လယ်ယာမြေပြဿနာတွေ ဖြေရှင်း ဖို့ တိုင်းအစိုးရကို သူရဦးရွှေမန်း တိုက်တွန်း

ဧရာဝတီတိုင်းအတွင်းမှာ ဖြစ်ပေါ်နေတဲ့ လယ် ယာမြေပြဿနာတွေကို တိုင်းဒေသကြီးအစိုးရအဖွဲ့ အနေနဲ့ ဖြေရှင်းဆောင်ရွက်ပေးဖို့ ပြည်သူ့လွှတ်တော် ဥက္ကဌ သူရဦးရွှေမန်းက ဒီနေ့ တိုက်တွန်းလိုက်ပါတယ်။

ပြည်သူ့လွှတ်တော် ဥက္ကဌ သူရဦးရွှေမန်းက ပုသိမ်မြို့၊ ကန်သာယာဗိုလ်ချုပ်ကြေးရုပ်ကွင်းမှာ ဧရာဝတီတိုင်းဒေ သကြီး အစိုးရအဖွဲ့ဝင်တွေ၊ လယ်သမားတွေနဲ့တွေ့ဆုံ စဉ် ပြောကြားခဲ့တာဖြစ်တယ်လို့ အခမ်းအနားကို တက်ရောက်ခဲ့တဲ့ လွှတ်တော်ကိုယ်စားလှယ် ဦးထိန်လင်း က ပြောပါတယ်။

" ကျနော်တို့ ဧရာဝတီတိုင်းဒေသကြီးမှာ တောင်သူ လယ်သမားတွေရဲ့ဘဝနဲ့ လယ်ယာကဏ္ဍဖွံ့ဖြိုး တိုးတက်ဖို့ ဆိုတာကို သူရှေးရှုပါတယ်၊ ကျနော်တို့ တိုင်းဒေသကြီးမှာဖြစ်နေတဲ့ လယ်သမားတွေလိုအပ်နေတဲ့၊ လယ်သမားတွေသိချင်နေတဲ့ လယ်ယာမြေပြဿနာတွေက များနေတာကို ဥက္ကဌကြီးအနေနဲ့ ပြောပါတယ်၊ ဒါနဲ့အခြေခံပြီးဖြေရှင်းဖို့ကို အစိုးရအဖွဲ့ကိုလဲ သူတိုက်တွန်းသွားပါတယ်၊ ရဲရဲဝံ့ဝံ့နဲ့ ဆုံးဖြတ်ချက်ချလုပ်ဖို့ ကိုလဲ ပြောသွားတာရှိပါတယ်"

ဒါ့အပြင် လယ်ယာမြေပိုင်ဆိုင်ခွင့် ပုံစံ ၇ ရရှိထားတဲ့ လယ်သမားတွေကို အစိုးရပိုင်ဘဏ်တွေကနေ ငွေ ထုတ်ချေးနိုင်အောင် စီစဉ်ပေးဖို့လိုအပ်ကြောင်းလည်း သူရဦးရွှေမန်းက တိုင်းဒေသကြီးအစိုးရအဖွဲ့ကို တိုက်တွန်း ခဲ့ပါတယ်။

အခမ်းအနားကို ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီ ဒုတိယဥက္ကဌ ဦးဌေးဦး၊ ဧရာဝတီတိုင်းဒေသကြီး ဝန်ကြီးချုပ် ဦးသိန်းအောင်နဲ့အဖွဲ့တွေအပြင် ခရိုင် ၆ ခုက လယ်သမားကိုယ်စားလှယ် ၅၀၀၀ ကျော် တက်ရောက်ခဲ့တယ်လို့ သိရပါတယ်။

ဒီကနေ့ဆွေးနွေးပွဲကို တက်ရောက်ခဲ့တဲ့ ဧရာဝတီတိုင်းဒေသကြီး လွှတ်တော်ကိုယ်စားလှယ် ဦးထိန်လင်းကို RFA သတင်းထောက် မစန်းမော်အောင် ဆက်သွယ်မေးမြန်းထားတာ နားဆင်နိုင်ပါတယ်။