လူမျိုးတုံးသတ်ဖြတ်မှုလို့ ခေါ်ဆိုရေး လေ့လာဖို့လိုသေးဟု တီလာဆန် ပြောကြား

• 
  2017-11-15

အမေရိကန်နိုင်ငံခြားရေးဝန်ကြီး ရက်တီလာဆန်က ရခိုင်ပြည်နယ်မှာဖြစ်ပွားခဲ့တဲ့ ပဋိပက္ခတွေကို လူမျိုးတုံး သတ်ဖြတ်မှုလို့ ခေါ်ဝေါ်ရလောက်အောင် အချက်အလက်ပြည့်စုံရဲ့လားဆိုတာ ဆက်လက်သုံးသပ် လေ့လာဖို့ လိုအပ်နေသေးကြောင်း မနေ့က ပြောကြားလိုက်ပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နေပြည်တော်မှာ ပူးတွဲကျင်းပတဲ့ သတင်းစာရှင်းပွဲမှာ သူက အခုလိုပြောကြားခဲ့တာပါ။ ဒါ့အပြင် မြန်မာပြည်အပေါ် ပိတ်ဆို့အရေးယူရေးအတွက် အမေရိကန် လွှတ်တော် အမတ်တွေ ဆောင်ရွက်နေကြတာနဲ့ ပတ်သက်ပြီး တိုင်းပြည်တခုလုံးကို ပိတ်ဆို့အရေးယူဖို့ သူ့အနေနဲ့ ထောက်ခံ အကြံပေးမှာ မဟုတ်ကြောင်း၊ တဦးချင်း အပြစ်ရှိကြောင်း သက်သေထင်ရှားတွေ့သူတွေကို အရေးယူတာမျိုး ကတော့ သင့်တော်နိုင်ကြောင်း ပြောဆိုခဲ့ပါတယ်။

ဝန်ကြီး တီလာဆန်က ပိတ်ဆို့အရေးယူဖို့ ပြောဆိုနေကြသူတွေဟာ မြန်မာပြည်မှာ ဘာတွေဖြစ်နေသလဲဆိုတာ အသေအချာ မသိကြလို့ပါ၊ ဒါပေမဲ့ အဲဒီလိုပိတ်ဆို့အရေးယူဖို့ ဆောင်ရွက်နေသူအားလုံးဟာလည်း မြန်မာပြည် အပေါ် စိတ်စေတနာကောင်းထားကြသူတွေပါ။ သူတို့က ကူညီဖို့ကြိုးစားနေကြတာဖြစ်ပါတယ်။ မိမိ အခု မြင်တွေ့သိရှိခဲ့ရတာတွေကို ဝါရှင်တန်ပြန်ရောက်တဲ့အခါ တခြားသူတွေကို ရှင်းလင်းပြောဆိုမယ်လို့ ပြောကြား ခဲ့ပါတယ်။

တဆက်တည်းမှာပဲ ပိတ်ဆို့မှုကြောင့် ပဋိပက္ခတွေချုပ်ငြိမ်းသွားမှာ မဟုတ်ကြောင်း၊ ဒါပေမဲ့ ဖြစ်ပွားခဲ့မှုတွေအတွက် ဘယ်သူတွေမှာ တာဝန်ရှိလဲ၊ အဖြစ်အပျက်တွေရဲ့နောက်ကွယ်မှာ ဘယ်လို အချက်အလက်တွေရှိနေလဲဆိုတာ ကိုတော့ အဖြေရှာဖို့ လိုကြောင်းလည်း ဝန်ကြီး တီလာဆန် က ပြောကြားခဲ့ပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ဝန်ကြီးတီလာဆန်ကို မြန်မာပြည်ရဲ့ ပကတိ အခြေအနေတွေ နားလည်သဘောပေါက်တဲ့အတွက် ကျေးဇူးတင်ကြောင်း ပြန်လည်ပြောကြားခဲ့ပါတယ်။

ဒါ့အပြင် ဒေါ်အောင်ဆန်းစုကြည်က ရခိုင်ပြည်နယ်မှာ ဖြစ်ပွားခဲ့တဲ့ ပဋိပက္ခတွေနဲ့ပတ်သက်ပြီး သူမအနေ နဲ့ ရေငုံနုတ်ပိတ်နေတယ်လို့ ပြောဆိုသူတွေကို နားမလည်နိုင်ကြောင်း၊ မိမိကိုယ်တိုင်ရော အစိုးရအနေနဲ့ပါ ထုတ်ပြန်ပြောဆိုနေတွေရှိကြောင်း၊ ဒါပေမဲ့ လူမျိုး၊ဘာသာ မတူကြသူတွေအကြား ပိုမိုစိတ်ဝမ်းကွဲအောင် ထုတ်ပြန်ပြောကြားတာမျိုးကိုတော့ မပြုလုပ်နိုင်ကြောင်း ပြောဆိုခဲ့ပါတယ်။

ဝန်ကြီး တီလာဆန်က အမေရိကန်ပြည်ထောင်စုဟာ ဖိနှိပ်မှုဆန့်ကျင်တဲ့ မြန်မာပြည်သူတွေဘက်က နှစ်ပေါင်း များစွာရပ်တည်ခဲ့ကြောင်းနဲ့ ဒီမိုကရေစီပြောင်းလဲမှု အောင်မြင်ရေးအတွက် ခိုင်ခိုင်မာမာ ဆက်လက်ထောက်ခံ ကူညီမှာဖြစ်ကြောင်း၊ ပဋိပက္ခတွေရဲ့ အကြောင်းရင်းဖြစ်တဲ့ ARSA အဖွဲ့ရဲ့ သြဂုတ် ၂၅ ရက်တိုက်ခိုက်မှုကို ပြစ်တင် ရှုတ်ချကြောင်း၊ အဲဒီ တိုက်ခိုက်မှုကြောင့် မြန်မာလုံခြုံရေးတပ်ဖွဲ့တွေဘက်က သေကျေဆုံးရှုံးမှုတွေအတွက် များစွာ ဝမ်းနည်းကြောင်း၊ ဒါပေမဲ့ နောက်ပိုင်းမှာ လုံခြုံရေးတပ်ဖွဲ့တွေက ရက်စက်ကြမ်းကြုတ်စွာ နှိပ်စက်ခဲ့တယ်ဆိုတဲ့ သတင်းတွေအတွက် စိုးရိမ်ပူပန်ကြောင်း၊ လူသားချင်းစာနာမှု အကူအညီအဖြစ် အမေရိကန်ပြည်ထောင်စု က နောက်ထပ် ဒေါ်လာ ၄၇ သန်း ကူညီမှာဖြစ်တဲ့အတွက် သြဂုတ်လနောက်ပိုင်း ရခိုင်ပြည်နယ်ပြသနာနဲ့ စပ်လျဉ်းပြီး မြန်မာနဲ့ ဘင်္ဂလားဒေ့ရှ်ကို မိမိတို့ ကူညီမှုပမာဏဟာ ဒေါ်လာ ၈၇ သန်း ကျော်သွား မှာဖြစ်ကြောင်း ပြောဆိုခဲ့ပါတယ်။

ဒါ့အပြင် သူက တပ်မတော်နဲ့ လုံခြုံရေးတပ်ဖွဲ့တွေအနေနဲ့ အရပ်သားအစိုးရတွေရဲ့ လုပ်ငန်းတွေ အောင်မြင်မှု ရရှိအောင် ကူညီဖို့ တာဝန်ရှိပါတယ်။ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံရာမှာ မြန်မာပြည် ဒီမိုကရေ စီပြောင်းလဲမှုအောင်မြင်ရေးအတွက် တပ်မတော်ရဲ့ထောက်ခံမှုဟာ အင်မတန်အရေးကြီးကြောင်း ပြောခဲ့ တယ်။ မြန်မာ့တပ်မတော် ခေတ်မှီတိုးတက်ပြီး လေးစားခံရတဲ့ တပ်မတော်တခုဖြစ်ရေးဆိုတဲ့ မြန်မာအစိုးရရဲ့ ရည်မှန်းချက်ကို အမေရိကန်ပြည်ထောင်စုက ထောက်ခံတယ်။

အကြမ်းဖက်မှုကို တွန်းလှန်ဖို့ တပ်မတော်မှာ တာဝန်ရှိပေမယ့် အရပ်သားတွေ ထိခိုက်မှုမရှိအောင် အတတ်နိုင် ဆုံးကြိုးစားရမယ်။ ဒါကြောင့် နောက်ပိုင်းမှာ အကြမ်းဖက်မှုနဲ့ အစွန်းရောက်ဆူပူမှုတွေ ဖြေရှင်းရေးနဲ့ ပတ်သက် ပြီး မြန်မာအစိုးရနဲ့ ပူးပေါင်းဆောင်ရွက်ဖို့ အမေရိကန်ပြည်ထောင်စုက ဆောင်ရွက်မယ်လို့ ပြောကြားခဲ့ပါတယ်။