၈ လေးလုံး ၂၄ နှစ်ပြည့် ရန်ကုန်မှာ ကျင်းပနိုင်ရေး ဆွေးနွေး

နိုင်ငံရေးအကျဉ်းသားဟောင်းများ အဖွဲ့၊ လူ့ဘောင်သစ် ဒီမိုကရက်တစ်ပါတီ ပြန်လည်စုစည်းရေး ကော်မတီ၊ Generation Wave နဲ့ ဝမ်းဖိုးဝမ်း ခေါ် ၁၄၁ ယောက်အဖွဲ့ တို့က စည်းဝေးညှိနှိုင်းကြ တာလို့ နိုင်ငံရေးအကျဉ်းသားဟောင်းများအဖွဲ့က ကိုသက်ဦးက RFA ကိုပြောပါတယ်။

"နေ့လည် ၁၁ နာရီကနေ ၁ နာရီအထိ ဆွေးနွေးကြတယ်။ နိုင်ကျဉ်းအဖွဲ့၊ လူ့ဘောင်သစ်၊ GW၊ ဝမ်းဖိုးဝမ်း၊ ဗမာနိုင်ငံလုံးဆိုင်ရာ ကျောင်းသား သမဂ္ဂများ အဖွဲ့ချုပ် ကျော်ကိုကိုတို့၊ စည်သူမောင်တို့ ကျောင်းသား သမဂ္ဂပြန်လည် ဖွဲ့စည်းရေးအဖွဲ့ ပါတယ်။ ရန်ကုန်မှာ ကျန်နေခဲ့တဲ့ အဖွဲ့အစည်းတွေ အားလုံး ပေါင်းပြီးတော့ လုပ်တယ်။"

၈၈ မျိုးဆက်ကျောင်းသားများအဖွဲ့က မန္တလေးမြို့မှာ ၈ လေးလုံး နှစ်ပတ်လည် အခမ်းအနား ကျင်းပဖို့ ပြင်ဆင်နေတဲ့ အတွက် ကျန်အဖွဲ့အစည်းတွေက ရန်ကုန်မြို့မှာလည်း ကျင်းပဖို့ ဆွေးနွေးကြတာလို့ ဆိုပါတယ်။

အဲဒီ ၈ လေးလုံးနှစ်ပတ်လည်နေ့မှာ အရေးတော်ပုံကာလ အတွင်း ကျဆုံးသွားတဲ့ ရဟန်းရှင်လူ ကျောင်းသားပြည်သူတွေကို ရည်စူးပြီး သံဃာတော် ၈၈ ပါးကို ဆွမ်းကပ်ကြမှာ ဖြစ်သလို အခမ်းအနား ကျင်းပမှာလည်း ဖြစ်ပါတယ်။ အဲဒီနေ့မှာ ဆောင်ရွက်မယ့် အသေးစိတ် အစီအစဉ်နဲ့ အခမ်းအနား ကျင်းပမယ့် နေရာကိုတော့  သြဂုတ်လ ၈ ရက်နေ့နီးမှ ထုတ်ပြန်ကြေညာမယ်လို့ သိရပါတယ်။