དེ་རིང་སླར་ཡང་བོད་ནང་རང་ལུས་མེར་སྲེག

༄༅།    །དེ་རིང་ཚེས༢༦ ཉིན་ཨ་མཆོག་ཏུ་ཡུལ་ཚོ་རུ་སློབ་གྲྭའི་གནང་བ་སྤྲོད་པའི་དུས་སྐབས་ཤིག་ཏུ་འཁེལ་བས་སློབ་མའི་ཁྱིམ་བདག་སོགས་མི་ཤིན་ཏུ་མང་བའི་སྐབས་ཡིན་པ་དང་། སྐབས་དེ་དུས་རྒྱལ་གཅེས་པ་ལྷ་མོ་ཚེ་བརྟན་ལགས་ཀྱང་ཟ་ཁང་ཞིག་ནས་གྲོགས་པོ་དག་དང་མཉམ་དུ་ཟ་མ་ཟོས་བསྡད་རྗེས། ག་ལེར་ཕྱི་རོལ་ཁྲོམ་དུ་ཕྱིན་ཏེ་མི་ཚོགས་ཀྱི་འུར་སྒྲ་དང་ཁོང་གི་འབོད་སྒྲ་ཤུགས་ཆེར་ཁྱབ་པར་གྱུར་བ་དང་། ཁོང་གིས། རྒྱལ་བ་རིན་པོ་ཆེ་བོད་ཡུལ་ལ་ཕེབས་དགོས། བོད་ལ་རང་དབང་དགོས་ཞེས་ཟེར་བཞིན་རྒྱུགས་ཏེ། གང་མཚམས་ཤིག་ནས་འགྱེལ་ཞིང་སྐུ་ལུས་སྨད་འཚིག་ནས་རིང་ཙམ་འགྲོ་བཞིན་པའི་སྐབས་སུའང་། ད་དུང་ཕྱག་གཉིས་ཐལ་མོ་སྦྱར་ཏེ་གོང་གི་འབོད་ཚིག་དེ་གཉིས་བསྐྱར་ཟློས་བྱས་པས། མི་མང་གིས་མཐའ་སྐོར་ཡོངས་སུ་ཁེངས་པར་མ་ཟད། མི་མང་གི་སྲུང་སྐྱོབ་དང་མི་མང་གི་ཁོང་ཁྲོ་ཡང་མངོན་སུམ་དུ་གྱུར་བས། དམག་མི་དང་ཉེན་རྟོག་པ་དག་ཀྱང་རིང་ས་ནས་བལྟས་ཏེ་སྡོད་པ་ལས་ཉེ་སར་བཅར་ཐུབ་མི་འདུག མེ་རིམ་གྱིས་འཇགས་རྗེས་ཕྱིང་ཐུལ་ཞིག་དང་དེའི་སྟེང་དུ་གོས་སེར་པོས་གཡོགས་ནས་སྐུ་ཕུང་སྐེད་སྡེ་བར་གདན་འདྲེན་ཞུས་ཟིན་པ་དང་། ད་ལྟ་སྐེད་སྡེ་བའི་ཉེ་འཁོར་དུ་ཨ་མཆོག་ཡུལ་མིའི་རླངས་འཁོར་དང་འཕྲུལ་རྟས་ཧྲིལ་གྱིས་ཁེངས་ཡོད་པའི་གནས་ཚུལ་འདུག    ཞིབ་ཕྲ་ང་ཚོའི་རྒྱ་གར་ལྷོ་ཕྱོགས་གསར་འགོད་པ་པདྨ་དངོས་གྲུབ་ཀྱིས་བཏང་བའི་གནས་ཚུལ་ལ་གསན་རོགས།།