စစ်အစိုးရအပေါ် စုံစမ်းရေးကော်မရှင် ဖွဲ့ဖို့ ပြင်သစ်ထောက်ခံ

အလားတူပဲ ပြီးခဲ့တဲ့ စက်တင်ဘာ ၁၇ ရက်နေ့က ကျင်းပတဲ့ ဆွစ်ဇာလန်နိုင်ငံ ဂျီနီဗာမြို့မှာ ကျင်းပတဲ့ ကုလသမဂ္ဂ လူ့အခွင့်အရေးကောင်စီၤ ညီလာခံမှာလည်း ပြင်သစ်သံအမတ်ကြီးက မြန်မာနိုင်ငံက လူ့အခွင့်အရေး စနစ်တကျ ချိုးဖောက်မှုတွေရှိနေကြောင်း၊ ကုလသမဂ္ဂ လူ့အခွင့်အရေး အထူးကိုယ်စားလှယ် အဆိုပြုထားတဲ့ စုံစမ်းရေးကော်မရှင်ဖွဲ့ဖို့ ကိစ္စကို ပြင်သစ်က ထောက်ခံကြောင်း ပြောကြားခဲ့ပါတယ်။

ပြင်သစ်က ထောက်ခံတာဟာ မြန်မာ့အရေးအတွက် အရေးကြီးတဲ့ ခြေလှမ်းတခုပါလို့ အမေရိကန်အခြေစိုက် မြန်မာ့အရေးလှုပ်ရှားမှုအဖွဲ့က ဦးအောင်ဒင်က ပြောပါတယ်။

“ဟုတ်ကဲ့၊ ဒါကတော့ အင်မတန် အရေးကြီးတဲ့ တိုးတက်မှု တရပ်ပါပဲ။ ကုလသမဂ္ဂ စုံစမ်းစစ်ဆေးရေး ကော်မရှင် ဖွဲ့စည်းရေး ကိစ္စကို ထောက်ခံတာ အခု ဒီ နောက်ဆုံး ထောက်ခံတဲ့ ပြင်သစ်နိုင်ငံ ပါလို့ရှိရင် ၁၀ နိုင်ငံ ရှိသွားပြီပေါ့။ ဆိုတော့ ဒီ နိုင်ငံတွေရဲ့ ထောက်ခံမှုက အင်မတန် အရေးကြီးပါတယ်။ နောက် ဒီနိုင်ငံတွေကလည်း အားကောင်းတဲ့ နိုင်ငံတွေ ဖြစ်တဲ့အခါကျတော့ ဒီ ၁၀ နိုင်ငံက နေပြီးတော့ ဒီထက် ပိုများတဲ့ နိုင်ငံတွေ ပိုပြီး ထောက်ခံလာလိမ့်မယ်လို့ ကျွန်တော်တို့က ယုံကြည်တယ်။ အဲဒီလို ထောက်ခံတဲ့ နိုင်ငံတွေ များလာတာနဲ့အမျှ အခု ကုလသမဂ္ဂကနေပြီးတော့ ဒီ မြန်မာနိုင်ငံမှာ ဖြစ်ပေါ်နေတဲ့ ဒီ လူသားမျိုးနွယ်စု တရပ်လုံးကို ပစ်မှတ်ထားပြီး ကျူးလွန်နေတဲ့ ရာဇဝတ်မှုတွေ၊ စစ်ရာဇဝတ်မှုတွေကို စုံစမ်းစစ်ဆေးဖို့အတွက် ကော်မရှင် ဖွဲ့ရေးကိစ္စနဲ့ ပတ်သက်ပြီး ဒီ ဆုံးဖြတ်ချက်တရပ် ချနိုင်ဖို့ အခြေအနေက ပိုပြီးတော့ နီးကပ်လာတယ်လို့တော့ ကျွန်တော်တော့ မြင်တယ်ဗျ။”

ပြင်သစ်အစိုးရက ဒီလိုထောက်ခံတာနဲ့ပတ်သက်ပြီး ပြင်သစ်အခြေစိုက် လူ့အခွင့်အရေးအဖွဲ့တွေ ဖြစ်တဲ့ FIDH, Info-Birmanie, ပြင်သစ် လူ့အခွင့်အရေး အဖွဲ့ချုပ်နဲ့ လူ့အခွင့်အရေး စောင့်ကြည့်ရေးအဖွဲ့ (Human Rights Watch) အဖွဲ့ခွဲတို့က ကြိုဆိုလိုက်ပါတယ်။