ကုမ္ပဏီအားလုံး တန်းတူအခွင့်အရေးပေးမယ်လို့ အတိုင်ပင်ခံရုံးဝန်ကြီးပြော

မြန်မာအစိုးရက တရုတ်ဟွာဝေးအပါအဝင် ကုမ္ပဏီအားလုံးကို တန်းတူယှဉ်ပြိုင်ခွင့်ပေးမယ်လို့ ဝန်ကြီး ဦးကျော်တင့်ဆွေက ဒီကနေ့ ဂျပန်နိုင်ငံ တိုကျိုမြို့မှာ ကျင်းပနေတဲ့ အာရှအနာဂတ်ညီလာခံအတွင်း Nikkei Asian Review နဲ့မေးမြန်းခန်းမှာ ပြောလိုက်ပါတယ်။

ကုန်သွယ်ရေးမှာ မြန်မာက သာတူညီမျှမှုနဲ့ အပြန်အလှန်အကျိုးရှိမှုကို အခြေခံထားတယ်လို့ ဆိုပါတယ်။ ဟွာဝေးကုမ္ပဏီပစ္စည်းတွေ လုံခြုံမှုမရှိဘူးလို့ အမေရိကန်က ပြောဆိုထားတယ်။ ဒါကိုစိတ်မပူဘူးလားဆိုတော့ ဘယ်လောက်အကျိုးသက်ရောက်မှုရှိလဲ စောင့်ကြည့်ရမယ် အခုပြောဖု့ိသိပ်စောသေးတယ်လို့ပြောပါတယ်။

အမေရိကန်နဲ့တရုတ် ကုန်သွယ်ရေးစစ်ပွဲကြောင့်  မြန်မာနိုင်ငံရဲ့စီးပွားရေးကို ထိခိုက်နိုင်စရာမရှိဘူးလို့ ပြည်ထောင်စုဝန်ကြီး ဦးကျော်တင့်ဆွေက ပြောပါတယ်။

မြန်မာက အဓိကစိုက်ပျိုးထွက်ကုန်နဲ့ အခြေခံကုန်ပစ္စည်းလောက်ပဲ တရုတ်ကို တင်ပို့တာပါလို့ ဆိုပါတယ်။ ဒါ့အပြင် မြန်မာပြည်ကို နိုင်ငံခြားကလာပြီး ရင်းနှီးမြှုပ်နှံတဲ့ကုမ္ပဏီတွေ တနေ့တခြား များပြားလာနေပါတယ်လို့လည်း ဝန်ကြီးဦးကျော်တင့်ဆွေက ပြောသွားပါတယ်။