ထိုင်း-မြန်မာနယ်စပ် မြဝတီမြို့ကို ထိုင်းဘက်က လျှပ်စစ်ဓါတ်အား ရောင်းချ

လျှပ်စစ်မီး ဖြန့်ဖြူးရောင်းချဖို့ သဘောတူလက်မှတ်ထိုးပွဲကို  မနေ့မနက်ပိုင်းက မဲဆောက်မြို့CENTARA ဟိုတယ်မှာ ကျင်းပခဲ့ရာမှာ  ထိုင်းနိုင်ငံ ပြည်ထဲရေးဝန်ကြီး၊ ထိုင်းအစိုးရလျှပ်စစ်ဌာန ဥက္ကဌနဲ့ တာဝန်ရှိသူတွေ အပါအဝင် National Grip Line ကုမ္ပဏီပိုင်ရှင် ဒေါ်သင်းသင်းမြတ်တို့ တက်ရောက်လက်မှတ်ရေးထိုးခဲ့ကြ ပါတယ်။

မြဝတီမြို့မှာ လျှပ်စစ်ဓါတ်အားရောင်းချရေးနဲ့ ပတ်သက်ပြီး ဒေါ်သင်းသင်းမြတ် က အခုလိုပြောပါတယ်။

“အခုဒီနေ့ထိုးတဲ့ လက်မှတ်ပွဲဟာ ကိုယ့်တိုင်းပြည် ဒေသဖွံ့ဖြိုးရေးအတွက် ကိုယ်စားလာပြီး ဆောင်ရွက်ရတယ်ဆိုတာ ဒါဂုဏ်ယူဝမ်းမြောက်စရာ ကောင်းတဲ့အလုပ်ပါ၊ မြဝတီမြို့ဟာ အရင် ၄.၅ မဂ္ဂါဝပ် သုံးထားတဲ့နေရာမှာ အခု ၆ မဂ္ဂါဝပ် ပေါ့နော်၊ ရွှွေကုက္ကို က အရင်တုန်းက ၁ မဂ္ဂါဝပ်နဲ့ ပေးထားတာဖြစ်တယ်၊ ဒီစာချုပ်မှာ ၂ မဂ္ဂါဝပ် တိုးတောင်းထားတယ်၊ ထိုင်းလျှပ်စစ်ဌာနကနေ အခုဒီနေ့ဆိုရင် ခွင့်ပြုပြီဖြစ်တဲ့အတွက် ကျမတို့ဒေသမှာ မီးအားကောင်းကောင်းနဲ့ လုပ်ပေးနိုင်တော့မှာဖြစ်တာပေါ့”

လက်မှတ်ရေးထိုးတဲ့ အခမ်းအနားမှာ ထိုင်းအစိုးရ လျှပ်စစ်ဌာန တာဝန်ရှိသူက ထိုင်းအစိုးရ လျှုပ်စစ်ဌာနအနေနဲ့ ထိုင်း-မြန်မာနယ်စပ် မဲဆောက်ကနေ  မြဝတီ ၊ ကန်ချနဘူရီကနေ ဘုရားသုံးဆူ၊ မယ်ဆိုင်ကနေ တာချီလိတ် စတဲ့ ဒေသတွေအပါအဝင် ထိုင်း-မြန်မာနယ်စပ် ၅ နေရာအတွက် လျှပ်စစ်မီးရောင်းချပေးခဲ့တယ်လို့ ပြောကြားခဲ့ပါတယ်။

အခုလို ထိုင်းဘက်က လျှပ်စစ်ဓါတ်အားရောင်းချရာမှာ သဘောတူသတ်မှတ်ထားတဲ့ ဈေးနှုန်းကို အသေအချာမသိရပေမယ့်၊ မြဝတီဘက်မှာတော့ အပိုင်း ၂ ပိုင်းခွဲပြီး အပိုင်း ၁ မြဝတီမြို့တွင်းပိုင်းကို လျှပ်စစ်မီး တစ်ယူနစ် ဘတ်ငွေ ၄ဘတ် ပြား ၃ဝ နှုန်း၊ အပိုင်း ၂ ရွှွေကုက္ကို၊ ဝှေ့ရှမ်းနဲ့ သင်္ကန်းညီနောင်ဘက်ကိုတော့  တစ်ယူနစ် ၄ဘတ် ပြား ၅ဝ နှုန်းနဲ့ ရောင်းချမှာဖြစ်တယ်လို့ မြဝတီကုန်သည်ကြီးများအသင်း ဥက္ကဌ၊  National Grip Line ကုမ္ပဏီပိုင်ရှင် ဒေါ်သင်းသင်းမြတ် က ပြောကြားခဲ့ပါတယ်။