မန္တလေးအစိုးရရဲ့ ရသုံးမှန်းခြေ စာရင်းက ကျပ်သိန်းပေါင်း သုံးသောင်းကျော်ကို တိုင်းလွှတ်တော် ဖြတ်တောက်

"အများဆုံးဖြတ်တောက်တာဆိုရင် တိုင်းဒေသကြီးအစိုးရအဖွဲ့ရုံးက တင်ထားတဲ့ ခရိုင်မြို့နယ်ရုံး နှစ်ရုံး ကျပ်သိန်းပေါင်း သုံးသောင်းပေါ့ ဒါအများဆုံးပေါ့၊ တင်ပြထားတဲ့အထဲမှာလည်း ဘယ်ခရိုင် ဘယ်မြို့နယ် ဆိုတာ အသေးစိတ် မတင်ပြထားပါဘူး၊ မန္တလေးတိုင်းတစ်တိုင်းလုံးမှာလည်း မြို့နယ်ရုံးတွေက ရှိပြီး သားဖြစ်တဲ့အတွက် မလိုအပ်တဲ့အတွက် ဖြတ်တောက်တာပါ၊ ဖြတ်တောက်လိုက်တဲ့ သိန်းပေါင်း သုံးသောင်းကို ကျေးရွာပေါင်းတစ်ရာ မီးလင်းရေးလုပ်လို့ရပါတယ်၊ အဲဒီကိစ္စတွေမှာ ခေါင်းစဉ်ပြောင်း သုံးဖို့ကိုလည်း လွှတ်တော်က အတည်ပြုပေးထားပါတယ်" လို့ လွှတ်တော်မှာ ဘတ်ဂျတ်ကိစ္စနဲ့ ပတ်သက်ပြီး အဆိုတင်ဆွေနွေးခဲ့တဲ့ ချမ်းမြသာစည်မြို့နယ် မဲဆန္ဒနယ်အမှတ်(၂)က ဦးမြင့်အောင်မိုး က ပြောပါတယ်။

၂၀၁၇-၂၀၁၈ ဘဏ္ဍာနှစ်အတွက် မန္တလေးတိုင်းဒေသကြီး အစိုးရအဖွဲ့က တိုင်းဒေသကြီးအဆင့် ဌာန ၂၄ ခုရဲ့ ဘဏ္ဍာငွေ အရအသုံးခန့်မှန်းခြေစာရင်းအနေနဲ့ ကျပ် ၁၀၈ ဘီလီယံ ကျော်တောင်းခံခဲ့တဲ့အပေါ် ဒီနေ့ ကျင်းပတဲ့ မန္တလေးတိုင်းဒေသကြီးလွှတ်တော်မှာ လွှတ်တော်ကိုယ်စားလှယ် ၁၀ ဦးက ဆွေးနွေးခဲ့ကြတာဖြစ်ပါတယ်။

၂၀၁၇-၂၀၁၈ ဘဏ္ဍာနှစ်အတွက် တိုင်းဒေသကြီးအသီးသီးရေးဆွဲရမယ့် ဘတ်ဂျက်ဘဏ္ဍာရေးမူအရ အသုံး စာရင်းတွေကို ပြည်ထောင်စုအစိုးရကို ဒီလ ၁၀ ရက်နေ့ နောက်ဆုံးထားပေးပို့ရမှာဖြစ်လို့ မန္တလေးတိုင်းဒေသကြီး ရဲ့ ၂၀၁၇-၂၀၁၈ ဘဏ္ဍာနှစ် မူလအရအသုံးခန့်မှန်းခြေ လျာထားချက်စာရင်းကို ဆွေးနွေးအတည်ပြုနိုင်ဖို့ ဒီလ ၈ ရက်နဲ့ ၉ ရက်နေ့မှာ တိုင်းဒေသကြီးလွှတ်တော် အရေးပေါ်အစည်းအဝေး ခေါ်ယူခဲ့တာဖြစ်ပါတယ်။