ဦးဝင်းတင် နိုင်ငံကူး လက်မှတ် နေ့ချင်းပြီးရရှိ

NLD နာယကအဖွဲ့ဝင် သတင်းစာဆရာကြီး ဟံသာဝတီဦးဝင်းတင်ဟာ ပြည်ပမှာ ဆေးသွားကုဖို့ အတွက် နိုင်ငံကူးလက်မှတ် Passport ကို မနေ့က နေ့ချင်းပြီး ရရှိခဲ့ကြောင်း မိသားစုဝင်တွေက ပြောပါတယ်။

ဆရာဝန်ကြီးတွေရဲ့ ခွင့်ပြုချက်ရရင် ပြည်ပမှာ သွားရောက် ဆေးကုဖို့အတွက် Passport အဆင်သင့်ဖြစ်အောင်သာ ကြိုတင်လုပ်ထားတာသာ ဖြစ်တယ်လို့ ဆရာ ဦးဝင်းတင်ရဲ့ မိသားစုဝင် တစ်ဦးဖြစ်တဲ့ ဦးမောင်မောင်နိုင်က ပြောပါတယ်။

" ပတ်စပို့(စ်) ကတော့ မနေ့က ညနေက ရတယ်၊ ခုထက်ထိ ဘဘက စိတ်ချရတဲ့ အနေအထားမှာ လုံးဝ မရှိသေးဘူး၊ လက်ရှိ ဘဘရဲ့ အနေအထားက သွားလို့ မရသေးတာပါ၊ ပတ်စပို့(စ်) လုပ်တာက နေ့လည် ၁၂ နာရီမှာလုပ်တာ ည ၈ နာရီမှာ ရပါတယ်ခင်ဗျ"

မနေ့ကနဲ့ဒီနေ့မှာ ဆရာဝန်တွေက ကျောက်ကပ်ဆေးပေးခဲ့ပြီး လက်ရှိအခြေအနေမှာ စိတ်ချရတဲ့အနေအထား မရှိသေးဘူးလို့ ဆရာဝန်ကြီးတွေက ပြောကြောင်းလည်း သိရပါတယ်။