မြန်မာဒုက္ခသည်တွေကို အမေရိကန်ခေါ်ယူမှု ရပ်ဆိုင်း

ထိုင်း-မြန်မာနယ်စပ်က မြန်မာဒုက္ခသည်တွေကို ကုလသမဂ္ဂရဲ့ ပြန်လည်နေရာချထားရေး အစီအစဉ်အတိုင်း အမေရိကန်ပြည်ထောင်စု က ခေါ်ယူနေတာကို ရပ်ဆိုင်းလိုက်ပြီလို့ ဗန်ကောက်မြို့အခြေစိုက် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက မနေ့က ပြောလိုက်ပါတယ်။

အမေရိကန်ပြည်ထောင်စုကို ပြောင်းရွှေ့နေထိုင်ခွင့် ရဖို့လျှောက်လွှာကို ပြီးခဲ့တဲ့ ဇန်နဝါရီလ ၂၄ ရက်နေ့က နောက်ဆုံးထားလက်ခံပြီးတဲ့နောက် ရပ်ဆိုင်းလိုက်တာဖြစ်ပါတယ်။

အမေရိကန်ပြည်ထောင်စုဟာ ၂၀၀၅ ခုနှစ်ကနေစပြီး မြန်မာဒုက္ခသည် ၇ သောင်း ၃ ထောင် လက်ခံခဲ့တယ်လို့ အမေရိကန်ပြည်ထောင်စုရဲ့ လူဦးရေ၊ ဒုက္ခသည်နဲ့ ရွှေ့ပြောင်းသူများဆိုင်ရာဌာန လက်ထောက်အတွင်းရေးမှူး Anne Richard က ပြောပါတယ်။

နောက်ထပ် ဒုက္ခသည် ၂ သောင်းလောက်ကိုတော့ သြစတြေးလျ၊ ကနေဒါ၊ ဖင်လန်နဲ့ဂျပန်နိုင်ငံတွေကို ၉ နှစ်အတွင်း ပို့ပေးခဲ့တယ်လို့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက ပြောပါတယ်။

ထိုင်း-မြန်မာနယ်စပ်က ဒုက္ခသည်စခန်းပေါင်း ၉ ခုမှာ လူဦးရေ ၁ သိန်း ၂ သောင်းလောက် ကျန်ရှိနေသေးတယ်လို့ သိရပါတယ်။