གསར་འགྱུར་ཡིག་ཚགས།

རྒྱ་ནག་གིས་ཁྱིམ་མཚེས་རྒྱལ་ཁབ་ཚོ་དང་མཉམ་འབྲེལ་དགོས་སྐོར་བཤད་བཞིན་པ་ནི་ཨ་རིའི་ཚོང་འབྲེལ་འཐབ་འཁྲུག་དང་འབྲེལ་རྒྱ་ནག་གི་དཔལ་འབྱོར་ལ་དཀའ་ཁག་མི་འབྱུང་ཆེད་ཁ་གཏད་གཅོག་ཐབས་ཡིན་པ། ཉམས་ཞིབ་པས་འགྲེལ་བརྗོད་གནང་གི་འདུག

ཞི་ཅིན་ཕིན་གྱིས་ཁྱིམ་མཚེས་རྒྱལ་ཁབ་ཚོ་དང་མཉམ་དུ་མ་འོངས་པ་བསྐྲུན་རྒྱུའི་འབོད་སྐུལ་དེ་ནི། ད་ལྟའི་ཆར་ཕྱི་ཕྱོགས་ཀྱི་ཚོང་འབྲེལ་རྩོད་རྙོག་གི་ཤུགས་རྐྱེན་ལ་ཁ་གཏད་གཅོག་རྒྱུ་དང་། ཁྱིམ་མཚེས་རྒྱལ་ཁབ་ཚོ་དང་འབྲེལ་ལམ་ཡར་རྒྱས་བཏང་བ་དེས་རྒྱ་ནག་ནང་ཁུལ་གྱི་དཔལ་འབྱོར་དཀའ་ངལ་སེལ་ཐབས་ཡིན་པ་གནད་དོན་དབྱེ་ཞིབ་པས་འགྲེལ་བརྗོད་གནང་གི་འདུག

བོད་ཀྱི་གཞུང་འབྲེལ་མིན་པའི་ཚོགས་སྡེ་ཁག་གིས་ཝེ་ཊི་ནམ་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལ་བརྩི་སྲུང་གིས། སྤུལ་སྐུ་ཧཱུྃ་ཀར་རྡོ་རྗེ་མཆོག་འདས་གྲོངས་སུ་འགྱུར་བའི་གནད་དོན་ཐད་ཁྲིམས་མཐུན་ཞིབ་འཇུག་གིས་གསལ་བཤད་དགོས་སྐོར་མཉམ་སྦྲེལ་བསྒྲགས་གཏམ་སྤེལ།

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝེ་ཊི་ནམ་རྒྱལ་ཁབ་ཏུ་གླུ་བུར་སྐུ་གཤེགས་པའི་གནས་ཚུལ་ཐོན་པར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་དྲུག་ཐུན་མོང་ནས་དམ་པ་དེ་ཉིད་ཝེ་ཊི་ནམ་དུ་སྐུ་གཤེགས་རྐྱེན་གང་ཡིན་གསལ་བཤད་དགོས་པའི་འབོད་སྐུལ་གྱི་བསྒྲགས་གཏམ་སྤེལ་འདུག

ཨ་རིའི་རྒྱ་ནག་གཞུང་ཚབ་ཀྱི་འོས་མི་ཌེ་ཝིཌ་པར་དུ་ལགས་ཀྱིས་གྲོས་ཚོགས་གོང་མའི་ཉན་ཞིབ་སྐབས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་གདོང་ལེན་བྱ་རྒྱུ་ཡིན་པ་བརྗོད་འདུག

ཊམཔ་སྲིད་གཞུང་གི་ཨ་རིའི་རྒྱ་ནག་གཞུང་ཚབ་འོས་མི་གྲོས་ཚོགས་འཐུས་མི་ཟུར་པ་ཌེ་ཝིཌ་པར་དུ་ (David Perdue) ལགས་ཀྱིས་རྒྱ་ནག་གིས་བོད་མི་དང་ཡུ་གུར་བ་རྣམས་ལ་བཙན་ཤེད་ངལ་རྩོལ་དང་། འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་ཡོད་པར་ཨ་རི་ངོས་ནས་མ་དགའ་བའི་རྣམ་འགྱུར་གཙང་མ་སྟོན་དགོས་པ་ལས་མིག་ཙུམ་ནས་སྡོད་མི་རུང་བའི་སྐོར་གསུངས་ཡོད་པར་བོད་མིའི་སྒྲིག་འཛུགས་དང་འགྲོ་བ་མིའི་ཐོབ་ཐང་འཐབ་རྩོད་པ་རྣམས་ཀྱིས་དགའ་བསུ་ཞུ་གི་འདུག

༸གོང་ས་༸སྐྱབས་མགོན་ཆེན་པོ་མཆོག་ལ་ཧི་མ་ཅལ་མངའ་སྡེའི་རྟ་པོ་དགོན་གཙོས་པའི་སྤྱི་ཏི་མི་མང་གིས་བརྟན་བཞུགས་བསྟར་འབུལ་སྐབས། འདོན་པ་བཏོན་པ་དང་སྨོན་ལམ་བརྒྱབ་བསྡད་པ་ཙམ་མིན་པར་སངས་རྒྱས་པའི་ཆོས་ལ་སློབ་སྦྱོང་བྱེད་རྒྱུ་གལ་ཆེན་པོ་རེད་ཅེས་བཀའ་སྩལ།

༸གོང་ས་༸སྐྱབས་མགོན་ཆེན་པོ་མཆོག་ལ་རྟ་པོ་དགོན་གྱིས་གཙོས་སྤྱི་ཏི་ཡུལ་མི་ཚོས་བརྟན་བཞུགས་བསྟར་འབུལ་ཞུས་པ་དང་འབྲེལ། མགོན་པོ་མཆོག་གིས་དད་ལྡན་པ་རྣམས་ལ་སྐྱབས་འགྲོ་དང་གཟུགས་སྔགས་འགའི་བཟླས་ལུང་གིས་ཆོས་འབྲེལ་མཛད་སོང་།

རྒྱ་ནག་གཞུང་གིས་བོད་བརྒྱུད་ནང་བསྟན་སློབ་གླིང་དུ་འཛུལ་ཞུགས་མཁན་བླ་སྤྲུལ་ཚོས་ཁ་བྲལ་ལ་ངོ་རྒོལ་དགོས་པའི་ཆ་རྐྱེན་བཏོན་འདུག

སི་ཁྲོན་ཞིང་ཆེན་བོད་བརྒྱུད་ནང་བསྟན་སློབ་གླིང་ཞེས་པར་སློབ་འཇུག་བྱ་བར་རྒྱ་ནག་གུང་ཁྲན་ཏང་ལ་བརྩི་བཀུར་དང་། རྒྱལ་ཁབ་ཁ་བྲལ་ལ་ངོ་རྒོལ་བྱེད་དགོས་པའི་ཆ་རྐྱེན་བཏོན་ཡོད་པར། བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་སངས་རྒྱས་སྐྱབ་ལགས་ཀྱིས་བྱེད་ཐབས་དེ་ནི་དམར་ཤོག་ཚོགས་པའི་ཆབ་སྲིད་ཀྱི་དམིགས་ཡུལ་སྒྲུབ་ཐབས་ཡིན་པ་གསུང་གི་འདུག

ཨ་རིས་རྒྱ་ནག་ཐོག་སྒོ་ཁྲལ་འཕར་མ་བརྒྱ་ཆ་ ༡༢༥ བཀལ་རྒྱུ་ཡིན་པ་བསྒྲགས་འདུག

ཟླ་ ༤ ཚེས་ ༩ ཉིན་ཨ་རིའི་སྲིད་འཛིན་ཊམཔ་ཡིས། རྒྱ་ནག་གཞུང་གིས་རྒྱལ་སྤྱིའི་ཁྲོམ་རྭར་གུས་བརྩི་མི་བྱེད་པ་སོགས་ཀྱི་རྒྱུ་རྐྱེན་ལ་བརྟེན་ནས་ཨ་རིའི་སྲིད་གཞུང་ངོས་ནས་རྒྱ་ནག་ལ་སྒོ་ཁྲལ་འཕར་མ་བརྒྱ་ཆ་ ༡༢༥ བཀལ་རྒྱུ་ཡིན་པ་དེ་བཞིན་འཕྲལ་དུ་ལག་བསྟར་བྱ་རྒྱུའི་གསལ་བསྒྲགས་བྱས་འདུག

རྒྱ་གར་གཞུང་གིས་ཧི་མ་ལ་ཡ་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་ཐོག་མ་ངོ་སྤྲོད་བྱ་འཆར་འདུག

རྒྱ་གར་གྱིས་ཟླ་བ་འདིའི་ནང་ཚུན་དུ་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་ཀྱིས་དགོན་སྡེ་ཁག་ཏུ་སློབ་གཉེར་བྱེད་བཞིན་པའི་གྲྭ་བཙུན་རྣམས་ལ། ནང་པའི་ཤེས་ཡོན་སློབ་སྦྱོང་གྲུབ་རྗེས་སུ་ངོས་ལེན་ཡོད་པའི་སློབ་ཐོན་ལག་ཁྱེར་བསྐྲུན་ཐོག མ་འོངས་མདུན་ལམ་དང་མུ་མཐུད་མཐོ་རིམ་སློབ་སྦྱོང་སོགས་ཀྱི་ཆེད་རམ་འདེགས་ཞུ་ཆེད་ཡིན་ཞེས་ན་ལེནྡྲ་ནང་པའི་སྲོལ་རྒྱུན་གྱི་རྒྱ་གར་ཧི་མ་ལ་ཡའི་ལྷན་ཚོགས་ཀྱི་དྲུང་ཆེ་མ་ལིང་གོམ་བུ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

དབྱིན་ཇིའི་རྒྱལ་ཡོངས་དྲྭ་གནས་བདེ་འཇགས་ལྟེ་གནས་ཁང་གིས་རྒྱ་གཞུང་དང་འབྲེལ་ཡོད་དྲྭ་ཐོག་འཇབ་རྒོལ་བས་བོད་མི་དང་ཡུ་གུར་བ་སོགས་ལ་གསང་ལྟ་མཉེན་ཆས་བརྒྱུད་སོ་ཉུལ་བྱེད་ཀྱི་ཡོད་སྐོར་ཐེར་འདོན་དང་དེ་འབྲེལ་བྱེད་ཕྱོགས་ལམ་སྟོན་བྱས་འདུག

དབྱིན་ཇིའི་རྒྱལ་ཡོངས་དྲྭ་གནས་བདེ་འཇགས་ལྟེ་གནས་ཁང་དང་། རྒྱལ་སྤྱིའི་དྲྭ་གནས་བདེ་འཇགས་དང་གསང་བའི་ལས་ཁུངས་ཁག་ཅིག་གིས་ཟླ་འདིའི་ཚེས་ ༩ ཉིན་རྒྱ་ནག་དང་འབྲེལ་བ་ཡོད་པའི་དྲྭ་ཐོག་འཇབ་རྒོལ་བས་གསང་ལྟ་མཉེན་ཆས་རིགས་གཉིས་བེད་སྤྱོད་བཏང་སྟེ་ཡུ་གུར་བ་དང་། བོད་མི། ཐའེ་ཝན་མི་སེར་མཚོན་པའི་གཞུང་འབྲེལ་མ་ཡིན་པའི་ཚོགས་སྡེ་ཁག་ལ་གསང་ལྟ་བྱེད་བཞིན་ཡོད་པ་གསལ་བསྒྲགས་དང་། དེ་དོན་བྱེད་ཕྱོགས་སྐོར་ལམ་སྟོན་སྤེལ་འདུག

རྒྱ་ནག་གཞུང་གིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་དགོན་གྲོང་གཉིས་སུ་དགོངས་རྫོགས་མཆོད་འབུལ་མི་ཆོག་པ་སོགས་དམ་དྲག་ཤུགས་ཆེར་བྱེད་བཞིན་འདུག

རྒྱ་ནག་གཞུང་འབྲེལ་མགོ་ལོག་ཁུལ་དང་དགའ་བདེ་རྫོང་གི་ཉེན་རྟོག་པ་སོགས་མཉམ་འབྲེལ་ངང་དགོན་གྲོང་གཉིས་སུ་ཞིབ་བཤེར་དམ་དྲག་གིས་ལུང་སྔོན་དགོན་དུ་དགོངས་རྫོགས་མཆོད་འབུལ་མངོན་གསལ་དོད་པོས་བྱེད་བཅུག་གི་མེད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་འབྲེལ་ཡོད་ཁུངས་ལྡན་མི་སྣས་འགྲེལ་བརྗོད་གནང་བྱུང་།

བོད་རང་སྐྱོང་ལྗོངས་ཀྱི་ཚྭ་མཚོ་ཁར་ཞ་ཉེ་དཀར་པོའི་གཏེར་ཁ་སྔོག་འདོན་རྒྱ་ཆེར་བྱ་འཆར་གྱི་རིམ་པ་གཉིས་པར་སླེབས་པ་དེས། བོད་ཀྱི་ཁོར་ཡུག་ལ་གཏོར་སྐྱོན་ཚབས་ཆེན་ཐེབས་ངེས་ཡིན་པ་ཁོར་ཡུག་ཉམས་ཞིབ་པས་ངོས་འཛིན་གནང་གི་འདུག

བོད་རང་སྐྱོང་ལྗོངས་ཀྱི་ཚྭ་མཚོ་ཁར་ཞ་ཉེ་དཀར་པོའི་གཏེར་ཁ་སྔོག་འདོན་རྒྱ་ཆེར་བྱ་འཆར་གྱི་རིམ་པ་གཉིས་པར་སླེབས་པ་དེས་བོད་ཀྱི་ཁོར་ཡུག་དང་མི་མང་གི་བདེ་དོན་ཐོག་གཏོར་བཤིག་ཚབས་ཆེན་ཐེབས་ཉེན་ཆེ་ཞིང་། འདས་པའི་གནས་ཚུལ་ནང་བོད་ཀྱི་ས་ཆ་མི་ཉག་ལྷ་སྒང་དུ་ལི་ཐིམ་གྱི་གཏེར་ཁ་སྔོག་འདོན་གྱིས། གཏེར་རྫས་བཙག་འདོན་གྱི་བརྒྱུད་རིམ་ནང་ཆུ་ཧ་ཅང་མང་པོ་བེད་སྤྱོད་བཏང་བ་རྣམས་ལ་འབག་བཙོག་ཤོར་ཏེ་མི་ཕྱུགས་ལ་དུག་ཕོག་པའི་གནོད་འཚེ་ཐེབས་ཡོད་པ་ཁོར་ཡུག་ཉམས་ཞིབ་པས་ཉེན་བརྡ་བཏང་ཡོད།

གློ་སྒྲིག་འཛུགས་བྱམས་པ་གླིང་བོད་མིའི་གཞིས་ཆགས་དབུ་བརྙེས་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི།

བོད་བསྟན་སྲིད་སླད་གློ་མོན་ཐང་དུ་རྒྱ་ནག་ལ་ཁ་གཏད་ཀྱི་དམག་སྡེར་ཞུགས་མཁན་འཐབ་རྒོལ་བ་རྣམས་ཀྱི་ཆེད་བཙུགས་གློ་སྒྲིག་བྱམས་པ་གླིང་གཞིས་ཆགས་དབུ་བརྙེས་ཏེ་ལོ་ངོ་ ༥༠ འཁོར་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་བཀྲོངས་པའི་སྐོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་སེང་ཞུས་པར། མགོན་པོ་མཆོག་ནས་ཐུགས་སྨོན་མཛད་འདུག

བོད་མདོ་སྨད་མགོ་ལོག་གི་དགའ་བདེ་རྫོང་ལུང་སྔོན་དགོན་པའི་དགོན་བདག་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་བཀྲོངས་པར་གནས་ཚུལ་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་སེང་ཞུས་པར། མགོན་པོ་མཆོག་གིས་ཐུགས་ཕམ་དང་སྦྲགས་ཐུགས་སྨོན་མཛད་འདུག

ཨ་རིའི་ནིའུ་ཡོག་གྲོང་ཁྱེར་སྤྱི་ཁྱབ་ལས་ཁུངས་ཀྱིས་ས་གནས་སུ་བོད་སྐད་བཀོལ་སྤྱོད་གནང་མཁན་རྣམས་ཀྱི་ཆེད་བོད་སྐད་ཀྱི་ངོ་དེབ་དྲྭ་ཚིགས་ཤིག་གསར་བཟོ་གནང་འདུག

ཟླ་ ༣ ཚེས་ ༢༨ ཉིན་ཨ་རིའི་ནིའུ་ཡོག་གྲོང་ཁྱེར་སྤྱི་ཁྱབ་ལས་ཁུངས་ཀྱི་ཕྱི་མི་གནས་སྤོ་བའི་སྡེ་ཚན་ Mayor’s Office of Immigrant Affairs (MOIA) ནས་ནིའུ་ཡོག་ནང་གནས་སྡོད་བོད་པ་གཙོ་བོ་འགྱུར་བའི་ཧི་མ་ལ་ཡ་བོད་སྐད་བསྐྱོན་མཁན་གནས་སྤོ་བ་རྣམས་ཀྱི་ཕྱིར་ཞབས་ཞུ་སྒྲུབ་རྒྱུའི་སླད་སོ་སོའི་སྐད་ཡིག་གི་ཐོག་ནས་གྲོང་ཁྱེར་སྤྱི་ཡོངས་ཀྱི་གནས་ཚུལ་དང་གཞུང་འབྲེལ་གནད་དོན་སོགས་ཤེས་རྟོགས་ཐུབ་པའི་སླད་བོད་ཀྱི་སྐད་ཡིག་ཐོག་ཆེད་དུ་ངོ་དེབ་དྲྭ་ཚིགས་ཤིག་གསར་བཟོ་གནང་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་གློ་བུར་ལྐོག་གྱུར་ངང་སྐུ་གྲོངས་རྐྱེན་ཐད་རྒྱ་ནག་དང་ཝི་ཏི་ནམ་གཞུང་ལ་འགན་ཡོད་པས་ཕྱི་གསལ་ནང་གསལ་བཟོ་དགོས་པའི་སྐོར། བོད་མིའི་སྒྲིག་འཛུགས་ཀྱིས་འབོད་སྐུལ་གནང་།

རྒྱ་ནག་གིས་བོད་ཀྱི་ས་ཁུལ་གང་སར་ཉི་ནུས་གློག་འདོན་ས་ཚིགས་ཆེད་འཛུགས་བྱེད་བཞིན་པ་དེས་རྩ་ཐང་དང་སྐྱེས་ཁམས་ཁོར་ཡུག་ལ་གནོད་སྐྱོན་ཡོང་གི་ཡོད་པ། བོད་ནང་གི་བོད་མིས་འགྲེལ་བརྗོད་གནང་གི་འདུག

རྒྱ་ནག་གཞུང་གིས་བོད་ནང་ཉི་ནུས་གློག་འདོན་ས་ཚིགས་འབོར་ཆེན་ཆེད་འཛུགས་བྱེད་པར་བརྟེན་ཉེ་འཁོར་རྩ་ཐང་ཁག་ཏུ་རྩ་མི་སྐྱེས་བར་བྱེ་ཐང་ཅན་དུ་འགྱུར་བ་དང་། ལོ་གཅིག་གཉིས་རྗེས་མགྱིག་ཤེལ་གྱི་གད་སྙིགས་སོགས་ཀྱིས་ཁོར་ཡུག་ལ་གནོད་སྐྱོན་དང་། ཕྱུགས་ཟོག་སེམས་ཅན་འཚོ་གནས་མི་ཐུབ་པར་འབྲོག་པའི་འཚོ་བར་དོ་ཕོག་ཤུགས་ཆེར་འགྲོ་བཞིན་ཡོད་པ་རེད།