ပဲခူးတိုင်းမှာ တစ်ရက်အတွင်း အုပ်ချုပ်ရေးအဖွဲ့ဝင်နှစ်ဦး သတ်ဖြတ်ခံရ

ပဲခူးတိုင်းအနောက်ခြမ်း ပေါက်ခေါင်းမြို့နယ်နဲ့ သဲကုန်းမြို့နယ်တွေမှာ မေလ ၃၁ ရက်နေ့ တစ်ရက်တည်းမှာပဲ စစ်ကောင်စီအတွက် စစ်သားစုဆောင်းပေးတာတွေ လုပ်နေတယ်ဆိုတဲ့ စွပ်စွဲချက်နဲ့ ရပ်/ကျေး အုပ်ချုပ်ရေး အဖွဲ့ဝင် နှစ်ဦး သတ်ဖြတ်ခံခဲ့ရတယ်လို့ ဒေသခံတွေက ပြောပါတယ်။

ပေါက်ခေါင်းမြို့နယ် ကြို့ပင်ဝိုင်းကျေးရွာအုပ်စု အုပ်ချုပ်ရေးမှူး ဦးညွန့်စိုး နဲ့ သဲကုန်းမြို့နယ် ဓားသွေးကျောက်ရွာ က ရာအိမ်မှူး ဦးအောင်ဝင်းတို့ကို ဒေသအခြေစိုက် ကာကွယ်ရေးတပ်ဖွဲ့ဝင်တွေက ပစ်ခတ်သတ်ဖြတ်ခဲ့တာလို့ ဆိုပါတယ်။

ပြည်ခရိုင် ပြည်သူ့ကာကွယ်ရေးတပ်မတော်ရဲ့ ပြန်ကြားရေးတာဝန်ခံကကတော့ ပဲခူးတိုင်းထဲက ရပ်/ကျေးအဆင့် အုပ်ချုပ်ရေးအဖွဲ့ဝင်တွေဟာ စစ်ကောင်စီအတွက် လူသစ်စုဆောင်ပေးတာတွေကို ဒီရက်ပိုင်း ဖိဖိစီးစီးလုပ်လာတယ်လို့ ဆိုပါတယ်။

“အုပ်ချုပ်ရေးမှူးတွေ၊ ရာအိမ်မှူးတွေက စစ်မှုထမ်းဖို့အတွက် လူစုပေးရုံတင်မကဘူး စစ်သားတွေနဲ့ ရောထွေးပြီး တော်လှန်ရေးတပ်ဖွဲ့ဝင်တွေရဲ့ မိသားစုဝင်တွေကို ရွာထဲမှာနေထိုင်မရအောင်အမျိုးမျိုးနှောင့်ယှက်တယ်။ သူတို့ကြောင့် ဖမ်းခံရပြီး စစ်ကြောရေးမှာ သေဆုံးတဲ့သူတွေလည်း ရှိနေတယ်”

ဒီကိစ္စနဲ့ပတ်သက်ပြီး တုံ့ပြန်ချက်ရနိုင်ဖို့ စစ်ကောင်စီရဲ့ ပဲခူးတိုင်းပြောခွင့်ရသူ စီးပွားရေးဝန်ကြီး ဦးတင်ဦးကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုခြင်း မရှိပါဘူး။

မေလ ၂ ရက်နေ့ကလည်း ပဲခူးတိုင်းအနောက်ခြမ်း၊ သာယာဝတီခရိုင်၊ အုတ်ဖိုမြို့နယ် ရွာသစ်ကျေးရွာ ရာအိမ်မှူး ဦးမြင့်အောင်ကို စစ်ကောင်စီတပ်အတွက် စစ်သားစုဆောင်းတာတွေ လုပ်နေလို့ဆိုပြီး ဒေသကာကွယ်ရေး အဖွဲ့တစ်ခုက ပစ်သတ်လိုက်တယ်လို့ အုတ်ဖိုမြို့ခံတွေက ပြောပါတယ်။

RFA က ပြုစုထားတဲ့စာရင်းတွေအရ စစ်မှုထမ်းဥပဒေပြဋ္ဌာန်းတဲ့ ၂၀၂၄ ခုနှစ်၊ ဖေဖော်ဝါရီလ ၁၀ ရက်နေ့ကနေ မေလ ၄ ရက်အထိ နှစ်လကျော်အတွင်း ပြည်သူ့စစ်မှုထမ်းဥပဒေကို အကောင်အထည်ဖော်လို့ဆိုပြီး နိုင်ငံတစ်ဝန်းက အုပ်ချုပ်ရေးအဖွဲ့ဝင် ၆၂ ဦး သတ်ဖြတ်ခံထားရပါတယ်။