ကန့်ဘလူမြို့နယ်က ၁၃ နှစ်အရွယ် ကလေးငယ်တစ်ဦး သတ်ဖြတ်ခံရ

စစ်ကိုင်းတိုင်း၊ ကန့်ဘလူမြို့နယ်၊ ဇီးပင်သာရွာက အသက် ၁၃ နှစ်အရွယ် ခြောက်တန်း ကျောင်းသားတစ်ဦးကို စစ်ကောင်စီတပ်က ဒီဇင်ဘာလ ၁၉ ရက်ညပိုင်းမှာ သေနတ်နဲ့ ပစ်သတ်ခဲ့တယ်လို့ ဒေသခံတွေက RFA ကိုပြောပါတယ်။

စစ်ကောင်စီတပ်သားတွေ ဇီးပင်သာရွာထဲ ဝင်လာချိန်မှာ ပုန်းအောင်းနေတဲ့ မောင်သုတဇော် ဖမ်းဆီးသတ်ဖြတ်ခံလိုက်ရတာလို့ ကန့်ဘလူဒေသခံတစ်ဦးက ပြောပါတယ်။

“ အဲဒီညက ရှစ်နာရီခွဲလောက် ရွာထဲကိုဝင်လာတာ။ ဇီးပင်သာကျေးရွာမှာ ဒေသကာကွယ်ရေး တပ်ဖွဲ့မရှိဘူး။ ရွာထဲဝင်ပြီးမီးရှို့တာ။ ရွာသားတွေကတော့ပြေးကြ၊ ရှောင်ကြရတာပေါ့။ အဲဒီမှာ ကလေးတစ်ယောက်ကတော့ သူတို့တွေ့သွားပြီး ပစ်သတ်ခံလိုက်ရတယ်”

ရွာထဲက နေအိမ်သုံးလုံးလည်း မီးရှို့ဖျက်ဆီးခံလိုက်ရတယ်လို့ ဆိုပါတယ်။

ဒီကိစ္စနဲ့ ပတ်သက်လို့ RFA က ဒီကနေ့ ညနေပိုင်းမှာ စစ်ကောင်စီ စစ်ကိုင်းတိုင်း ပြောရေးဆိုခွင့်ရှိသူ ဦးအေးလှိုင်ကို ဖုန်းနဲ့ ဆက်သွယ်မေးမြန်းခဲ့ပေမယ့် လက်ခံဖြေဆိုတာ မရှိပါဘူး။

အာဏာသိမ်းပြီးနောက် စစ်ကောင်စီတပ်ရဲ့ ပစ်ခတ်နှိမ်နင်းမှုနဲ့ ဖမ်းဆီးနှိပ်စက်မှု တွေကြောင့် စစ်ကိုင်းတိုင်းက အရပ်သား ၁၀၀၃ ဦးသေဆုံးခဲ့တယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) က ဒီဇင်ဘာလ ၂၀ ရက်မှာ ထုတ်ပြန်ထားပါတယ်။