༸གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་གསལ་བསྒྲགས།

༸གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལས་འཆར་ཐད་གོ་སྒྲིག་ཚོགས་ཆུང་གིས་གསར་འགོད་ལྷན་ཚོགས་ཐོག་གསལ་བསྒྲགས་གནང་བ།

༄༅། །ཕྱི་ལོ་ ༢༠༡༤ ལོ་འདི་ནི་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་གཟབ་རྒྱས་ཞུ་རྒྱུ་ཡིན་པའི་སྐོར། ཟླ་འདིའི་ཕྱི་ཚེས ༢༣ ཉིན་བཞུགས་སྒར་དུ་གོ་སྒྲིག་ཚོགས་ཆུང་གིས་གསར་འགོད་ལྷན་ཚོགས་ཤིག་སྐོང་ཚོགས་གནང་ཡོད་པའི་སྐོར། འདི་གའི་གསར་འགོད་པ་བློ་བེ་ཡིས་ས་གནས་ནས་བཏང་བའི་གནས་ཚུལ་ལ་གསན་རོགས༎

 

གསར་འགོད་པ་བློ་བྷེ།

དེ་ཡང་སྤྱི་ལོ་༢༠༡༤ལོ་འདི་བཞིན་༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་གསལ་བསྒྲགས་གནང་ཡོད་པ་བཞིན་ཚོགས་མི་ལྔ་ལས་གྲུབ་པའི་གོ་སྒྲིག་ཚོགས་ཆུང་ཞིག་ཀྱང་བསྐོ་གཞག་གནང་ཡོད་པ་རེད། ཚེས་༢༣ཉིན་གོ་སྒྲིག་ཚོགས་ཆུང་ཐོག་ནས་གསར་འགོད་ལྷན་ཚོགས་ཤིག་ཀྱང་བསྐྱངས་པའི་ཐོག་བཀའ་ཤག་ལ་ལྟར་འབུལ་ཞུས་པའི་བཀའ་དྲིན་རྗེས་དྲན་སྲུང་བརྩི་ཞུ་ཕྱོགས་ཀྱི་ལས་འཆར་གསལ་བསྒྲགས་གནང་ཡོད་པ་དང་། གོ་སྒྲིག་ཚོགས་ཆུང་གི་ཚོགས་གཙོའི་གྲས་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་བཀའ་ཤག་གིས་ལས་འཆར་གཏན་འབེབས་གནང་བ་༢༥ཡོད་པའི་ཁོངས་ནས་ཆོས་རིག་ལས་ཁུངས་ཀྱི་འོག་ལ་ལས་རིམ་ལྔ་དང་། ནང་སྲིད་ལས་ཁུངས་ལ་ལས་རིམ་གཉིས། ཤེས་རིག་ལས་ཁུངས་ལ་ལས་རིམ་བཞི། ཕྱི་དྲིལ་ལས་ཁུངས་ལ་ལས་རིམ་ལྔ། འཕྲོད་བསྟེན་ལས་ཁུངས་ལ་ལས་རིམ་གཅིག། གོ་སྒྲིག་ཚོགས་ཆུང་ལ་ལས་རིམ་བརྒྱད་བཅས་གཏན་འཁེལ་བྱུང་ཡོད་པ་དང་། དེ་དག་གི་ནང་ནས་༧གོང་ས་༧སྐྱབས་མགོན་ཆེན་པོ་མཆོག་གིས་༧ཀུན་གཟིགས་༧པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་མཛད་པར་བརྟེན་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་དགུང་གྲངས་༢༥ཕེབས་པའི་སྐུའི་འཁྲུངས་སྐར་མཛད་སྒོ་དེ་བཞིན་དབུས་བོད་མིའི་སྒྲིག་འཛུགས་ཀྱི་ངོས་ནས་གཞུང་འབྲེལ་ཐོག་སྲུང་བརྩི་ཞུས་ཡོད་པ་དང་། དེ་བཞིན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་ནོར་ལྦེ་ཞི་བདེའི་གཟེངས་རྟགས་འབུལ་བཞེས་མཛད་ཡོད་པ་བརྟེན་ཉེ་སྔོན་ནོར་ཝེ་རྒྱལ་ས་ཨོས་ལོའི་ལོར་ནོ་བེལ་བསྟི་གནས་ཁང་དུ་ནོ་བེལ་ཞི་བདེའི་གཟེངས་རྟགས་ཚོགས་ཆུང་གི་ཚོགས་མི་ཁག་ལྔ་དང་ལྷན་༸གོང་ས་མཆོག་དང་གསོལ་སྟོན་ཚོགས་འདུའི་མཛད་རིམ་བསྐྱངས་པ་སོགས་ལས་རིམ་གཉིས་གོ་སྒྲིག་ཞུས་ཟིན་པ་གསལ་འདོན་གནང་འདུག ༧གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལས་རིམ་ཁོངས་སུ་འདི་ལོ་༧གོང་ས་མཆོག་ཕྱི་ལུགས་ལྟར་དགུང་གྲངས་༧༩ ཕེབས་པའི་སྐབས་དབུས་ས་གཉིས་སུ་སྐུའི་འཁྲུངས་སྐར་སྔར་ལྷག་གཟབ་རྒྱས་ངང་སྲུང་བརྩི་ཞུ་རྒྱུ་དང་། ༧གོང་ས་མཆོག་གིས་བོད་མིར་མང་གཙོ་གསོལ་རས་བསྕལ་བར་བཀའ་དྲིན་རྗེས་དྲན་ཞུ་ཆེད་དམངས་གཙོ་དུས་དྲན་སྲུང་བརྩི་གཟབ་རྒྱས་ཞུ་རྒྱུ་ལ་སོགས་པའི་ལས་འཆར་ཁག་དབུས་ས་གཉིས་ཀྱི་ཁྱབ་ཁོངས་སུ་ཡོད་པའི་གཞིས་ཆགས་ཁག་དང་། ཆོས་སྡེ་ཁག། སློབ་གྲྭ་ཁག་གི་ནང་ལས་འཆར་སྤེལ་རྒྱུ་ཡིན་པ་ངོ་སྤྲོད་གནང་འདུག

གསར་འགོད་པ་དོན་གྲུབ་རྣམ་རྒྱལ།