ရခိုင်ဒေသ တိုက်ပွဲရပ်နေတာကနေ ငြိမ်းချမ်းရေးရဖို့ တပ်မတော် မျှော်လင့်

ရခိုင်ပြည်နယ်မြောက်ပိုင်းမှာ ထိုးစစ်တွေရပ်တန့်ပြီး ရွေးကောက်ပွဲ ပြန်ကျင်းပပေးဖို့ ရက္ခိုင့်တပ်တော် AA ရဲ့ တောင်းဆိုချက်ကို တပ်မတော်ဘက်က ကြိုဆိုကြောင်း အပြန်အလှန်ကြေငြာချက်တွေ ထုတ်ပြန်ပြီးတဲ့ နောက်ပိုင်း ရခိုင်ပြည်နယ်မှာ လက်တွေ့ တိုက်ပွဲတွေမဖြစ်တာ ရက်ပေါင်း ၂၀ ကျော်လာပါပြီ။

အခုလိုအခြေအနေဟာ အရင်က တစ်ခါမှ မရှိခဲ့ဖူးတာကြောင့်၊ ဒီအခြေအနေကနေတဆင့် ငြိမ်းချမ်းရေးအတွက် ပိုကောင်းလာဖို့ မျှော်လင့်တယ်လို့ နိုဝင်ဘာ ၂၇ ရက်နေ့က နေပြည်တော်မှာလုပ်တဲ့ သတင်းစာရှင်းလင်းပွဲအတွင်း တပ်မတော်သတင်းမှန် ပြန်ကြားရေးဥက္ကဋ္ဌ ဗိုလ်ချုပ်ဇော်မင်းထွန်းက ပြောပါတယ်။

"ကောင်းတဲ့အခြေအနေလို့ မြင်တယ်၊ကျ‌နော်တို့အနေနဲ့ စေ့စပ်ညှိနှိုင်းမှုတွေ ဆွေးနွေးမှုတွေ လုပ်ခဲ့တယ်။ ဒါပေမဲ့ ဒီလိုမျိုးပေါ့နော်၊ နယ်မြေဒေသကြီး တစ်ခုလုံးကို ဒီနေ့ဆိုရင် ၂၀ ရက်ကျော်ပြီဆိုတော့ စစ်မြေပြင်မှာတော့ တိုက်ပွဲမဖြစ်ပွားခြင်းကတော့ ကျနော်တို့ စစ်သားတွေ အယူအဆအနေနဲ့ကတော့ တိုက်ပွဲမဖြစ်ပွားခြင်းက တစ်မိနစ်တိုက်ပွဲ မဖြစ်ပွားလေ တစ်မိနစ် အကျိုးရှိလေပဲ ဒေသခံပြည်သူတွေလည်း အဲလိုပဲ ဖြစ်မှာပဲ ။ ဒါမျိုး အထိ လုပ်နိုင်တာသည် မရှိခဲ့ဖူးပါဘူး။ မရှိခဲ့ဘူးတဲ့အတွက်ကြောင့် တချို့နေရာတွေမှာ အခုချိန်ထိ ရနေပြီပြောတယ်၊ ငြိမ်းချမ်းရေး အပစ်အခတ်ရပ်စဲထားတယ် ပြောတယ် ဖြစ်နေစဲပဲဖြစ်ပါတယ်။ ဒီလိုအခြေအနေထိ လဝက်ကျော်လောက်ထိ ဒီအခြေအနေကို ထိန်းသိမ်းထားနိုင်တယ် ဆိုတာသည် နည်းတဲ့ အဆင့်မဟုတ်ဘဲ နှစ်ဖက် လိုက်နာဆောင်ရွက်မှု ကောင်းလို့ဖြစ်ပါတယ်။ ဒီကနေ တဆင့် ပိုပြီးတော့ ကောင်းလာနိုင်မယ်လို့ မျှော်လင့်တယ်။"

တပ်မတော်နဲ့ AA အကြားမှာ လတ်တလော တိုက်ရိုက်တွေ့ဆုံ ညှိနှိုင်းတာမျိုး မရှိပေမယ့် ကြားခံအဖွဲ့အစည်းတွေကတဆင့် ညှိနှိုင်းဆောင်ရွက်တာတွေ ရှိနေတယ်လို့လည်း ဗိုလ်ချုပ်ဇော်မင်းထွန်းက ပြောပါတယ်။

ဘယ်အဖွဲ့အစည်း လူပုဂ္ဂိုလ်တွေက ညှိနှိုင်းဆောင်ရွက်ပေးနေသလဲ ဆိုတာကိုတော့ ထုတ်ဖော်ပြောကြားခြင်းမရှိပါဘူး။

“ပထမဆုံး အရေးကြီးတာက နှစ်ဖက်ထိတွေ့တိုက်ပွဲ ဖြစ်ပွားနေတဲ့ နေရာတွေမှာ သေနတ်သံတိတ်သွားဖို့နဲ့ အဲလိုသေနတ်သံတိတ်ဖို့အတွက် နှစ်ဖက်လုံးက လိုက်နာစောင့်ထိန်းဖို့လိုကြောင်း၊ ဒီလို လိုက်နာနိုင်ဖို့ကလည်း တကယ်မြေပြင်မှာ ထိတွေ့နေတဲ့ တပ်နှစ်တပ် မြေပြင်မှာ အပစ်ရပ်ဖို့ ညှိနှိုင်းဆွေးနွေးရမှာဖြစ်ကြောင်းနဲ့ အောက်ခြေမှာ ပြေလည်မှ မူဝါဒပိုင်း ဆောင်ရွက်သူတွေလည်း ဆောင်ရွက်လို့ အဆင်ပြေမှာဖြစ်တာကြောင့် အောက်ခြေအဆင့်မှာ အရင်ဆုံး ပြေလည်အောင် ဆောင်ရွက်သင့်တယ်လို့ လည်း “ဗိုလ်ချုပ်ဇော်မင်းထွန်းက ပြောသွားပါတယ်။"

ယုံကြည်မှု တည်ဆောက်တဲ့အနေနဲ့ တိုက်ခိုက်မှုတွေကို နှစ်ဖက်လုံးက ရပ်ထားတဲ့အကြောင်း ရက္ခိုင့်တပ်တော် ပြောရေးဆိုခွင့်ရှိသူ ဦးခိုင်သုခကလည်း အတည်ပြုပါတယ်။

ရခိုင်ပြည်နယ်မှာ ပြီးခဲ့တဲ့ ၂၀၁၉ တစ်နှစ်လုံးနီးပါး AA နဲ့ တပ်မတော်တို့အကြား တိုက်ပွဲတွေ ပြင်းထန်ခဲ့ပြီးတဲ့နောက်၊ ၂၀၂၀ မတ်လ ၂၃ ရက်နေ့မှာ အစိုးရက AA ကို အကြမ်းဖက်အဖွဲ့အဖြစ် အစိုးရကသတ်မှတ်ကြေငြာခဲ့ပါတယ်။

နိုင်ငံရေး လေ့လာသုံးသပ်သူ ဦးမောင်မောင်စိုး ကတော့ လက်ရှိ ကောင်းမွန်နေတဲ့ အခြေအနေကတဆင့် အပစ်အခတ်ရပ်စဲရေး စာချုပ် ချုပ်ဆိုရေးအထိလုပ်နိုင်ရင် AA ကို အကြမ်းဖက်အဖွဲ့အဖြစ် သတ်မှတ်ထားတာ အပါအဝင် ရခိုင်မှာရှိတဲ့ ကျန်တဲ့ပြဿနာတွေပါ ဖြေရှင်းဖို့ ပိုအဆင်ပြေသွားနိုင်မယ်လို့ ခန့်မှန်းပါတယ်။

"ရခိုင်က ပြဿနာတွေ အများကြီးပဲ၊ အဲဒီအများကြီးထဲမှာ ကျတော်အမြင်ကတော့ ပထမဦးဆုံး ဖြေရှင်းသင့်တဲ့ ပြဿနာသည် အပစ်အခတ်ရပ်စဲရေးစာချုပ် ချုပ်ဆိုရေး ဖြစ်ပါလိမ့်မယ်၊ အဲဒါချုပ်ဆိုပြီးရင် ကျန်တဲ့ဟာတွေကို ဖြေလျော့ပြီးတော့ ဖြေရှင်းသွားလို့ ရပါတယ်၊ အရင်တုန်းကလည်း KNU တို့ဘာတို့ဆိုတာ မတရားအသင်း ကြေညာထားတာပါ နောက်ဆုံး သဘောတူညီချက်တွေ ရသွားပြီးတဲ့ အချိန်ကြတော့ ဒါတွေအကုန်ဖျက်ပစ်တာပါဘဲ ဦးသိန်းစိန် လက်ထက်ကလည်းပဲ၊ အလားတူပဲ NLD အစိုးရလက်ထက်မှာလည်း ဒီလိုပဲ ဖြစ်ပါလိမ့်မယ်၊ ဦးစွာအားဖြင့် အရင်ဆုံးကိုင်ဖြေရှင်းဖို့ လိုအပ်တာကတော့ ဒီအပစ်အခတ်ရပ်စဲရေး သဘောတူညီချက်ပါ၊ ဘာလို့ဆို ရခိုင်ရဲ့ ကိစ္စအများကြီးထဲကမှ အရေးကြီးဆုံးအချက်ကို ကိုင်ဖြေရှင်းလိုက်ရင် ကျန်တဲ့ ပြဿနာတွေကို တစ်ခုချင်းစီ ဖြေရှင်းသွားနိုင်လိမ့်မယ်လို့ ထင်ပါတယ်"

ရခိုင်မြောက်ပိုင်းမှာ တိုက်ပွဲမဖြစ်ဘဲ ဒေသတွင်း တည်ငြိမ်အေးချမ်းနေတဲ့အတွက် ရသေ့တောင်မြို့နယ်နဲ့ ကျောက်ဖြူမြို့နယ်က စစ်ဘေးဒုက္ခသည် နှစ်ထောင်ကျော်အပါအဝင် ပုဏ္ဏားကျွန်း၊ မြောက်ဦး စတဲ့မြို့နယ်တွေနဲ့ တခြားမြို့နယ်တွေက သောင်းနဲ့ချီတဲ့ စစ်ဘေးရှောင်တွေဟာ နေရပ်ကို ပြန်နေကြပြီလို့ စစ်ဘေးရှောင်တွေအရေး ကူညီဆောင်ရွက်ပေးနေတဲ့သူတွေက RFA ကို ပြောထားပါတယ်။

ရွေးကောက်ပွဲ မကျင်းပနိုင်ခဲ့တဲ့ နေရာတွေမှာ ရွေးကောက်ပွဲတွေ အမြန်ပြုလုပ်ပေးရေးကို အကြောင်းပြုပြီး ဖြစ်ပေါ်လာတဲ့ တိုက်ပွဲရပ်တန့်မှုတွေကနေ၊ ငြိမ်းချမ်ရေး ဆွေးနွေးလာကြတဲ့အထိ ဖြစ်လာဖို့ကို ရခိုင်ဒေသခံတွေက မျှော်လင့်နေကြပါတယ်။