ပြည်တွင်းငြိမ်းချမ်းရေး ဆောင်ရွက်ဖို့ အစိုးရကို တောင်းဆို

မြန်မာနိုင်ငံလုံးဆိုင်ရာ သံဃာ့ တပ်ပေါင်းစု အပါအဝင် ၈၈ မျိုးဆက် ကျောင်းသားများ၊ ရက္ခအလင်းတန်း အဖွဲ့၊ ဗမာနိုင်ငံလုံးဆိုင်ရာ လူငယ်များသမဂ္ဂ၊ အခြေခံပညာ ကျောင်းသားများသမဂ္ဂ၊ ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်၊ ရခိုင်ကျောင်းသားများ သမဂ္ဂနဲ့ ၂ဝဝ၇ မျိုးဆက် ကျောင်းသားများသမဂ္ဂ တို့ ပူးပေါင်းပြီး ကြေညာချက် ထုတ်ပြန်လိုက်တာပါ။

မြန်မာနိုင်ငံက ပြည်တွင်းစစ်မီးဟာ တိုင်းရင်းသား အင်အားစုတွေနဲ့ စစ်အုပ်စုအကြား ဖြစ်ပွားနေတဲ့ ပြဿနာသက်သက် မဟုတ်ဘဲ မြန်မာနိုင်ငံ ဒီမိုကရေစီရေးတိုက်ပွဲ ပြဿနာ ဖြစ်တယ်လို့ မိမိတို့ ယုံကြည်ကြောင်း ကြေညာချက်မှာ ရေးသားထားပါတယ်။

ဒါ့အပြင် လက်ရှိ ကချင်ပြည်နယ်၊ ရှမ်းပြည်နယ်၊ မွန်ပြည်နယ်နဲ့ ကရင်ပြည်နယ်တွေမှာ ဖြစ်ပွားနေတဲ့ အစိုးရရဲ့ ဗိုလ်ကျ စိုးမိုးရေး ပြည်တွင်းစစ်ပွဲတွေကို ချက်ခြင်း ရပ်တန်းက ရပ်ပြီး ပြည်တွင်းငြိမ်းချမ်းရေး ခေါ်ယူဖို့ တောင်းဆိုထားပါတယ်။

မြန်မာနိုင်ငံ ငြိမ်းချမ်းရေးအတွက် ပြည်တွင်းပြည်ပမှာ ရှိကြတဲ့ အဖွဲ့အစည်း အသီးသီး အနေနဲ့ ပူးပေါင်း ပါဝင်ကြဖို့လည်း ကြေညာချက်မှာ တိုက်တွန်း နိုးဆော်ထားပါတယ်။