དགེ་འདུན་པ་ལྔ་འཇུ་བཟུང༌།

བོད་ནས་གནས་ཚུལ་འབྱོར་དོན།
༄༅༎ཕྱི་ལོ༢༠༡༢ ཟླ༩ཚེས༡ཉིན།ཁྲི་འདུ་རྫོང་དང་སྒ་སྟོད་ཡུལ་ཚོའི་འགོ་ཁྲིད་ཁག་ཅིག་གིས་ཉ་འཚོ་ཟིལ་དཀར་དགོན་པའི་གཞུང་ལས་ཁང་དུ་ཁ་པར་བརྒྱུད། ༢༠༠༩ ལོར་ས་ཡོམ་རོགས་སྐྱོར་གྱི་ཁང་པ་དེ་དག་རྩིས་ལེན་བྱེད་དུ་ཡོང་གི་ཡིན་ཞེས་བརྗོད་ནས་དེའི་རྗེས་གློག་དང་བརྡ་རྟགས་ཚང་མ་བཀག་སྟེ། ཞོགས་པའི་ཆུ་ཚོད་བཅུ་པ་ཙམ་ལ་གློ་བུར་དུ་བསམ་ཡུལ་ལས་འདས་པའི་རྒྱ་དམག་འབོར་ཆེན་ཞིག་འབྱོར་ཏེ།  རྒྱ་ཆེན་སྡེ་པ་ནས་ཡིན་པའི་གྲྭ་བསོད་ནམས་ཤེས་རབ། རང་ལོ་༤༥ དང་།  ཕ་མིང་ལ་བརྩོན་འགྲུས་དོན་ལྡན། གེ་ཤིང་སྡེ་པ་ནས་ཡིན་པའི་གྲྭ་བློ་བཟང་སྦྱིན་པ།  རང་ལོ་༣༠ དང་། ཕ་མིང་རྟ་རྒྱལ་དང་མ་མིང་པདྨ་མཚོ་མོ།མཁར་རོང་སྡེ་པ་ནས་ཡིན་པའི་གྲྭ་ཚུལ་ཁྲིམས་སྐལ་བཟང་རང་ལོ་༢༥དང། ཕ་མིང་ཨ་ཐུབ་དང་མ་མིང་སྒྲོལ་དཀར། གེ་ཤིང་སྡེ་པ་ནས་ཡིན་པའི་གྲྭ་ངག་དབང་སྨོན་ལམ།  རང་ལོ་༣༠དང། ཕ་མིང་བསམ་ཡག་དང་མ་མིང་ཚེ་དབང་པདྨ།  རྒྱ་ཆེན་སྡེ་པ་ནས་ཡིན་པའི་གྲྭ་བསོད་ནམས་དབྱིག་གཉེན།  རང་ལོ་༤༤ དང་།  ཕ་མིང་བརྩོན་འགྲུས་བློ་ལྡན་དང་མ་མིང་དབང་མོ་སྒྲོལ་མ། ཁོང་རྣམས་འཇུ་བཟུང་བྱས་པར་མ་ཟད་ཁོང་རྣམས་ཀྱི་ཤག་ཏུ་སྔོག་བཤེར་བཏང་སྟེ། གློག་ཀླད་དང་འོད་སྡེར་སོགས་ཕྲོགས་ཏེ་བཙན་ཁྲིད་བྱེད་སྐབས།  དགོན་པའི་དགེ་འདུན་པ་རྣམས་ཀྱིས་རྒྱ་དམག་དེ་དག་ལ་ཁོང་རྣམས་གློད་གྲོལ་དགོས།  ཞེས་བརྗོད་ནས་རྗེས་འདེད་བཏང་ཡང་ཉན་འཇོག་མ་བྱས་པར་དེ་ལས་ལྡོག་སྟེ།  དགེ་འདུན་པ་དེ་དག་ལ་ཡང་ཉེས་རྡུང་ཚད་མེད་བཏང་འདུག དེའི་རྗེས་སུ་འཇུ་བཟུང་བྱས་པའི་དགེ་འདུན་པ་དེ་དག་གི་གནས་སྟངས་གང་ཡང་ཤེས་རྟོགས་ཐུབ་ཀྱི་མི་འདུག།ཟིལ་དཀར་དགོན་པ་ད་ལྟ་ཛ་དྲག་གི་གནས་སྟངས་འོག་ལྷུང་འདུག།