བཞུཊ་སྒར་དུ་ཞབས་སོར་འཁོད་པ།

༄༅༎བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཁེ་ན་ཌ་དང་ཨ་མེ་རི་ཀའི་ཁུལ་དུ་ཉིན་གྲངས་བཅུ་དགུའི་མཛད་འཆར་ལེགས་གྲུབ་ཀྱིས་ དེ་རིང་ཕྱི་ ༡༠ ཚེས་ ༡༣ ཉིན་བཞུགས་སྒར་རྡ་རམ་ས་ལར་ཞབས་སོར་ལེགས་པར་འཁོད་གནང་མཛད་ཡོད་པ་རེད།༧གོང་ས་༧སྐྱབས་མགོན་ཆེན་པོ་མཆོག་རྡ་སའི་ག་གྷལ་གནམ་ཐང་དུ་ཞབས་སོར་འཁོད་གནང་མཛད་སྐབས་བཙན་བྱོལ་བོད་མི་དམངས་སྤྱི་འཐུས་ཀྱི་ཚོགས་གཙོ་བགྲེས་གཞོན་དང་བཀའ་བློན་ཁྲི་པ་བཅས་ནས་ཕེབས་བསུ་ཞུས་ཤིང༌། དེ་བཞིན་བཙན་བྱོལ་བོད་གཞུང་གི་ཁྲིམས་ཞིབ་པ་ཆེ་བ་རྣམ་པ་དང་སྤྱི་འཐུས་རྣམ་པ་དེ་བཞིན་རྣམ་གྲྭ་འདུས་མང་དང་གཞུང་དང་གཞུང་འབྲེལ་མ་ཡིན་པའི་སྡེ་ཚོགས་ཀྱི་ཚོགས་པའི་མི་སྣ་ཁག་ནས་སེར་འབངས་བསྒྲིག་སྟེ་༧གོང་ས་༧སྐྱབས་མགོན་ཆེན་པོ་མཆོག་ཕོ་བྲང་དུ་ཞབས་སོར་མ་འཁོད་བར་ཕེབས་བསུ་ཟབ་རྒྱས་ཞུས་ཡོད་འདུག།ཐེངས་འདིའི་ཉིན་གྲངས་བཅུ་དགུའི་རིང་གི་ཆིབས་བསྒྱུར་སྐབས་ཐོགས་མར་༧གོང་ས་༧སྐྱབས་མགོན་ཆེན་པོ་མཆོག་ནས་ཨ་རིའི་ནུབ་ཕྱོགས་ཀྱི་མངའ་སྡེ་ཀ་ལི་ཕྷོར་ནི་ཡའི་གྲོང་ཁྱེར་ལོསི་ཨེན་ཇི་ལེསིའི་ནང་བདེན་བཞིའི་སྒོ་ནས་ཆོས་འབྲེལ་གསུང་ཆོས་སྩལ་གནང་མཛད་པ་དང་དེ་རྗེས་ཀེ་ན་ཌའི་གྲོང་ཁྱེར་ཝེན་ཁུ་པའི་ནང་ཞི་བདེའི་ལྷན་ཚོགས་ཀྱི་ཚོགས་མགོན་དུ་ཆིབས་བསྒྱུར་བསྐྱངས་གནང་མཛད་དེ་ཀེལ་གྷ་རིར་ཆིབས་བསྒྱུར་དང་དེ་རྗེས་ནིའུ་ཡོརྐ་ས་གནས་མཐར་ཨ་མེ་རི་ཀའི་རྒྱལ་ས་ཝ་ཤིང་ཊོན་དུ་ཆིབས་བསྒྱུར་བསྐྱངས་ཤིང༌།ཨ་རིའི་གྲོས་ཚོགས་ནས་༧གོང་ས་༧སྐྱབས་མགོན་ཆེན་པོ་མཆོག་ལ་གྲོས་ཚོགས་ཀྱི་འཐུས་མི་འདས་པོ་ཊོམ་ལེན་ཊོསི་འགྲོ་བ་མིའི་ཐོབ་ཐང་གི་བྱ་དགའ་ཕུལ་ཞིང་གྲོས་ཚོགས་གོང་འོག་གི་གནས་ཡོད་འཐུས་མི་ཁག་གཅིག་དང་མཇལ་འཕྲད་གནང་ཡོད་པ་རེད།དེ་རྗེས་ཉིན་གྲངས་གཉིས་རིང་དུས་རབས་ཉི་ཤུ་རྩ་གཅིག་པའི་ནང་གི་མི་ཚོ་གོ་ལའི་གཅིག་ལ་གཅིག་རྟེན་གྱི་གནས་སྟངས་འདིའི་འོག་བསམ་བློའི་ཡོན་ཏན་བཟང་པོ་དང་ལྡན་པ་ཞིག་གི་ཐོག་ནས་ཚར་ལོངས་འབྱུང་ཐབས་ཆེད་ཤེས་ཡོན་སློབ་གསོ་སྤྲོད་ཕྱོགས་ཐད་ཀྱི་སེམས་དང་སྲོག་གི་ཚོགས་འདུར་མཉམ་ཞུགས་གནང་ཡོད་པ་རེད།དེ་བཞིན་རྒྱལ་ས་ཝ་ཤིང་ཊོན་གྱི་ནང་རྒྱ་རིགས་ཁག་གཅིག་དང་མཇལ་འཕྲད་དང་ལྷག་པར་དུ་རྒྱ་རིགས་བོད་དོན་རྒྱབ་སྐྱོར་བ་ཚོར་རྒྱལ་སྤྱིའི་བོད་དོན་ལས་འགུལ་ཁང་གི་བདེན་པའི་སྒྲོན་མའི་བྱ་དགའ་གསོལ་སྩལ་གནང་ཡོད་པ་རེད།བྱ་དགའ་དེ་རྒྱ་རིགས་དེ་དག་གི་སྐུ་ཚབ་མཚོན་པའི་ཐོག་ནས་སྐུ་ཞབས་ཝང་ལི་ཞུང་གྱིས་བཞེས་ཡོད་པ་རེད།ཨ་མེ་རི་ཀའི་མཛད་འཆར་ཉིན་མཐའ་མར་དད་གུས་ཅན་སྟོང་ཕྲག་འགའ་ཤས་ལ་ནང་ཆོས་ངོ་སྤྲོད་ཀྱི་གསུང་ཆོས་དང་བོད་མི་ཚོར་བཀའ་སློབ་སྩལ་གནང་མཛད་པ་བཅས་ཀྱི་རླབས་ཆེན་གྱི་མཛད་འཕྲིན་བསྐྱངས་གནང་མཛད་ཡོད་པ་རེད།