နိုင်ငံရေးအကျဉ်းသား ၆ဝ ကျော် လွတ်လာလို့ AAPP ပြော

နိုင်ငံတော်သမ္မတ ဦးထင်ကျော်ရဲ့ ပြစ်ဒဏ်လွတ်ငြိမ်းခွင့်နဲ့ အကျဉ်းထောင် အသီးသီးကနေ လွတ်မြောက်လာသူ ၈၃ ဦးထဲမှာ နိုင်ငံရေးအကျဉ်းသား ၆၀ ကျော် ပါဝင်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ထုတ်ပြန်ပါတယ်။

ဒီနေ့ လွတ်မြောက်လာသူတွေဟာ ပြစ်ဒဏ်ချမှတ်ခံထားရသူတွေဖြစ်ပြီး အကျဉ်းထောင်တွေထဲမှာ နိုင်ငံရေး အကျဉ်းသား ၆ဝ ဝန်းကျင်လောက် ကျန်နေ ဆဲဖြစ်ကြောင်း AAPP အဖွဲ့ဝင် ကိုအောင်မျိုးကျော် က ပြောပါတယ်။

"လွှတ်တာကတော့ ၈၃ ယောက်၊ အခြား ၂ဝ စာရင်းကတော့ ကျနော်တို့လည်း လိုက်စုံစမ်းနေတာရှိသေး တယ်ဗျ၊ ကျနော်တို့စာရင်းအရတော့ ၁၂၁ ယောက် စာရင်းကို ပို့ပေးထားတယ်လေ၊ အခု အဲ့ဒီအထဲက ၆၃ ယောက်ပါတာပေါ့နော်၊ ကျနော်တို့ လက်လှမ်းမမီတဲ့နေရာတွေမှာလည်း ရှိနိုင်တယ်လေ၊ အဲ့ဒီလူတွေ လည်း ပါကောင်းပါသွားနိုင်တာပေါ့နော်၊ ထောင်ကျပြီးသားက အခုစာရင်းအတိုင်းဆိုရင် ၆ဝ ဝန်းကျင်လောက်ကျန်မယ်၊ တရားရင်ဆိုင်နေရတာက ၂၇၁ ယောက်ကျန်မယ်၊ လွှတ်တာကတော့ တရား ရင်ဆိုင်နေရတာတွေ မပါပါဘူး၊ သြင်္ကန်မတိုင်ခင်က လွှတ်တာကတော့ တရားရင်ဆိုင်နေရတဲ့ ကျောင်းသား သပိတ်နဲ့ ပတ်သက်ပြီးတော့ ကျောင်းသားတွေနဲ့ ဝန်းရံပြည်သူတွေလွှတ်တယ်၊ အခုတစ်ကြိမ်က ထောင်ကျ ပြီးသားလူတွေလွှတ်တယ်၊ နောက်တစ်ကြိမ်ကတော့ နောက်ထပ်အချုပ်တွေရော၊ ကျန်တဲ့ထောင်ကျ ပြီးသား နိုင်ငံရေးအကျဉ်းသားတွေရောပါမယ်လို့ ကျနော်တို့ မျှော်လင့်ရတာပေါ့"

လွတ်မြောက်လာသူတွေထဲမှာ အင်းစိန်ထောင်က ၁၆ ဦး၊ ပခုက္ကူထောင်က ၅ ဦး၊ စစ်တွေထောင်က ၄ ဦး၊ ပြည်ထောင်က ၆ ဦး၊ အိုးဘိုထောင်က ၄ ဦး၊ ထုံးဘိုရဲဘက်စခန်းက ၂ ဦး၊ မြင်းခြံထောင်က ၅ ဦး၊ သထုံထောင်က ၉ ဦး၊ တောင်ငူထောင်က ၄ ဦး၊ မုံရွာထောင်က ၁ ဦး၊ ညောင်ဦးထောင်က ၁ ဦး၊ ရဲဘက်စခန်းတွေက ၆ ဦး တို့ ပါဝင်တယ်လို့ AAPP ထုတ်ပြန်ချက်မှာ ပါရှိပါတယ်။

အင်းစိန်ထောင်က ၁၆ ဦးမှာ နိုင်ငံတော်အကြည်ညိုပျက်စေမှု၊ တရားမဝင်စီတန်းလှည့်လည်မှုတို့နဲ့ အင်းစိန်ထောင် မှာ အကျဉ်းချခံထားရတဲ့ ဒေါ်နော်အုံးလှ၊ ဗိုလ်ကြီးဟောင်း နေမျိုးဇင်၊ ကိုထင်ကျော်တို့ ဖြစ်ပါတယ်။

ရက္ခိုင့်တပ်မတော် AA နဲ့ ဆက်သွယ်မှုကြောင့် စစ်တွေထောင်မှာ အကျဉ်းချခံထားရသူ ၄ ဦး၊ နိုင်ငံတော် လျှို့ဝှက်ချက်ပေါက်ကြားမှု ဥပဒေပုဒ်မနဲ့ ပခုက္ကူထောင်မှာ အကျဉ်းကျနေတဲ့ ယူနတီသတင်းသမား ၅ ဦး၊ ဘာသာ သာသနာညှိုးနွမ်းစေမှုနဲ့ မုံရွာထောင်မှာ အကျဉ်းကျနေတဲ့ စာရေးဆရာ ထင်လင်းဦး တို့လည်း လွတ်မြောက်လာ ပါတယ်။

ဒါ့အပြင် အင်းစိန်ထောင်မှာ အီလက်ထရောနစ်ဥပဒေပုဒ်မ ၊ အရေးပေါ်စီမံမှုအက်ဥပဒေပုဒ်မတို့နဲ့ နှစ်ပေါင်း ၂၀ ပြစ်ဒဏ်ချမှတ်ခံထားရတဲ့ လေတပ်က ဗိုလ်ကြီး နေလင်းဒွေး နဲ့ ဗိုလ်ကြီး ချစ်ကို လည်း ပါဝင်ပါတယ်။