အိန္ဒိယဘက် ထွက်ပြေးတဲ့ ချင်းစစ်ဘေးဒုက္ခသည်တွေ ပိုများလာ

ပြီးခဲ့တဲ့ရက်ပိုင်းအတွင်း စစ်ကောင်စီတပ်က ချင်းပြည်နယ်ထဲက ရွာတစ်ရွာကို မီးရှို့ခဲ့ပြီး ဩဂုတ်လ ၁၄ ရက်နေ့က လူငယ်နှစ်ဦး အပါအဝင် လူငါးဦးကို ပြန်ပေးဆွဲခေါ်ဆောင်သွားခဲ့ပြီးတဲ့နောက် ဒေသခံအနည်းဆုံး နှစ်ရာကျော် မီဇိုရမ်ပြည်နယ်ထဲကို ဝင်ရောက်ခိုလှုံခဲ့ကြကြောင်း အိန္ဒိယသတင်းမီဒီယာတွေက ဖော်ပြခဲ့ကြပါတယ်။

ချင်းပြည်နယ်မှာ အရပ်ဘက်ပြည်သူတွေအပေါ် အာဏာသိမ်းစစ်ကောင်စီတပ်က အရှိန်မြှင့်တိုက်ခိုက်နေတဲ့အတွက် ရာနဲ့ချီတဲ့ ဒေသခံပြည်သူတွေ ဘေးလွတ်ရာ မီဇိုရမ်ပြည်နယ်တွင်းကို ထွက်ပြေးခိုလှုံနေကြရတာပါ။

ချင်းပြည်နယ်မြောက်ပိုင်း၊ တီးတိန်မြို့နယ်က ရွာတစ်ရွာမှာလည်း နေအိမ်အနည်းဆုံး ၁၅ လုံး မီးရှို့ခံခဲ့ရပြီး အသက် ၁၇ နှစ် နဲ့ ၁၅ နှစ်အရွယ် ညီအစ်ကိုနှစ်ဦး သတ်ဖြတ်ခံခဲ့ရပါတယ်။

အခုနောက်ဆုံးတိုက်ခိုက်မှုကတော့ မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် မစ္စ နိုလင်းဟေဇာ မြန်မာနိုင်ငံကို မလာရောက်ခင် တစ်ရက်အလိုမှာ ဖြစ်ပါတယ်။

အိန္ဒိယအနောက်မြောက်ပိုင်းမှာ လက်ရှိ စစ်ဘေးဒုက္ခသည်ဦးရေ အနည်းဆုံး လေးသောင်းတစ်ထောင်ကျော် ရှိမယ်လို့ ကုလသမဂ္ဂဒုက္ခသည်ဆိုင်ရာမဟာမင်းကြီးရုံးက ခန့်မှန်းထားပါတယ်။