རེབ་གོང་དུ་གཞོན་སྐྱེས་གཉིས་ནས་རང་ལུས་མེར་བསྲེཌ་འདུག

བོན་རྒྱ་བསྟན་འཛིན་རབ་རྒྱས་དང་རྡོ་རྗེ་དབང་ཕྱུག་གཉིས་ནས་གནས་ཚུལ་ཕྱོགས་བསྒྲིགས་བྱེད་དོན།
༼༡༽ སྙིང་དཀར་བཀྲ་ཤིས་ཀྱིས་རང་ལུས་མེར་བསྲེགས་བཏང་བའི་གནས་ཚུལ།  
དེ་རིང་རེབ་གོང་སྒྲོ་རོང་པོ་ནས་རང་ལོ་ ༢༤ ཡིན་པ་སྙིང་དཀར་བཀྲ་ཤིས་ཞུ་བ་ཞིག་གིས། “རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག” ”བོད་ལ་རང་དབང་དགོས”ཞེས་སྐད་འབོད་དང་བཅས་ཏེ། རང་ལུས་མེར་བསྲེགས་བཏང་ནས་འདས་གྲོངས་ཕྱིན་འདུག

སྙིང་དཀར་བཀྲ་ཤིས་ནི་ཕ་བཀྲ་ཤིས་རྣམ་རྒྱལ་༼རང་ལོ་ ༤༧༽་དང་མ་མཁའ་འགྲོ་འཚོ་༼ལོ་བཞིའི་གོང་ཚེ་ལས་འདས་འདུག༽གཉིས་ཀྱི་བུ་ཡིན་པ་དང་། སྙིང་དཀར་བཀྲ་ཤིས་ཀྱི་སྐྱེས་དམན་གྱི་མིང་ལ་འབྲུག་མོ་ཚེ་རིང་༼ལོ་ ༢༣༽ཡིན་འདུག་ལ། སྙིང་དཀར་བཀྲ་ཤིས་ཀྱི་ཨ་མ་འདས་རྗེས་ཁོང་གི་ཨ་ཕས་སྐྱེས་དམན་གཞན་ཞིག་དང་གཉེན་སྒྲིག་ཡོད་པ་དེའི་མིང་ལ་ལྷ་མོ་མཁར་ཟེར་གྱི་ཡོད་འདུག                       མེར་བསྲེགས་གཏོང་ཡུལ་ནི་སྒྲོ་རོང་པོའི་གད་དམར་ཐང་གི་སློབ་གྲྭའི་ནང་རེད་འདུག་ལ། དེ་རིང་དེ་གར་ཁ་སྔོན་འདས་གྲོངས་ཕྱིན་པ་རྟ་མགྲིན་མཚོ་དང་སྐལ་བཟང་སྦྱིན་པ་གཉིས་ཀྱི་ཆེད་མདོ་བ་དང་སྒྲོ་རོང་པོ་ཁུལ་དུ་སྨོན་ལམ་མཆོད་འབུལ་དང་། ནང་མིར་མྱ་ངན་སེམས་གསོའི་མི་ཚོགས་ཕོན་ཆེ་འཛོམས་སྐབས་ཤིག་རེད་འདུག མེར་བསྲེགས་གཏོང་དུས་ནི་དེ་རིང་ཉིན་རྒྱབ་བོད་ནང་གི་ཆུ་ཚོད་ ༣ དང་སྐར་མ་ ༡༥ སྟེང་རེད།
དེ་རིང་མདོ་བ་དང་སྒྲོ་རོང་པོ་ཁུལ་དུ་འདི་ཟླའི་ཚེས་ ༧ ཉིན་རང་ལུས་མེར་བསྲེགས་བཏང་ནས་འདས་གྲོངས་སོང་བ་སྒྲོ་རོང་པོའི་དཔའ་མོ་རྟ་མགྲིན་མཚོ་དང་། འདི་ཟླའི་ཚེས་༨ཉིན་རང་ལུས་མེར་བསྲེགས་བཏང་ནས་འདས་གྲོིངས་སོང་བ་མདོ་བ་སྡོང་བེ་ནས་ཡིན་པ་དཔའ་བོ་སྐལ་བཟང་སྦྱིན་པ་གཉིས་ཀྱི་ཁྱིམ་དུ་གདུང་སེམས་མཉམ་བསྐྱེད་ཆེད་ཕེབས་མཁན་གྱི་མི་ཚོགས་མང་བའི་སྐབས་དང་འཁེལ་ཡོད་པར་བརྟེན། སྐུ་ཕུང་རྒྱ་ལག་ཏུ་ཤོར་མ་བཅུག་པར་རང་ཁྱིམ་དུ་གདན་འདྲེན་ཞུས་ཏེ། མི་མང་གིས་སྲུང་སྐྱོབ་འོག་འདས་པོ་ཁོང་གི་ཆེད་རྗེས་འཇུག་སྨོན་ལམ་གསུང་འདོན་བྱེད་ཀྱི་ཡོད་འདུག


གཞན་ཡང་གནས་ཚུལ་འབྱོར་དོན་ལྟར་ན། ཁ་སང་ཕྱི་ཚེས་ ༡༡ ཉིན་མདོ་བ་ཞང་སྒྲོ་རོང་པོ་སྡེ་བའི་དམར་ཤོག་ཧྲུའི་ཅི༼ཏ་ཏོས་ཧྲུའུ་ཅི༽ སྟག་ལྷ་ཟེར་བ་རྒྱ་གཞུང་གི་ལས་ཀ་བྱས་ནས་ལོ་ ༡༥ ཕྱིན་ཡོད་པ་ཁོང་གིས། “མང་ཚོགས་ནང་ལ་བསམ་ཚུལ་ག་རེ་ཡོད་མེད་ཧ་གོ་མ་སོང་། ངས་བསམས་ན། མེར་བསྲེགས་གཏོང་དགོས་པའི་རྒྱུ་རྐྱེན་གཙོ་བོ་ནི་༸གོང་ས་མཆོག་གི་སྐུ་པར་བཤམས་མི་ཆོག་པ་དང་། གསོལ་བ་སྨོན་ལམ་འདེབས་མི་ཆོག་པ། གཙོ་བོ་༸གོང་ས་མཆོག་ཕྱི་ལོགས་ལ་ཕུད་པ་དང་། བོད་ལ་ཕེབས་འཇུག་གི་མེད་པ། པཎ་ཆེན་རིན་པོ་ཆེའི་སྤྲུལ་སྐུ་བཙོན་ཁང་དུ་བཀག་པ། བོད་ལ་རང་དབང་གཙང་མ་མེད་པ་བཅས་ལ་བརྟེན་ནས། རང་ལུས་མེར་བསྲེགས་གཏོང་དགོས་པ་འདི་ལ་ཐུག་པ་རེད།” ཅེས་དྲི་བ་འགོད་མཁན་འབྲེལ་ཡོད་ལས་བྱེད་ལ་བཤད་འདུག་པར། ཡུལ་མི་ཚོ་ཁོང་གི་བསམ་ཚུལ་འདི་ལ་ཧ་ལས་པའི་ཚོད་དུ་འདུག་པ་དང་། ལས་བྱེད་ཅིག་གིས་དེ་ལྟར་བཤད་པར་ཆེ་བསྟོད་བྱེད་པ་དང་བློ་ཁོག་ཆེན་པོ་འདུག་ཅེས་བསྔགས་བརྗོད་བྱེད་ཀྱིན་འདུག་ཟེར།
༼༢༽ སྙིང་ལྕགས་འབུམ་གྱིས་རང་ལུས་མེར་བསྲེགས་པའི་གནས་ཚུལ།  



ཡང་གནས་ཚུལ་འབྱོར་གསལ་ལྟར་ན། དེ་རིང་ཉིན་རྒྱབ་བོད་ནང་གི་ཆུ་ཚོད་ ༧ དང་སྐར་མ་ ༡༨ སྟེང་། རེབ་གོང་མདོ་བ་འབྲོག་ཡོ་ལག་ར་རྒན་སྡེ་བ་ནས་ཡིན་པ་སྙིང་ལྕགས་འབུམ་ཞུ་བ་ཞིག་གིས་མདོ་བ་ཞང་སྲིད་གཞུང་གི་སྒོ་ཁ་ནས་རང་ལུས་མེར་བསྲེགས་བཏང་སྟེ་འདས་གྲོངས་ཕྱིན་འདུག
ཁོང་གི་ཕ་མིང་ལ་ལྷ་ཕྱུག༼ ལོ་　༤༤ ༽མ་མིང་ལ་ཚེ་རིང་མཚོ་༼ ལོ་　༣༨ ༽གཉིས་ཀྱི་བུ་ཡིན་པ་དང་། ཁོང་གཉིས་ལ་ཕྲུ་གུ་གསུམ་ཡོད་པ་ནི། ཆེ་བ་བུ་སྙིང་ལྕགས་འབུམ་དང་། འབྲིང་བ་བུ་མོ་འབྲུག་མོ་མཚོ། ཆུང་བ་བུ་མོ་ཚེ་འབྲུག་སྐྱིད་བཅས་ཡིན།
དཔའ་བོ་ཁོང་གིས་མདོ་བ་གཡག་ལུང་སྟེ་མདོ་བ་ཞང་ཡོད་ས་ནས་རང་ལུས་མེར་བསྲེགས་བཏང་འདུག་ལ། དེ་རིང་མདོ་བ་ཞང་ཡོད་སར་མི་མང་པོ་འཛོམས་ཡོད་སྐབས་ལ་བརྟེན། སྐུ་ཕུང་རྒྱ་ལག་ཏུ་ཤོར་མ་བཅུག་པར་ཐད་ཀར་མདོ་བ་དགོན་པའི་ནང་གདན་ཞུས་ཀྱིས་སྨོན་ལམ་གསུང་འདོན་དང་། དེ་ནས་གྲྭ་པ་རྣམས་འདས་གྲོངས་སུ་ཕྱིན་རིགས་སྦྱིན་སྲེག་བྱེད་ས་ཞིག་ཡོད་པ་དེར་གདན་ཞུས་ཀྱིས་སྦྱིན་སྲེག་བྱེད་ཀྱི་ཡོད་འདུག ཁྱོན་མི་མང་ཉིས་སྟོང་ནས་སུམ་སྟོང་བརྒལ་བ་འདུ་འཛོམས་ཀྱིས། ༸གོང་ས་མཆོག་གི་ཞབས་བརྟན་“གངས་རི་ར་བས་བསྐོར་བའི་ཞིང་ཁམས་སུ། །ཕན་དང་བདེ་བ་མ་ལུས་འབྱུང་བའི་གནས། །སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། །ཞབས་པད་སྲིད་མཐའི་བར་དུ་བརྟན་གྱུར་ཅིག །”ཅེས་པ་དབྱངས་སྒྲོག་དང་། མ་ཎི་འདོན་པ་སོགས་བྱས་དང་བྱེད་བཞིན་ཡོད་འདུག་པ་ལས། ཞིབ་ཕྲའི་གནས་ཚུལ་ལག་སོན་མ་བྱུང་།
གཞན་ཡང་རེབ་གོང་རོང་འབྲོག་ཁུལ་དུ་རྫོང་དང་ཞང་སྲིད་གཞུང་གི་ལས་བྱེད་ཚོས་ས་གནས་མང་ཚོགས་ནང་གཏམ་བཤད་འདྲ་མིན་སྤེལ་བ་དང་། ༸གོང་ས་མཆོག་གི་སྐུ་པར་བཤམས་མི་ཆོག་པ། མི་མང་འདུ་འཛོམས་རིགས་མི་ཆོག་པ་སོགས་ཀྱི་དམ་བསྒྲགས་བྱེད་ཤུགས་ཆེ་རུ་བཏང་ཡོད་འདུག་ལ། རེབ་གོང་༼ཐུན་རིན༽རྫོང་བློན་ཆོས་ཞང་ཟེར་བའི་ལས་ཁུངས་ནས་ཡི་གེ་ཞིག་བཀྲམས་འདུག་པའི་ནང་། ཀྲུང་གོ་གུང་ཁྲན་ཏང་གི་འགོ་ཁྲིད་ནམ་རྒྱུན་སྲུང་སྐྱོང་བྱ་རྒྱུ། མེས་རྒྱལ་གཅིག་གྱུར་ཡོང་བར་སྲུང་སྐྱོང་དང་། ཏཱ་ལའི་ཚོགས་པའི་ཁ་བྲལ་སིམ་འཛུལ་ངོ་རྒོལ་བྱ་དགོས་ཞེས་སོགས་བཀོད་འདུག་པ་ཟུར་གསལ་པར་ནང་གསལ་བ་འདི་ཡིན།།