မြန်မာနိုင်ငံ ရုပ်ရှင်အစည်းအရုံးမြေနေရာ အင်အားသုံးဖယ်ရှား

ရန်ကုန်တိုင်းဒေသကြီး လှည်းကူးမြို့နယ်၊ ကြက်ချောင်းကျေးရွာမှာ မြန်မာနိုင်ငံ ရုပ်ရှင်အစည်းအရုံးအတွက်လျာထား တဲ့ မြေဧက ၂၀၀ ထဲမှာ ဝင်ရောက် ဆောက်လုပ်ထားတဲ့ တဲအိမ်တွေကို မြို့နယ်စည်ပင်ဝန်ထမ်း ၅၀၀ လောက်က ဖြိုချခဲ့ပါတယ်။

အဲဒီမြေနေရာမှာ နေထိုင်လာတဲ့နှစ်ကြာပြီဖြစ်တဲ့အတွက် မပြောင်းပေးနိုင်ဘူးလို့ ငြင်းဆန်ခဲ့တဲ့တာကြောင့် အခုလို ဖျက်ဆီးခံရတာဖြစ်တယ်လို့ တဲအိမ် ဖျက်ဆီးခံရသူ ဦးကောက်ကွေး က ပြောပါတယ်။

"ဟိုတုန်းကလည်း ဒေသခံတွေဖြစ်တယ်လေ၊ အဲ့ဒါကို ကျနော်တို့ကလည်း စိုက်ပျိုးမြေအဖြစ်နဲ့ တင်ထားပြီး သွားပြီ၊ တင်ထားပြီးသားကို သူတို့ပိုင်ပါတယ်၊ သူတို့နေရာဆို ပြီးတော့ ကျနော်တို့ကို ကျူးကျော်သူအဖြစ်နဲ့ လူပေါင်း ၅၀၀ ကျော်ခန့်လာပြီးတော့ ဖျက်ဆီးတာပါခင်ဗျာ၊ အထွေထွေအုပ်ချုပ်ရေးတွေရော၊ ဒေသခံ အုပ်ချုပ်ရေးတွေရော၊ ကျနော်တို့ကို ပို့တဲ့စာလုံးဝမရှိပါဘူးခင်ဗျ၊ ကျနော်တို့ကြတော့ ကျူးကျော်တယ် တဲ့၊ ဒေသခံတွေနော်၊ ရုပ်ရှင်ကောင်စီကရော မကျူးကျော်ဘူးလားဆိုတော့ နိုင်ငံတော် သမ္မတကြီး က နှုတ်မိန့်နဲ့ ပေးထားလို့ပါလို့ပြောတယ်"

အဲဒီမြေနေရာမှာ အရင်က ယာလုပ်ငန်းလုပ်ကိုင်ခဲ့တာဖြစ်ပြီး ပြီးခဲ့တဲ့ ၂၀၀၆ ခုနှစ်က ကြက်ဆူပင် စီမံကိန်းအတွက် သိမ်းဆည်းခံခဲ့ရတာဖြစ်တယ်လို့ သိရပါတယ်။

အဲဒီနောက် ကြက်ဆူစိုက်ခင်းတွေ မရှိတော့တာကြောင့် ဒီနှစ်ဆန်းပိုင်းမှာ ပြန်လည် ဝင်ရောက်နေထိုင်ကြတာဖြစ်ပြီး တရားဝင်နေထိုင်ခွင့်ရဖို့ လျှောက်ထား ဆဲဖြစ်ပါတယ်။

အဲဒီမြေဧက ၂၀၀ ကို နိုင်ငံတော်သမ္မတက မြန်မာနိုင်ငံ ရုပ်ရှင်အစည်းအရုံးကို ပြီးခဲ့တဲ့ နှစ်က ပေးအပ်ခဲ့တာဖြစ်ပါတယ်။