༸གོང་ས་མཆོག་འབྲས་ལྗོངས་སུ་ཞབས་སོར་འཁོད།

༄༅། །བཙན་བྱོལ་བོད་གཞུང་གི་དྲ་གནས་ཐོག་གནས་ཚུལ་འཁོད་དོན།ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༡༥ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འབྲས་ལྗོངས་གཞུང་ཕྱོགས་ནས་གསོལ་འདེབས་ཞུས་དོན་ལྟར་ཀ་སྦུག་ནས་འབྲས་ལྗོངས་གཞུང་གི་ཐད་འཕུར་གནམ་གྲུའི་ཐོག་གནས་མཆོག་པད་གླིང་དུ་གདན་ཞུས་ཀྱིས་གནམ་ཐང་དུ་༸ཞབས་སོར་འཁོད་སྐབས་འབྲས་ལྗོངས་མངའ་གཞུང་གི་སྤྱི་ཁྱབ་བློན་ཆེན་སྐུ་ཞབས་པ་ཝན་ཅམ་གླིང་མཆོག་དང་དྲུང་ཡིག་ཆེན་མོ། གྲོས་ཚོགས་ཀྱི་འཐུས་མི། མངའ་སྡེའི་རྫོང་དཔོན། ཉེན་རྟོག་སྤྱི་ཁྱབ་དཔོན་སོགས་གནད་ཡོད་མི་སྣ་མང་པོ་ཞིག་གིས་པད་གླིང་གནམ་ཐང་དུ་ཕེབས་བསུར་བཅར་ཏེ་༸གོང་ས་མཆོག་འབྲས་ལྗོངས་སུ་སླར་ཡང་༸ཞབས་སོར་འཁོད་པར་འཚམས་འདྲི་དང་སྦྲགས་ཁུལ་དུ་རྟེན་གཞི་བྱས་པའི་འབྲས་ལྗོངས་ཆོས་རྒྱལ་དང་མངའ་གཞུང་གི་མ་དགོན་པདྨ་དབྱངས་རྩེར་གདན་འདྲེན་ཞུས་ཡོད་འདུག།