စိုက်ပျိုးစရိတ်ချေးငွေ မမျှတမှု သမ္မတကြီးထံ တိုင်ကြား

"ကျွန်တော်တို့ ဇီးကုန်းမြို့ အရှေ့ဘက်မှာလေ၊ ကန်ကြီးကြိုးဝိုင်း ရှိတယ်လေ။ ကြိုးဝိုင်းပျက်သွားတဲ့ အခါကျတော့ အဲဒီမှာ ဝင်ပြီးတော့ လယ်တွေ လုပ်နေကြတာ တစ်ယောက်ကို ၁၀ ဧကတို့၊ ၅ ဧကတို့ အားလုံးပေါင်း ဧက ၅၀၀၀ နီးပါးခန့် ရှိပါတယ်။ အဲဒီ ဧက ၅၀၀၀ နီးပါးခန့်မှာ ဧက ၁၀၀ ကျော်ကျော်လောက်က စိုက်ပျိုးစရိတ်ကို မရရှိဘူးခင်ဗျ။ စိုက်ပျိုးငွေ ထုတ်မပေးတာ။ အဲတာကြောင့်မို့လို့ ဆိတ်ဖူးကျင်း ကျေးရွာအုပ်စု ကန်ကြီးကျေးရွာနေ လယ်သမားကြီး ၄၄ ဦးက သမ္မတကြီး အပါအဝင် ဌာနပေါင်း ၂၂ ဌာနကို ကျွန်တော်တို့ တိုင်ကြားပါတယ်ခင်ဗျ"

ခုလို ပြဿနာတွေ ဖြစ်ပေါ်ရမှုရဲ့ အခြေခံဟာ ကျေးရွာအဆင့် အာဏာပိုင်တွေရဲ့ လုပ်ဆောင်ချက်ကြောင့် ဖြစ်တယ်လို့လည်း သိရပါတယ်။

"အုပ်ချုပ်ရေးမှူးတွေ၊ ဘဏ်ကော်မတီဝင်တွေ ရှိတယ်။ ရပ်ကျေးကနေပြီးတော့၊ အဲလူတွေက နေပြီးတော့ သူတို့က ဖြတ်စားလျှပ်စား လုပ်တာပေါ့။ ဘဏ်ချေးငွေ လိုချင်လို့ရှိရင် တစ်ဧကကို ၂၀၀ ပေးရမယ်လို့။ ကျွန်တော်တို့ မြို့နယ်မှာက အားလုံးပေါင်း ဧက ၅၀၀၀၀ လောက်ရှိတယ်ဆိုတော့နော်။ လယ်သမားနစ်နာတာပေါ့နော်။ နောက်တခုဖြစ်နေတာက ၁၀ ဧကရှိတဲ့သူကလည်း ၁၀ ဧက တန်ဖိုးကို မရဘူးပေါ့။ အဲဒီငွေတွေကို ဒီကျေးရွာ အုပ်ချုပ်ရေးမှူးရယ်၊ အောက်ခြေကရှိတဲ့ ဘဏ်ကော်မတီကနေပြီးတော့ သူတို့ ထုတ်သုံးတာပေါ့။ အတိုးနှုန်းက ၂ ကျပ်တိုးဆိုတော့"

ဇီးကုန်းမြို့နယ် ကန်ကလေး ကျေးရွာအုပ်စု၊ ကန်ကလေးကျေးရွာက လယ်သမားကြီး အယောက် ၂၀ က မိမိတို့စိုက်ပျိုးစရိတ် ချေးငွေများ မရရှိတဲ့ကိစ္စနဲ့ပတ်သက်လို့ အထက် အာဏာပိုင်တွေကို ပြီးခဲ့တဲ့ ရက်သတ္တပတ် တစ်ပတ်ကျော်က တင်ပြ တိုင်ကြားခဲ့ရာမှာ မြို့နယ် မြေစာရင်းဦးစီးဌာနက ဒီကိစ္စနဲ့ ပတ်သက်ပြီး ကနေ့ခေါ်ယူ စစ်ဆေးနေတယ်လို့လည်း သိရှိရပါတယ်