ရသေ့တောင် စေတီပြင်ရွာသားတစ်ဦး ခြေထောက်ကို ကျည်ဆံထိမှန်


2020.08.31
rathedaung-622.jpg ရသေ့တောင်မြို့တွင်း တနေရာ။
Photo: Min Thein Aung/ RFA

ရခိုင်ပြည်နယ် ရသေ့တောင်မြို့နယ် စေတီပြင်ကျေးရွာမှာ ဒီနေ့မနက်က ဘယ်ကနေ ပစ်ခတ်လိုက်တဲ့ ကျည်ဆံ မှန်းမသိတဲ့ ကျည်ဆံတချို့ နေအိမ်ထဲကျခဲ့တဲ့အတွက် အသက် ၁၈ နှစ်အရွယ် လူငယ်တစ်ဦး ခြေထောက်ကို ထိမှန်ခဲ့တယ်လို့ ဒေသခံတွေက ပြောပါတယ်။

ဘယ်ကပစ်မှန်းမသိတဲ့ အဲဒီကျည်ဆံဟာ နေအိမ်အမိုးကိုဖောက်ပြီးကျတာကြောင့် အသက် ၁၈ နှစ် အရွယ် မောင်ဆန်းလှိုင်ဖြိုးရဲ့ ခြေထောက်ကိုထိမှန်ခဲ့တယ်လို့ လုံခြုံရေးအရ အမည်မဖော်လို့တဲ့ စေတီပြင် ရွာသား တစ်ဦးက ပြောပါတယ်။

လက်ရှိ မောင်ဆန်းလှိုင်ဖြိုးဟာ စေတီပြင်တိုက်နယ်ဆေးရုံမှာ တတ်ရောက်ဆေးကုသနေတယ်လို့လည်း ပြောပါတယ်။

ဒီနေ့မနက် ၁၀ နာရီကျော်လောက်က ရသေ့တောင်မြို့နယ် ရေမျက်ရွာအနီး မေယုမြစ်ထဲမှာ ရေတပ်နဲ့ ကုန်းပေါ် မှာရှိတဲ့ AA တို့ ပစ်ခတ်မှုတွေဖြစ်ခဲ့တယ်လု့ိ အမျိုးသားလွှတ်တော် ကိုယ်စားလှယ် ဦးခင်မောင်လတ်က ပြောပါတယ်။

ပြီးခဲ့တဲ့ ၃ ရက်လောက်ကစပြီး ပစ်ခတ်သံတွေကြားနေရကာ ထိခိုက်ဒဏ်ရာရတာတွေလည်း ရှိတယ်လို့ ဦးခင်မောင်လတ်က ပြောပါတယ်။

ပြီးခဲ့တဲ့ သြဂုတ်လ ၂၉ ရက်နေ့တုန်းကလည်း ငစံဘော်ကျေးရွာက ဦးအောင်ကျော်ညွှန် လက်မောင်း ကျည်ဆံ ထိမှန်ခဲ့သလို သြဂုတ်လ ၂၂ ရက်နေ့ ည ၈ နာရီလောက်က ကျောက်ရံကျေးရွာထဲ လက်နက်ကြီး ကျည်ကျတဲ့ အတွက် မိသားစု ငါးဦး ထိခိုက်ဒဏ်ရာရပြီး ရသေ့တောင်ဆေးရုံမှာ ဆေးကုသမှု ခံယူနေကြရပါတယ်။

ဒီကိစ္စနဲ့ပတ်သက်ပြီး တပ်မတော် သတင်းမှန်ပြန်ကြားရေးအဖွဲ့က ဗိုလ်ချုပ် ဇော်မင်းထွန်းကို ညနေပိုင်းအထိ ဆက်သွယ်ပေမယ့် ဆက်သွယ်လို့ မရပါဘူး။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။