིའི་ནང་གི་འཛམ་གླིང་གི་དཔལ་འབྱོར་ཐོག་ཉམས་ཞིབ་གནང་མཁན་སྐུ་ཞབས་ཀའལ་ལྦའེན་རྦག་ཡིས་ད་ཐེངས་ཀྱི་ཡུལ་གཉིས་ཀྱི་གྲོས་མོལ་དེ་དཀའ་ཚེགས་ཅན་ཞིག་དང་གྲུབ་འབྲས་ཡང་ཐོན་པའི་རེ་བ་དེ་ཙམ་མེད་སྐོར་གསུང་འདུག

ཨ་མི་རི་ཀའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཀྲེན་མཆོག་དང་ནོར་སྲིད་དྲུང་ཆེ་ཀྲི་མ་ཐི་གའེཐི་ནར་རྣམ་གཉིས་ཀྱིས་ཨ་མི་རི་ཀའི་ཕྱོགས་ཀྱི་ཨ་མི་རི་ཀ་དང་རྒྱ་ནག་གི་ལོ་རེའི་སྲུང་སྐྱོབ་ཀྱི་ཐབས་ཕྱོགས་དང་དཔལ་འབྱོར་གྱི་གྲོས་མོལ་ཐེངས་གསུམ་པའི་དབུ་འཁྲིད་ཀྱི་འགན་འཁུར་གནང་རྒྱུ་ཡིན་པ་རེད་

རྒྱ་ནག་ཕྱོགས་ཀྱི་ད་ཐེངས་ཀྱི་གྲོས་མོལ་དེར་སྲིད་བློན་གཞོན་པ་ལྦང་ཆི་ཤང་དང་བློན་ཆེན་ལྷན་ཚོགས་ཀྱི་སློབ་སྟོན་པ་གྲའི་སྦང་གོ་ཡིས་འགོ་འཁྲིད་ཀྱི་འགན་འཁུར་གནང་རྒྱུ་ཡིན་པ་རེད་ བདུན་སྔོན་མ་དེར་ཨ་མི་རི་ཀའི་དཔོན་རིགས་མཐོ་གྲས་རྣམས་ཀྱིས་ད་ཐེངས་ཀྱི་རྒྱ་ནག་གི་དཔོན་རིགས་རྣམས་པའི་གྲོས་མོལ་དེར་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་ཡུལ་དེའི་དངུལ་གྱི་འཛའ་ཐང་གི་གནད་དོན་ཐོག་གྲོས་མོལ་གནང་རྒྱུ་ཡིན་སྐོར་གསུང་ཡོད་པ་རེད་ རྒྱ་ནག་གི་འབྲེལ་ཡོད་དཔོན་རིགས་རྣམས་ཀྱིས་གོང་ཞུས་ཀྱི་གནད་དོན་གཉིས་ཀྱི་ཐོག་གྲོས་མོལ་གནང་རྒྱུའི་ཁས་ལེན་གནང་ཡང་གནད་དོན་དེ་དག་ཐོག་ཕྱོགས་གཉིས་ཀྱི་ལངས་ཕྱོགས་ཐོག་ཧ་ཅང་གི་བར་ཁྱད་ཆེན་པོ་ཡོད་པའི་སྐོར་གླེང་སློང་གནང་རྒྱུའི་འདུན་པ་བཏོན་ཡོད་པ་རེད་