༸གོང་ས་མཆོག་བུ་ལུ་མིང་ཀྲོན་དུ་ཞབས་སོར་འཁོད།

༄༅༎བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཕྱི་ཚེས་༡༡ཉིན་རྒྱ་གར་ནས་ཡོ་རོབ་ཡུལ་གྲུ་བརྒྱུད་ཐོག་མར་ཨ་རིའི་གྲོང་ཁྱེར་ Chicago གནམ་ཐང་དུ་༸ཞབས་སོར་འཁོད་གནང་མཛད་ཏེ་ཨ་རིའི་ནང་གི་མཛད་འཆར་དབུ་འཛུགས་གནང་ཡོད་པ་རེད།  Chicago གནམ་ཐང་དུ་ཆིབས་བསྒྱུར་བསྐྱངས་སྐབས་བཙན་བྱོལ་བོད་གཞུང་བྱང་ཨ་རིའི་སྐུ་ཚབ་དོན་གཅོད་སྐུ་ངོ་བློ་བཟང་སྙན་གྲགས་ལགས་ཀྱིས་གཙོས་པའི་ས་གནས་བོད་མི་དང་བོད་དོན་རྒྱབ་སྐྱོར་བ་དེ་བཞིན་ཨ་རིའི་སྙན་གྲགས་ཅན་གྱི་གློག་བརྙན་འཕྲབ་སྟོན་པ་ཞིག་ཡང་ཕེབས་བསུར་བཅར་་གནང་བ་དང་འབྲེལ།ད་རེས་ཀྱི་མཛད་འཆར་ཐོག་མ་བསྐྱངས་ས་ Indiana མངའ་སྡེའི་Bloomington གྲོང་ཁྱེར་དུ་༸ཞབས་སོར་འཁོད་སྐབས་བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་ སྐུ་འབུམ་བྱམས་བརྩེ་གླིང་གི་འགན་འཛིན་ཨ་ཀྱ་རིན་པོ་ཆེས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུའི་མཇལ་དར་དཀར་གཙང་ཕུལ་བ་དང་ཏེ་ལོ་རིན་པོ་ཆེ་སོགས་སྐྱེས་ཆེན་དམ་པ་ཁག་ཅིག་ཀྱང་ཕེབས་བསུར་བཅར་གནང་ཡོད་ཅིང་དེ་བཞིན་ས་གནས་མང་ཚོགས་དང་བོད་པའི་སློབ་ཕྲུག་ཚོས་ལུས་ལ་བོད་ཆས་ཟབ་ཆོར་སྤྲས་ནས་  བཀྲིས་ཞོལ་པའི་གར་གྱི་་འཁྲབ་སྟོན་ཕུལ་བ་སོགས་ ༧གོང་ས་མཆོག་ལ་ཕེབས་བསུ་ཟབ་རྒྱས་ཞུས་ཡོད་པ་རེད།༸གོང་ས་༸སྐྱབས་མགོན་ཆེན་པོ་མཆོག་ད་རེས་བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་སྐུ་འབུམ་བྱམས་བརྩེ་གླིང་ནས་ ཆོས་འབྲེལ་སླད་ཇི་ལྟར་གསོལ་འདེབས་ཞུས་པ་བཞིན་ཆིབས་སྒྱུར་བསྐྱངས་གནང་བ་ཞིག་ཡིན་པ་དང་།ས་ཁུལ་དེའི་ནང་བཞུགས་བཞག་གསུམ་རིང་ ཕྱི་ཚེས་༡༢་དང་༡༣ཉིན་Indiana མཐོ་སློབ་ཁང་ནང་ཤེས་རབ་སྙིང་པོའི་གསུང་ཆོས་བཀའ་དྲིན་སྐྱོང་གནང་མཛད་ཀྱི་ཡོད་པ་དང་།ཕྱི་ཚེས་༡༤ཉིན་Indiana མངའ་སྡེའི་གྲོང་ཁྱེར་Indianapolis ནང་མང་ཚོགས་ཀྱི་བཀའ་སློབ་བཀའ་དྲིན་མཛད་ཀྱི་ཡོད་འདུག།