ကျိုက်ထိုမြို့မှာ ရေလွှမ်းမိုးမှုဖြစ်

"သူတို့ကို အကုန်လုံးအဆင်ပြေအောင် လုပ်ထားပေးတယ်၊ ကယ်ဆယ်ရေးစခန်း ဖွင့်ထားပေးတယ်၊ ကျန်းမာရေးစောင့်ရှောက်မှုတွေလည်း ပေးထားပေးတယ်။ အစားအသောက်တွေလည်း ထောက်ပံ့ပေး တယ်၊ အခုက အရင်က ရွာထားတဲ့ရေတွေရယ်၊ တောင်ကျရေတွေရယ်၊ ချောင်းတွေ မြောင်းတွေက လျှံတဲ့ရေတွေရယ် အဲ့လိုမျိုးဖြစ်တာ"

ကျိုက်ထိုမြို့နယ်က အနိမ့်ပိုင်းရပ်ကွက်တွေဖြစ်တဲ့ ဇေယျာမွန်၊ တောင်သူစု၊ကော့စံနိုင်၊ မြောက်ပိုင်း စတဲ့ ရပ်ကွက် ၄ ခုနဲ့ ဖက္ကလိပ်ကျေးရွာ၊မုပ္ပလင် ကျေးရွာတို့မှာ ရေနစ်မြုပ်နေတာဖြစ်ပါတယ်။

ကယ်ဆယ်ရေးနှင့် ပြန်လည်နေရာချထားရေး ဦးစီးဌာန (မွန်ပြည်နယ်)က ရေဘေးရှောင်လာသူတစ်ဦးကို တစ်ပတ်စာ ငွေကျပ် ၂၁၀၀ နှုန်းနဲ့ ကျပ် ၅၉ သိန်း ဒီနေ့ ထောက်ပံ့ပေးခဲ့တယ်လို့ ပြည်နယ်မှူး ဦးသောင်းရွှေ ကပြောပါတယ်။

စစ်ကိုင်း၊ မကွေး၊ ပဲခူးနဲ့ ကရင်စတဲ့ ပြည်နယ်နဲ့ တိုင်းဒေသကြီးတွေမှာလည်း မြစ်ရေမြင့်တက်တာကြောင့် ဇူလိုင် ၁၉ ရက်နေ့အထိ ရေဘေးဒုက္ခသည် ၈၂ဝဝဝ ကျော်အထိ ရှိလာတယ်လို့ လူမှုဝန်ထမ်းကယ်ဆယ်ရေးနဲ့ ပြန် လည်နေရာချထားရေး ဦးစီးဌာနကနေ သိရပါတယ်။