ကချင်ပြည်နယ်မှာ လူအသွားအလာ ပုံမှန်ပြန်ဖြစ်နေ

ကချင်ပြည်နယ်မှာ နေထိုင်သူတွေဟာ ကိုရိုနာဗိုင်းရပ်စ် အန္တရာယ်ကြောင့် ပြီးခဲ့တဲ့ ဧပြီလအတွင်း အသွားအလာ နည်းခဲ့ပါတယ်။ ဒါပေမယ့် အခုလမေလဆန်းကစပြီး လူအများအပြား ပုံမှန်လို ပြန်လည်သွားလာမှုတွေ ရှိလာ နေပါတယ်။

ရောဂါပိုးစတွေ့ခဲ့ချိန်ကတော့ မြစ်ကြီးနားမြို့မှာ သွားလာမှုတွေ နည်းပါးခဲ့ပေမယ့် လူထုက ကျန်းမာရေး အသိအားနည်းတာနဲ့ ဝမ်းရေးအတွက် အခုနောက်ပိုင်း အိမ်ပြင်ထွက်လာကြတယ်လို့ မြစ်ကြီးနားမြို့ ဒေသခံ ဒေါ်နန်ပူက ပြောပါတယ်။

မိုးညှင်းမြို့မှာလည်း အစိုးရက လူစုလူဝေးနဲ့ သွားလာမှုတွေကို ကန့်သတ်ထားသလို အပြင်ထွက်ရင် နှာခေါင်းစည်းတပ်ကြဖို့ ပြောဆိုထားပေမယ့် အခုနောက်ပိုင်း လိုက်နာမှုတွေမရှိတော့ဘူးလို့ မြို့ညှင်းမြို့က ဒေါ်ဂျာခေါင်က ပြောပါတယ်။

ဖားကန့်မြို့မှာလည်း ရောဂါကာကွယ်ရေးထက် ဝမ်းရေးက ပိုခက်ခဲ့တဲ့အတွက် အခုရက်ပိုင်း အပြင်ထွက်သွား လာသူတွေ များလာတယ်လို့ ဖားကန့်ဒေသခံ ဦးယိန်းခေါ ကပြောပါတယ်။

ပူတာအို၊ ဗန်မော် ၊ဝိုင်းမော်မြို့နယ်တွေက ဒေသခံတွေကို RFA က မေးကြည့်ရာမှာလည်း အခုရက်ပိုင်းမှာ ပုံမှန်လိုပြန်လည်သွားလာမှုတွေရှိနေတယ်လို့ ပြောပါတယ်။

ပြည်နယ်အစိုးရအဖွဲ့အနေနဲ့တော့ ရောဂါကာကွယ် ထိန်းချုပ်ရေးအတွက် ဖြေလျော့တာတွေမရှိဘဲ ဆက်လက် လုပ်ဆောင်နေဆဲဖြစ်တယ်လို့ ပြည်နယ်အစိုးရအဖွဲ့ရုံး ညွှန်ကြားရေးမှူး ဦးဇော်ဇော် က ပြောပါတယ်။

လူစုလူဝေးမရှောင်၊ နှခေါင်းစည်းမတပ်ဘဲ အပြင်သွားနေမယ်ဆိုရင် ရောဂါပျံ့နှံ့မှု ပိုများလာမှာဖြစ်တဲ့အတွက် လူစုဝေတွေမလုပ်ကြဖို့နဲ့ အပြင်ထွက်ရင် နှာခေါင်းစည်းတွေတပ်ကြဖို့ ဒေါက်တာထက်ဝင်းက အကြံပြု ထားပါတယ်။

ဒီနေ့ မေလ ၁၂ ရက်နေ့မှာ မြစ်ကြီးနားမြို့က မြို့မဈေးအပါအဝင်၊ ရပ်ကွက်ဈေးတွေနဲ့ လမ်းတွေမှာ နှာခေါင်းစည်းတွေတပ်ကြဖို့ ပညာပေးလုပ်ငန်းတွေ ဆက်လက်လုပ်ဆောင်သွားမှာဖြစ်တယ်လို့ မြို့နယ် အုပ်ချုပ်ရေးမှူးက ပြောပါတယ်။

ပညာပေးကာလပြီးတဲ့နောက် မလိုက်နာသူတွေကို ဒဏ်ပေးစနစ်နဲ့ လုပ်ဆောင်သွားမှာဖြစ်ပြီး လိုက်နာမှုမရှိဘဲ ဆက်ပြီးပျက်ကွက်နေမယ်ဆိုရင် ၁၉၉၅ ကူးစက်ရောဂါများ ကာကွယ်နှိမ်နှင်းရေးဥပဒေနဲ့ အရေးယူတာတွေ လုပ်သွားမှာဖြစ်တယ်လို့လည်း ပြောပါတယ်။

ကိုရိုနာဗိုင်းရပ်စ်တွေ့ရှိတဲ့ ကချင်ပြည်နယ်ရဲ့ ပထမဆုံးလူနာ အမှတ် ၁၄၄ ဟာ မြစ်ကြီးနားမြို့ ပြည်သူ့ဆေးရုံမှာ ဆေးကုသမှုခံယူစဉ် ရောဂါပိုးမတွေ့ရှိတော့တဲ့အတွက် မနေ့က ဆေးရုံကဆင်းသွားပြီဖြစ်ပါတယ်။

လက်ရှိကချင်ပြည်နယ်မှာ စောင့်ကြည့်ရေးစခန်းဝင်နေသူ နှစ်ထောင်ကျော်ရှိနေပြီး အများဆုံးဟာ တရုတ်နိုင်ငံက ပြန်လာသူတွေဖြစ်ပါတယ်။

အစိုးရရဲ့မေလ ၁၂ ရက်နေ့ ဒီနေ့မနက်အထိ ထုတ်ပြန်ချက်အရ မြန်မာနိုင်ငံမှာ ရောဂါပိုးစစ်ဆေးတွေ့ရှိသူ စုစုပေါင်း ၁၈၀ ဦးရှိပြီး ပြန်လည်ကောင်းမွန်လာသူ ၇၄ ဦးရှိသလို သေဆုံးသူ ခြောက်ဦးရှိပါတယ်။